Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 27 | |
27:1 См.: 🔗Чис. 36:2 | И пришедшя дщери Салпаада сына Оферова, сына Галаадова, сына Махирова, сонма Манассиина, сынов Иосифовых, и сия имена их: Маала и Нуа, и Егла и Мелха и Ферса, |
27:2 | и ставшя пред Моисеом и пред Елеазаром жерцем, и пред князи и пред всем сонмом у дверий скинии свидения, глаголаша: |
27:3 См.: 🔗Чис. 16:1 | отец наш умре в пустыни, и сей не бе среде сонма воставшаго на Господа в сонме Кореове, яко греха ради своего умре, и сынове не быша ему: |
27:4 | да не погибнет имя отца нашего от среды сонма своего, яко несть сына ему: дадите нам наследие посреде братии отца нашего. |
27:5 | И принесе Моисей суд их пред Господа. |
27:6 | И рече Господь к Моисею, глаголя: |
27:7 | право глаголаша дщери Салпаадовы: даяние да даси им одержание наследия посреде братий отца их, и да приложиши им жребий отца их: |
27:8 См.: 🔗Тов. 6:12 | и сыном Израилевым да речеши, глаголя: человек аще умрет, и не будет сына ему, дадите наследие его дщери его: |
27:9 | аще же дщери не будет ему, дадите наследие его брату его: |
27:10 | аще же не будут ему братия, дадите наследие брату отца его: |
27:11 | аще же не будут братия отца его, дадите наследие ужику ближнему его от племене его наследити яже его: и да будет сие сыном Израилевым оправдание суда, якоже заповеда Господь Моисею. |
27:12 См.: 🔗Втор. 32:48 | И рече Господь к Моисею: взыди на гору, яже об ону страну Иордана, сия гора Навав, и виждь землю Ханааню, юже Аз даю сыном Израилевым во одержание: |
27:13 | и узриши ю, и приложишися к людем своим и ты, якоже приложися Аарон брат твой на горе Ор: |
27:14 См.: 🔗Втор. 32:51 | понеже преступисте слово Мое в пустыни Син, внегда супротивитися сонму освятити Мя, не освятисте Мене у воды пред ними: сия есть вода Пререкания в Кадисе в пустыни Син. |
27:15 | И рече Моисей ко Господу: |
27:16 | да изберет Господь Бог духов и всякия плоти человека над сонмом сим, |
27:17 | иже изыдет пред лицем их, иже внидет пред лицем их, и иже изведет их и иже введет их, и да не будет сонм Господень, яко овцы не имущя пастыря. |
27:18 | И рече Господь к Моисею, глаголя: поими к себе Иисуса сына Навина, человека, иже имать Духа в себе: и да возложиши руце твои на него: |
27:19 | и поставиши его пред Елеазаром жерцем, и заповеждь ему пред всем сонмом, и заповеждь о нем пред ними: |
27:20 См.: 🔗Втор. 34:9 | и даси на него от славы твоея, яко да послушают его вси сынове Израилевы: |
27:21 См.: 🔗Исх. 28:30 | и пред Елеазаром жерцем да станет, и да вопросят от него суда явленных пред Господем: по словеси его да исходят, и по словеси его да входят сам и сынове Израилевы вкупе, и весь сонм. |
27:22 | И сотвори Моисей, якоже повеле ему Господь Бог: и взем Иисуса постави его пред Елеазаром жерцем и пред всем сонмом: |
27:23 | и возложи руце свои на него, и устрои его, якоже повеле Господь Моисею. |