Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 40 | |
40:1 | Бысть же по словесех сих, согреши старейшина винарск царя Египетска и старейшина житарск господину своему царю Египетскому. |
40:2 | И разгневася фараон на оба евнухи своя, на старейшину винарска и на старейшину житарска, |
40:3 См.: 🔗Быт. 39:20 | и вверже их в темницу во узилище, в место, идеже Иосиф ввержен бяше. |
40:4 | И вручи их старейшина темницы Иосифу, и предста им: и беста дни (некия) в темнице, |
40:5 См.: 🔗Дан. 2:1 🔗Мф. 27:19 | и видеста оба сон во едину нощь: видение же сонное старейшины винарска и старейшины житарска, иже беста царя Египетска, суще в темнице, бяше сие. |
40:6 См.: 🔗Быт. 41:8 | Вниде же к ним Иосиф заутра и виде их, и бяху смущени: |
40:7 | и вопрошаше евнухов фараоних, иже быша с ним в темнице, у господина своего, глаголя: что, яко лица ваша уныла днесь? |
40:8 См.: 🔗Быт. 41:16 🔗Дан. 2:27 | Они же реша ему: сон видехом, и разсуждаяй его несть. Рече же им Иосиф: еда не Богом изявление их есть? Поведите убо мне. |
40:9 | И поведа старейшина винарск сон свой Иосифу и рече: во сне моем бяше виноград предо мною: |
40:10 | в винограде же три леторасли, и той цветущь произнесе отрасли, зрелы грозды лозныя: |
40:11 | и чаша фараонова в руце моей: и взях грезн, и изжах оный в чашу, и дах чашу в руку фараоню. |
40:12 См.: 🔗Быт. 41:25 | И рече ему Иосиф: сие разсуждение сему: три леторасли три дни суть: |
40:13 | еще три дни, и помянет фараон сан твой, и паки поставит тя в старейшинство твое винарско, и подаси чашу фараону в руку его по сану твоему первому, якоже был еси виночерпчий: |
40:14 | но помяни мя тобою, егда благо ти будет, и сотвориши надо мною милость, и да помянеши о мне фараону, и изведеши мя от твердыни сея: |
40:15 См.: 🔗Быт. 37:28 | яко татьбою украден бых из земли Еврейския, и зде ничто зло сотворих, но ввергоша мя в ров сей. |
40:16 | И виде старейшина житарск, яко прямо разсуди, и рече Иосифу: и аз видех сон, и мняхся три кошницы хлебов держати на главе моей: |
40:17 | в кошнице же верхней от всех родов, яже фараон яст, дело хлебенное, и птицы небесныя ядяху тая от кошницы, яже на главе моей. |
40:18 | Отвещав же Иосиф, рече ему: сие разсуждение его: три кошницы три дние суть: |
40:19 См.: 🔗Быт. 41:13 | еще три дние, и отимет фараон главу твою от тебе и повесит тя на древе, и изядят птицы небесныя плоть твою от тебе. |
40:20 См.: 🔗Мк. 6:21 | Бысть же в день третий, день рождения бяше фараоня, и творяше пир всем отроком своим: и помяну старейшинство старейшины винарска и старейшинство старейшины житарска, посреде отрок своих: |
40:21 | и постави старейшину винарска в старейшинство его: и подаде чашу в руку фараоню: |
40:22 См.: 🔗Быт. 40:19 | старейшину же житарска повеси (на древе), якоже сказа има Иосиф. |
40:23 См.: 🔗Ам. 6:6 | И не помяну старейшина винарск Иосифа, но забы его. |