Книга Числа, глава 11

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 11
11:1 См.: 🔗Чис. 21:4 🔗Лев. 10:2 🔗Пс. 77:21	И быша людие ропщуще злая пред Господем: и слыша Господь и разгневася гневом, и разгореся в них огнь от Господа и потреби часть некую от полка.
11:2 См.: 🔗Ам. 7:5	И возопиша людие к Моисею: и помолися Моисей к Господу, и преста огнь.
11:3 См.: 🔗Втор. 9:22	И прозвася имя месту тому Запаление: яко разгореся в них огнь от Господа.
11:4 См.: 🔗Исх. 12:38 🔗1Кор. 10:6	И общий народ иже в них похотеша похотением: и седше плакахуся сынове Израилевы и рекоша: кто ны напитает мясы?
11:5	Помянухом рыбы, яже ядохом в земли Египетстей туне, и огурцы и дыни, лук и червленый лук и чеснок:
11:6 См.: 🔗Чис. 21:5	ныне же душа наша изсохла, ничтоже точию манна пред очима нашима.
11:7 См.: 🔗Исх. 16:14 🔗Пс. 77:24 🔗Прем. 16:20 🔗Ин. 6:31 🔗1Кор. 10:3	Манна же бяше аки семя кориандрово, и вид ея яко вид кристалла:
11:8	и исхождаху людие и собираху, и меляху в жерновах и толцаху в ступах, и варяху в горшках и творяху из нея потребники: и бяше вкус ея, яко вкус муки пряжены с елеем:
11:9 См.: 🔗Исх. 16:14	и егда схождаше роса на полк нощию, схождаше манна нань.
11:10	И услыша Моисей плачущихся их в сонмех своих, коегождо их пред своими дверми: и разгневася Господь гневом зело, и пред Моисеом бяше зло.
11:11	И рече Моисей ко Господу: вскую озлобил еси раба Твоего? И почто не обретох благодати пред Тобою, еже возложити устремление людий сих на мя?
11:12 См.: 🔗Втор. 1:35	Еда аз во утробе зачах вся люди сия? Или аз родих я? Яко глаголеши ми: возми их в недра твоя, якоже доилица носит доимыя, в землю, еюже клялся еси отцем их:
11:13	откуду мне мяса дати всем людем сим? Яко плачут на мя, глаголюще: даждь нам мяса, да ядим:
11:14 См.: 🔗Втор. 1:19	не возмогу аз един водити людий сих, яко тяжко мне есть слово сие:
11:15 См.: 🔗Исх. 32:32	аще же тако Ты твориши мне, то убий мя убиением, аще обретох благодать пред Тобою, да не вижу озлобления моего.
11:16 См.: 🔗Исх. 18:21 🔗Чис. 16:25	И рече Господь к Моисею: собери Ми седмьдесят мужей от старец Израилевых, ихже ты сам веси, яко тии суть старцы людстии и книгочия их: и да приведеши я ко скинии свидения, и да станут тамо с тобою:
11:17 См.: 🔗1Кор. 12:4 🔗Исх. 18:26	и сниду и возглаголю тамо с тобою, и уйму от Духа, иже в тебе, и возложу на ня: да подимут с тобою устремление людий, и не будеши водити их ты един:
11:18 См.: 🔗Исх. 19:10	и людем речеши: очиститеся наутрие, и снесте мяса, яко плакастеся пред Господем, глаголюще: кто ны напитает мясы? Яко добро нам бысть во Египте: и даст Господь вам мяса ясти, и снесте мяса:
11:19	не един день ясти будете, ни два, ни пять дний, ни десять дний, ниже двадесять дний:
11:20 См.: 🔗Чис. 21:5	до месяца дний ясти будете, дондеже изыдет из ноздрий ваших: и будет вам в мерзость, яко не покористеся Господу, Иже есть в вас, и плакастеся пред Ним, глаголюще: вскую бе нам изыти из Египта?
11:21 См.: 🔗Чис. 20:10 🔗Мф. 14:15 🔗Ин. 6:5	И рече Моисей: шесть сот тысящ пеших людий, в нихже Аз есмь, и Ты рекл еси: мяса им дам ясти, и будут ясти месяц дний:
11:22 См.: 🔗Мф. 15:33 🔗Мк. 8:4	еда овцы и волы заколются им, и доволно будет им? Или вся рыбы морския соберутся им, и доволно будет им?
11:23 См.: 🔗Ис. 50:2 🔗Ис. 59:1	И рече Господь к Моисею: еда рука Господня не доволна будет? Ныне уразумееши, аще постигнет тя слово Мое, или ни.
11:24	И изыде Моисей и глагола людем словеса Господня: и собра седмьдесят мужей от старец людских, и постави я окрест скинии.
11:25 См.: 🔗Чис. 12:5 🔗1Цар. 10:6 🔗Иоил. 2:28	И сниде Господь во облаце и глагола к нему: и уя от Духа, иже на нем, и возложи на седмьдесят мужей старец: егда же препочи Дух на них, и пророчествоваша, и ктому не приложиша.
11:26	И осташася два мужа в полце: имя единому Елдад, и имя второму Модад: и препочи на них Дух. И сии беша от вписанных, и не приидоша ко скинии, и пророчествоваша в полце.
11:27	И притек юноша возвести Моисею, и рече, глаголя: Елдад и Модад пророчествуют в полцех.
11:28 См.: 🔗Чис. 13:9 🔗1Фес. 5:19	И отвещав Иисус Навин, предстояй Моисею избранный ему, рече господи мой Моисею, запрети им.
11:29	И рече ему Моисей: еда ревнуеши ты мне? И кто даст всем людем Господним (быти) пророки, егда даст Господь Духа Своего на них?
11:30	И иде Моисей в полк сам и старцы Израилтестии.
11:31 См.: 🔗Исх. 16:13 🔗Пс. 77:27 🔗Пс. 104:40 🔗Прем. 19:11	И дух изыде от Господа, и изведе крастели из моря и наведе на полк день ходу отсюду и день ходу отюнуду, окрест полка яко на два лактя от земли.
11:32	И воставше людие весь день и всю нощь, и весь день наутрие, и собраша крастели: иже мало, собра десять спуд: и иссушиша себе сушаницы окрест полка.
11:33 См.: 🔗Пс. 77:30	И мяса бяху им еще в зубех их, прежде оскудения, и Господь разгневася зело на люди, и порази Господь люди язвою великою зело:
11:34	и прозвася имя месту тому Гробы Похотения: яко тамо погребоша людий похотевших.
11:35 См.: 🔗Чис. 13:1 🔗Чис. 33:16	(И) воздвигошася людие от Гробов Похотения во Асироф, и быша людие во Асирофе.