Послание апостола Павла к Филиппийцам, глава 4

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 4
4:1 См.: 🔗2Кор. 1:14 🔗1Фес. 2:19	Темже, братие моя возлюбленная и вожделенная, радосте и венче мой, тако стойте о Господе, возлюбленнии.
4:2 См.: 🔗Флп. 2:2	Еводию молю и Синтихию молю тожде мудрствовати о Господе:
4:3 См.: 🔗Исх. 32:32 🔗Лк. 10:20 🔗Отк. 3:5	ей, молю и тебе, супружниче присный, споспешествуй им, яже во благовествовании сподвизашася со мною и с Климентом и с прочими споспешники моими, ихже имена в книгах животных.
4:4	Радуйтеся всегда о Господе: и паки реку: радуйтеся.
4:5 См.: 🔗Иак. 5:9 🔗1Пет. 4:7	Кротость ваша разумна да будет всем человеком. Господь близ.
4:6 См.: 🔗Мф. 6:25 🔗1Тим. 2:1	Ни о чемже пецытеся, но во всем молитвою и молением со благодарением прошения ваша да сказуются к Богу:
4:7 См.: 🔗Ин. 14:27 🔗Кол. 3:15	и мир Божий, превосходяй всяк ум, да соблюдет сердца ваша и разумения ваша о Христе Иисусе.
4:8 См.: 🔗Мф. 5:16 🔗Рим. 13:13	Прочее же, братие (моя), елика суть истинна, елика честна, елика праведна, елика пречиста, елика прелюбезна, елика доброхвальна, аще кая добродетель и аще кая похвала, сия помышляйте.
4:9 См.: 🔗Рим. 15:33	Умже и научистеся, и приясте, и слышасте, и видесте во мне, сия творите: и Бог мира будет с вами.
4:10	Возрадовахся же о Господе вельми, яко уже когда воспомянусте пещися о мне: понеже и печастеся, но непогодным временем обдержастеся.
4:11 См.: 🔗1Тим. 6:6	Не яко по скудости глаголю: аз бо навыкох, в нихже есмь, доволен быти:
4:12 См.: 🔗2Кор. 6:10	вем и смиритися, вем и избыточествовати: во всем и во всех навыкох, и насыщатися и алкати, и избыточествовати и лишатися.
4:13 См.: 🔗2Кор. 12:9	Вся могу о укрепляющем мя (Иисусе) Христе.
4:14	Обаче добре сотвористе, сприобщившеся печали моей.
4:15	Весте же и вы, Филипписиане, яко в начале благовествования, егда изыдох от Македонии, ни едина ми церковь общевася в слово даяния и приятия, точию вы едини:
4:16	яко и в Солунь и единою и дващи в требование (мое) посласте ми.
4:17 См.: 🔗2Кор. 12:14	Не яко ищу даяния, но ищу плода множащагося в слово ваше.
4:18	Приях же вся и избыточествую: исполнихся, приемь от Епафродита посланная от вас, воню благоухания, жертву приятну, благоугодну Богу.
4:19 См.: 🔗Пс. 22:1 🔗Еф. 3:16	Бог же мой да исполнит всякое требование ваше по богатству Своему в славе, о Христе Иисусе.
4:20	Богу же и Отцу нашему слава во веки веков. Аминь.
4:21	Целуйте всякаго свята о Христе Иисусе. Целуют вы сущая со мною братия.
4:22	Целуют вы святии вси, паче же иже от кесарева дому.
4:23	Благодать Господа нашего Иисуса Христа со всеми вами. Аминь.