Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 10 | |
10:1 См.: 🔗Иер. 14:22 | Просите от Господа дождя во время ранняго и поздняго: Господь сотвори привидения, и дождь зимен даст им, комуждо злак на селе. |
10:2 | Зане провещающии глаголаша труды, и вражбителие видения ложна и сония лжива глаголаху, суетными утешаху: сего ради изсхоша яко овцы, и озлоблени быша, понеже не бе изцеления. |
10:3 | На пастырей прогневася ярость Моя, и на агнцы посещу: и посетит Господь Бог Вседержитель стадо Свое, дом Иудин, и учинит я аки коня благолепна Своего во брани. |
10:4 | И от него призре, и от него учини, и от него лук в дусе ярости, и от него изыдет всяк изгоняяй в том. |
10:5 См.: 🔗Ис. 25:10 | И будут яко ратницы попирающе брение на путех во брани, и ополчатся, яко Господь с ними, и постыдятся всадницы коннии. |
10:6 См.: 🔗Соф. 3:15 | И укреплю дом Иудов и дом Иосифов спасу, и вселю я, понеже возлюбих я, и будут аки бы не отвратих их: зане Аз Господь Бог их и услышу я. |
10:7 См.: 🔗Ин. 16:22 | И будут яко ратницы Ефремовы, и возрадуется сердце их аки от вина: и чада их увидят и возвеселятся, и возрадуется сердце их о Господе. |
10:8 См.: 🔗Ис. 5:26 | Возвещу им и прииму я, зане искуплю их, и умножатся, якоже бяху мнози: |
10:9 См.: 🔗Втор. 4:27 | и всею я в людех, и дальнии помянут Мя, и воспитают чада своя, и обратятся: |
10:10 См.: 🔗Ис. 11:11 | и возвращу я от земли Египетския и от Ассириан прииму я, и в Галаадит и в Ливан введу я, и не имать остати от них ни един. |
10:11 См.: 🔗Исх. 14:16 | И пройдут морем узким и поразят в мори волны, и изсякнут вся глубины речныя, и отимется всяко досаждение Ассирийско, и скиптр Египетск отимется. |
10:12 См.: 🔗Ис. 45:25 🔗Мих. 4:5 | И укреплю я о Где Бозе их, и о имени Его восхвалятся, глаголет Господь. |