Четвёртая книга Царств (Вторая книга Царей), глава 12

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 12
12:1 См.: 🔗2Пар. 24:1	В лето седмое Ииуа воцарися Иоас, и четыредесять лет царствова во Иерусалиме. Имя же матере его Савиа от Вирсавеи.
12:2 См.: 🔗4Цар. 14:3	И сотвори Иоас правое пред Господем во вся дни, в няже просвети его Иодай иерей:
12:3 См.: 🔗3Цар. 15:14	обаче высоких не преставиша, и тамо еще людие жряху и кадяху на высоких.
12:4 См.: 🔗Исх. 25:2 🔗Исх. 30:13	И рече Иоас к жерцем: все сребро святых вносимое в дом Господень, сребро оценения, муж сребро взявый оценения, все сребро, еже аще взыдет на сердце мужа внести в дом Господень,
12:5 См.: 🔗2Пар. 24:5	да возмут себе жерцы, муж от продания своего, и тии да укрепят ведек дому во всех, идеже аще обрящется ведек.
12:6	И бысть в двадесять третие лето царя Иоаса, не укрепиша жерцы ведека храма:
12:7 См.: 🔗2Пар. 24:5	и призва царь Иоас Иодая жерца и жерцы, и рече к ним: что яко не укреписте ведека храма? И ныне не приимайте сребра от продажей ваших, яко на ведек храма дасте е.
12:8	И совещашася жерцы не приимати сребра от людий и не укрепляти ведека храма.
12:9 См.: 🔗2Пар. 24:8	И взя Иодай жрец кивот един, и сотвори в нем скважню, и положи его при олтари одесную входящих мужей в дом Господень: и влагаху тамо жерцы хранящии дверь все сребро приносимое в дом Господень.
12:10 См.: 🔗2Пар. 24:11	И бысть егда увидеша, яко много сребра в ковчезе, и взыде писчий царев, и жрец великий, и сребросечцы и открыша, и сочтоша сребро обретшееся в дому Господни:
12:11 См.: 🔗4Цар. 22:4 🔗2Пар. 24:12	и даша сребро уготованное в руце творящих дела на сосуды дому Господня: и раздаша древоделем и делателем зиждущым в дому Господни,
12:12	и стеноделателем, и художником, и секущым камения на купление древес, и камения тесанаго на строение ведека дому Господня, на вся елика иждивена быша на утверждение храма.
12:13 См.: 🔗3Цар. 7:50 🔗2Пар. 24:14	Обаче не творишася храму Господню двери сребряны, гвоздие, фиалы и трубы, ни вси сосуды златы, и сосуды сребряны от сребра принесеннаго в дом Господень:
12:14	понеже творящым дела дадеся сие, и утвердиша тем дом Господень.
12:15 См.: 🔗4Цар. 22:7	И не сочитаху мужей, имже даяху сребро в руки, даяти творящым дела, зане верно творяху.
12:16 См.: 🔗Лев. 5:15	Сребро за грехи и сребро за преступление, елико внесено бысть в дом Господень, жерцем бысть.
12:17 См.: 🔗4Цар. 8:12 🔗4Цар. 13:25	Тогда взыде Азаил царь Сирский и воева на Геф, и взя его Азаил и разби его: и обрати Азаил лице свое взыти на Иерусалим.
12:18 См.: 🔗3Цар. 15:18 🔗4Цар. 16:8 🔗2Пар. 24:23	И взя Иоас царь Иудин вся святая, елика освяти Иосафат и Иорам и Охозиа, отцы его и царие Иудины, и святая его, и все злато обретшееся в сокровищих дому Господня и дому царева, и посла Азаилу царю Сирску, и отиде от Иерусалима.
12:19 См.: 🔗3Цар. 14:19 🔗3Цар. 15:7	И прочая словес Иоасовых, и вся елика сотвори, не се ли, сия писана в книзе словес дний царей Иудиных?
12:20 См.: 🔗2Пар. 24:25	И восташа отроцы его, и совещаша всяк совет, и убиша Иоаса в доме Маллони, иже в Саале.
12:21 См.: 🔗2Пар. 24:27	И Иезехар сын Иемуафов, и Иезевуф сын Сомиров, раби его убиша его, и умре, и погребоша его со отцы его во граде Давидове. И воцарися Амессиа сын его вместо его.