Книга пророка Иезекииля, глава 29

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 29
29:1	В десятое лето, в десятый месяц, (в первый день) месяца, бысть слово Господне ко мне глаголя:
29:2 См.: 🔗Ис. 19:1 🔗Иер. 46:2	сыне человечь, утверди лице твое на фараона царя Египетска и прорцы нань и на Египет весь:
29:3 См.: 🔗Пс. 73:13 🔗Ис. 27:1	глаголи и рцы: сице глаголет Адонаи Господь: се, Аз наведу на тя, фараоне, царю Египетский, змиа великаго, седящаго среде рек своих, глаголющаго: моя суть реки, и аз сотворих я.
29:4 См.: 🔗Пс. 31:9 🔗Ис. 37:29 🔗Иез. 38:4	Аз же дам узду в челюсти твоя, и прилеплю рыбы реки твоея ко крилома твоима, и возведу тя от среды реки твоея, и к чешуям твоим прильпнут:
29:5 См.: 🔗Иер. 7:33 🔗Иер. 16:4 🔗Иез. 32:4	и низвергу тя вскоре и вся рыбы реки твоея: на лицы поля падеши, и не соберешися, и не оградишися, зверем земным и птицам небесным дах тя во снедь.
29:6 См.: 🔗4Цар. 18:21 🔗Ис. 36:6	И уведят вси живущии во Египте, яко Аз есмь Господь: зане был еси жезл тростян дому Израилеву:
29:7	егда яся тебе рукою своею, сокрушился еси, и егда восплеска на них всяка рука, и егда почиша на тебе, стерлся еси и сломил еси их вся чресла.
29:8 См.: 🔗Иер. 44:30	Сего ради тако глаголет Адонаи Господь: се, Аз наведу на тя мечь и погублю от тебе человеки и скоты,
29:9	и будет земля Египетска в погибель и во опустение, и уразумеют, яко Аз есмь Господь. Понеже глаголал еси, яко реки моя суть, и аз сотворих я:
29:10 См.: 🔗Иез. 30:6	того ради, се, Аз на тя и на и вся реки твоя, и дам землю Египетску во опустение и в мечь и в погибель, от Магдола и Сиины и даже до предел Ефиопских:
29:11 См.: 🔗Иез. 32:13	не пройдет сквозе ея нога человеча, ни нога скотия не поступит по ней, и не населится четыредесять лет:
29:12 См.: 🔗Иез. 30:23	и дам землю его в пагубу среде земли опустелыя, и гради его среде градов опустевших будут, в разорении будут четыредесять лет: и разсею Египта во языцех, и развею я по странам.
29:13 См.: 🔗Ис. 19:18	Сия глаголет Адонаи Господь: по четыредесятих летех соберу Египтяны от язык, аможе разсыпашася,
29:14 См.: 🔗Быт. 10:14 🔗Иер. 44:1	и возвращу пленники Египетския и вселю я в землю Фафорскую, в землю, отюнудуже взяти быша, и будет власть смиренна:
29:15	паче всех властей будет смиренна, и не вознесется ктому над языки, и умалены сотворю я, еже не быти им многим во языцех.
29:16 См.: 🔗Плч. 4:17 🔗Иез. 26:6	И не будут ктому дому Израилеву в надежду воспоминающую беззаконие, внегда последовати им по них: и уразумеют, яко Аз есмь Господь.
29:17	И бысть в двадесять седмое лето, во един день месяца перваго, бысть слово Господне ко мне глаголя:
29:18 См.: 🔗Пс. 136:8	сыне человечь, Навуходоносор царь Вавилонск поработи силу свою работою великою на Тира, всяка глава плешива и всяко рамо наго: и мзда не бысть ему ни силе его на Тира, за работу, еюже работаша нань.
29:19	Того ради сице глаголет Адонаи Господь: се, Аз даю Навуходоносору царю Вавилонску землю Египетску, и возмет множество ея, и пленит плен ея, и расхитит корысти ея, и будет мзда силе его:
29:20 См.: 🔗Ис. 10:5	за службу его, еюже послужи на Тира, дах ему землю Египетску, зане послужи Мне, сия глаголет Адонаи Господь.
29:21 См.: 🔗Иез. 24:27	В той день взыдет рог всему дому Израилеву, и тебе дам уста отверста среде их, и уведят, яко Аз есмь Господь.