Книга Бытия, глава 6

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 6
6:1	И бысть егда начаша человецы мнози бывати на земли, и дщери родишася им:
6:2 См.: 🔗Втор. 14:1 🔗1Ин. 3:1 🔗Мф. 24:38	видевше же сынове Божии дщери человечи, яко добры суть, пояша себе жены от всех, яже избраша.
6:3 См.: 🔗Деян. 7:51 🔗Гал. 5:16 🔗1Пет. 3:20	И рече Господь Бог: не имать Дух Мой пребывати в человецех сих во век, зане суть плоть: будут же дние их лет сто двадесять.
6:4	Исполини же бяху на земли во дни оны: и потом, егда вхождаху сынове Божии к дщерем человеческим, и раждаху себе: тии бяху исполини, иже от века, человецы именитии.
6:5 См.: 🔗Быт. 8:21 🔗Мф. 15:19 🔗Мк. 7:21	Видев же Господь Бог, яко умножишася злобы человеков на земли: и всяк помышляет в сердцы своем прилежно на злая во вся дни:
6:6 См.: 🔗Чис. 23:19 🔗1Цар. 15:11	и помысли Бог, яко сотвори человека на земли, и размысли.
6:7	И рече Бог: потреблю человека, егоже сотворих, от лица земли, от человека даже до скота, и от гад даже до птиц небесных: зане размыслих, яко сотворих я.
6:8	Ное же обрете благодать пред Господем Богом.
6:9 См.: 🔗Сир. 44:16	Сия же бытия Ноева: Ное человек праведен совершен сый в роде своем, Богу угоди Ное.
6:10	Роди же Ное три сыны, Сима, Хама, Иафефа.
6:11	Растлеся же земля пред Богом, и наполнися земля неправды.
6:12	И виде Господь Бог землю, и бе растленна: яко растли всяка плоть путь свой на земли.
6:13 См.: 🔗2Пет. 2:5	И рече Господь Бог Ною: время всякаго человека прииде пред Мя, яко исполнися земля неправды от них: и се, Аз погублю их и землю.
6:14 См.: 🔗Евр. 11:7	Сотвори убо себе ковчег от древ (негниющих) четвероуголных: гнезда сотвориши в ковчезе, и посмолиши его внутрьуду и внеуду смолою.
6:15	И тако сотвориши ковчег: трех сот лактей долгота ковчега, и пятидесяти лактей широта, и тридесяти лактей высота его.
6:16	Собирая сводом сотвориши ковчег, и в лакоть свершиши его свыше: дверь же ковчега сотвориши от страны: обиталища двокровна и трекровна сотвориши в нем.
6:17 См.: 🔗Пс. 28:10	Аз же, се, наведу потоп, воду на землю, погубити всяку плоть, в нейже есть дух жизни под небесем: и елика суть на земли, скончаются.
6:18	И поставлю завет Мой с тобою: внидеши же в ковчег ты и сынове твои, и жена твоя и жены сынов твоих с тобою.
6:19 См.: 🔗Быт. 7:9	И от всех скотов и от всех гад, и от всех зверей, и от всякия плоти, два два от всех введеши в ковчег, да питаеши с собою: мужеский пол и женский будут.
6:20	От всех птиц пернатых по роду, и от всех скотов по роду, и от всех гадов ползающих по земли по роду их, два два от всех внидут к тебе, питатися с тобою, мужеский пол и женский.
6:21	Ты же возми себе от всех брашен, яже имате ясти, и собереши к себе, и будут тебе и оным брашно.
6:22 См.: 🔗Быт. 7:5	И сотвори Ное вся елика заповеда ему Господь Бог, тако сотвори.