Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 16 | |
16:1 | Воздвигошася же от Елима, и прииде весь сонм сынов Израилевых в пустыню Син, яже есть между Елимом и между Синою. В пятый же надесять день втораго месяца изшедшым им от земли Египетския, |
16:2 | возропта весь сонм сынов Израилевых на Моисеа и Аарона, |
16:3 | и рекоша к ним сынове Израилевы: о дабы быхом измерли мы уязвени от Господа в земли Египетстей, егда седяхом над котлы мясными и ядохом хлебы до сытости: яко изведосте ны в пустыню сию уморити весь сонм сей гладом. |
16:4 | Рече же Господь к Моисею: се, Аз одождю вам хлебы с небесе: и изыдут людие, и соберут доволное дню, на (всяк) день, яко да искушу их, аще пойдут в законе Моем, или ни. |
16:5 | И будет в день шестый, и уготовят, еже внесут, и да будет сугубо, еже собираша на всяк день. |
16:6 | Рече же Моисей и Аарон ко всему сонму сынов Израилевых: в вечер (сей) увесте, яко Господь изведе вы от земли Египетския, |
16:7 См.: 🔗1Кор. 10:10 🔗Чис. 16:11 | и заутра узрите славу Господню, внегда услышати Господу роптание ваше на Бога: мы же что есмы, яко ропщете на ны? |
16:8 См.: 🔗Чис. 11:18 | И рече Моисей: егда даст Господь вам в вечер мяса ясти и хлебы заутра до сытости, понеже услыша Господь роптание ваше, имже ропщете на ны: мы же что есмы? Не на нас бо роптание ваше, но точию на Бога. |
16:9 | И рече Моисей ко Аарону: глаголи ко всему сонму сынов Израилевых: приидите пред Бога, услыша бо роптание ваше. |
16:10 См.: 🔗Сир. 45:3 | Егда же глаголаше Аарон всему сонму сынов Израилевых, и обратишася в пустыню, и слава Господня явися во облаце, |
16:11 | и рече Господь к Моисею глаголя: |
16:12 См.: 🔗Исх. 12:6 🔗Чис. 11:7 | слышах роптание сынов Израилевых: рцы к ним глаголя: к вечеру да снесте мяса и заутра насытитеся хлебов, и увесте, яко Аз есмь Господь Бог ваш. |
16:13 | Бысть же вечер, и приидоша крастели и покрыша полк. Заутра же бысть спадшей росе около полка, |
16:14 См.: 🔗Чис. 11:7 | и се, на лицы пустыни мелко яко кориандр, бело аки лед на земли. |
16:15 | Узревше же то сынове Израилевы, реша друг ко другу: что есть сие? Не ведяху бо, что бяше. Рече же Моисей к ним: сей хлеб, егоже даде Господь вам ясти: |
16:16 | сей глаголгол, егоже завеща Господь: соберите от него кийждо на домашния, гомор поглавно по числу душ ваших, кийждо вас с домашними своими соберите. |
16:17 | И сотвориша тако сынове Израилевы, и собраша ов много, ов же мало: |
16:18 См.: 🔗2Кор. 8:15 | и измеривше гомором, не преизбыточествова иже много, и иже мало, не мнее прият: кийждо на домашних своих собраша. |
16:19 | И рече Моисей к ним: никтоже да оставит на утрие от него. |
16:20 | И не послушаша Моисеа, но оставиша нецыи от него на утрие, и воскипе червми и возсмердеся. И оскорбися на них Моисей. |
16:21 | И собираша оное рано рано, кийждо надлежащее себе: егда же огреваше солнце, растаяваше. |
16:22 | Бысть же в день шестый, собраша потребное сугубо, два гомора комуждо. Приидоша же вси князи сонма и поведаша Моисею. |
16:23 См.: 🔗Быт. 2:2 | Рече же Моисей к ним: сие слово есть, еже глагола Господь: суббота покой свят Господу заутра: елика аще печете, пецыте, и елика аще варите, варите, все же избыточное оставите в скрове на утрие. |
16:24 | И оставиша от того до утрия, якоже заповеда им Моисей: и не возсмердеся, ниже червь бысть в нем. |
16:25 | Рече же Моисей: ядите днесь, есть бо суббота покой Господу: днесь не обрящете на поли: |
16:26 См.: 🔗Чис. 11:6 | шесть дний собирайте, в седмый же день суббота: яко не будет в нем. |
16:27 | Бысть же в седмый день, изыдоша нецыи от людий собирати, и не обретоша. |
16:28 | Рече же Господь Моисеови: доколе не хощете послушати заповедий Моих и закона Моего? |
16:29 См.: 🔗Быт. 2:2 | Зрите: Господь бо даде вам субботу день сей: сего ради Той даде вам в день шестый хлеба на два дни: седите кийждо вас в дому своем у себе, никтоже да исходит от места своего в день седмый. |
16:30 | И субботствоваша людие в день седмый. |
16:31 См.: 🔗Чис. 11:7 🔗Прем. 16:20 | И прозваша сынове Израилевы имя тому манна: бяше же яко семя кориандрово бело, вкус же его аки мука с медом. |
16:32 | Рече же им Моисей: сей глаголгол, егоже завеща Господь: наполните гомор от манны в скров в роды вашя: да видят хлеб, егоже ядосте вы в пустыни, егда изведе вас Господь от земли Египетския. |
16:33 См.: 🔗Евр. 9:4 | И рече Моисей ко Аарону: возми стамну златую едину и вложи в ню гомор полный от манны, и положиши тую пред Богом в соблюдение в роды вашя. |
16:34 | Якоже заповеда Господь Моисею, положи ю Аарон пред свидением в соблюдение. |
16:35 См.: 🔗Нав. 5:12 🔗Неем. 9:15 | Сынове же Израилевы ядоша манну лет четыредесять, дондеже приидоша в землю обитаемую, и ядоша манну, дондеже приидоша во страну Финикийскую: |
16:36 | гомор же десятая часть трех мер бяше. |