Книга Премудрости Иисуса, сына Сирахова, глава 11 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 11
11:1 См.: 🔗Быт. 41:40 🔗Дан. 6:3	Премудрость смиреннаго вознесет главу его и посреде вельмож посадит его.
11:2 См.: 🔗1Цар. 16:7	Не похвали человека во красоте его, и не буди ти мерзок человек видением своим.
11:3	Мала есть в пернатых пчела, и начаток сладостей плод ея.
11:4 См.: 🔗Деян. 12:21 🔗Лк. 16:19	Во одеянии риз не похвалися и в день славы не превозносися: яко дивна дела Господня и тайна дела Его пред человеки.
11:5 См.: 🔗1Цар. 16:13	Мнози мучителие седоша на земли, нечаемый же увязеся венцем.
11:6 См.: 🔗Есф. 7:9	Мнози сильнии укорени быша зело, и славнии предани быша в руки инех.
11:7 См.: 🔗Втор. 13:14	Первее неже испытаеши, не порицай, уразумей прежде и тогда запрещай.
11:8 См.: 🔗Прит. 18:14	Прежде неже услышиши, не отвещавай, и не влагайся в среду беседы.
11:9	О вещи, яже ти несть на потребу, не тяжися, и на суде грешников не седай.
11:10 См.: 🔗Лк. 10:41	Чадо, деяния твоя да не будут о мнозе: аще умножиши, не будеши неповинен, и аще се гониши, не постигнеши, и не утечеши бежащь.
11:11 См.: 🔗Прит. 21:5 🔗1Тим. 6:9	Есть труждаяйся и потяся и тщася, и толико паче лишается.
11:12	Есть слаб и требуяй заступления, лишаяйся силы, и нищетою изюбилует:
11:13	и очи Господни призреста ему во благая, и воздвиже и от смирения его, и вознесе главу его, и дивишася о нем мнози.
11:14 См.: 🔗Иов. 1:21 🔗Иез. 28:4	Благая и злая, живот и смерть, нищета и богатство от Господа суть.
11:15	Даяние Господне пребывает благочестивым, и благоволение Его благопоспешится во век.
11:16	Есть богатяйся удержанием и скупостию своею, и сия часть мзды его,
11:17 См.: 🔗Лк. 12:19	внегда рещи ему: обретох покой и ныне ям от благ моих.
11:18 См.: 🔗Еккл. 9:12 🔗Иер. 17:11	И не весть, кое время приидет, и оставит я инем, и умрет.
11:19 См.: 🔗Мф. 10:22	Стой в завете твоем и пребывай в нем, и в деле твоем обетшай.
11:20	Не дивися делом грешника, веруй же Господеви и пребывай в труде твоем:
11:21 См.: 🔗1Цар. 2:7	яко удобно есть пред очима Господнима внезапу обогатити нищаго.
11:22	Благословение Господне на мзде благочестиваго, и в час скор процветет благословение Его.
11:23	Не рцы: кая ми потреба есть, и кая отныне будут ми благая?
11:24 См.: 🔗Сир. 5:1 🔗Отк. 3:17	Не рцы: доволна ми суть, и чим отселе озлоблен буду?
11:25 См.: 🔗Сир. 18:25	В день благих забвение злых, в день же злых не воспомянутся благая:
11:26 См.: 🔗Сир. 17:19	яко удобно есть пред Богом, в день смерти воздати человеку по делом его.
11:27	Озлобление времене забытие творит сладости, и в скончании человека открытие дел его.
11:28	Прежде смерти не блажи ни когоже, и в чадех своих познан будет муж.
11:29	Не всякаго человека вводи в дом твой: многи бо суть козни льстиваго.
11:30 См.: 🔗Иер. 5:27	Якоже рябка уловленая в клетце (обглядает), тако сердце гордаго, и якоже соглядник назирает падения:
11:31	доброе бо на зло обращая, подсаду творит и на добрыя детели возложит порок.
11:32 См.: 🔗Сир. 28:13	От искры огненныя умножается углие, и человек грешник на кровь приседит.
11:33	Блюдися от злодея, зло бо содевает, да не когда порок даст ти во век.
11:34	Всели чуждаго в дом твой, и развратит тя мятежем и чужда тя сотворит от твоих ти.