Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 35 | |
35:1 См.: 🔗Исх. 34:32 | И собра Моисей весь сонм сынов Израилевых и рече к ним: сия словеса, яже глагола Господь творити я: |
35:2 См.: 🔗Исх. 20:9 🔗Исх. 31:14 | шесть дний сотвориши дела, в день же седмый почиеши, свята суббота, покой Господу: всяк творяй дело в ню, да умрет: |
35:3 См.: 🔗Исх. 16:23 | да не возгнетите огня во всех домех ваших в день субботный: Аз Господь. |
35:4 | И рече Моисей ко всему сонму сынов Израилевых, глаголя: сие слово, еже завеща Господь глаголя: |
35:5 См.: 🔗Исх. 25:2 | возмите от себе самих участие Господу: всяк по воли сердца своего да принесет начатки Господу, злато, сребро, медь, |
35:6 | синету, багряницу, червленицу сугубу спрядену, и виссон сканый и волну козию, |
35:7 | и кожы овни очервлены, и кожы сини, и древеса негниюща, |
35:8 | и елей во свещение, и фимиам в елей помазания, и в сложение фимиама: |
35:9 | и камени сардийски, и камени в ваяние на ризу верхнюю и на подир: |
35:10 | и всяк премудрый сердцем в вас шед да делает вся, елика заповеда Господь: |
35:11 См.: 🔗Исх. 25:8 | скинию и завесы, и покровы и разворы, и колки и вереи, и столпы и стояла: |
35:12 | и кивот свидения и носила его, и очистилище его и завесу, (и опоны двора, и столпы его, и камени смарагдовы, и фимиам и елей помазания,) |
35:13 См.: 🔗Исх. 25:23 | и трапезу и носила ея, и вся сосуды ея, и хлебы предложения, (и олтарь и вся сосуды его,) |
35:14 См.: 🔗Исх. 25:31 | и светилник света и вся сосуды его, и светила его и елей светилный, |
35:15 См.: 🔗Исх. 30:1 | и олтарь кадилный и носила его, и елей помазания, и фимиам сложения, и завесу дверий скинии, |
35:16 См.: 🔗Исх. 27:1 | и олтарь всесожжения, и огнище его медяно и носила его, и вся сосуды его, и умывалницу, и стояло ея, |
35:17 См.: 🔗Исх. 27:9 | и опоны двора, и столпы его и стояла его, и завесу дверий двора, |
35:18 | и колки скинии, и колки двора, и ужы их: |
35:19 См.: 🔗Исх. 28:2 | и ризы святыя Аарона жерца, и ризы, в нихже служити имут во святем, и ризы сыном Аароновым священства (и елей помазания, и фимиам сложения). |
35:20 | И изыде весь сонм сынов Израилевых от Моисеа. |
35:21 | И принесоша кийждо, яже возлюби сердце их, и якоже возмнеся души их, принесоша участие Господу на вся дела скинии свидения, и на вся сосуды ея, и на вся ризы святилища: |
35:22 См.: 🔗Чис. 18:18 | и принесоша мужие от жен своих, кийждо, якоже помысли умом, принесоша печати и усерязи, и перстни и пленицы, и мониста и всяк сосуд злат: и вси елицы принесоша участие злата Господу, |
35:23 | и всяк у негоже обретеся синета и багряница, и червленица и виссон, и кожы сини и кожы сини очервлены, (и кожы козия) принесоша: |
35:24 | всяк отделяяй участие, сребро и медь, принесоша участия Господу: и у нихже обретошася древеса негниющая, на вся соделования сосудов принесоша: |
35:25 См.: 🔗Прит. 31:19 | и всяка жена мудрая умом рукама прясти, принесе пряденая, синету и багряницу и червленицу и виссон: |
35:26 | и вся жены, имже возлюбися во уме их, хитростию спрядоша волну козию: |
35:27 | и князи принесоша камени смарагдовы и камени на совершение ризе верхней, и на слово, |
35:28 | и на сложение, и на елей помазания, и на сложение фимиама: |
35:29 | и всяк муж, или жена, имже наносяше ум их, вшедшим творити вся дела, елика заповеда Господь творити я Моисеом, принесоша сынове Израилевы участие Господу. |
35:30 См.: 🔗Исх. 31:2 | И рече Моисей сыном Израилевым: се, нарече Бог именем Веселеила сына Уриина, сына Орова, от племене Иудина, |
35:31 | и наполни его Духа Божия, премудрости и разума, и умений всех, |
35:32 | архитектонствовати во всех делесех древоделания, творити злато и сребро и медь, |
35:33 | и ваяти камени, и делати древо, и творити по всему делу премудрости: |
35:34 См.: 🔗Исх. 31:6 | и преуспевати даде во уме ему и Елиаву Ахисамахову, от племене Данова: |
35:35 | и наполни их премудрости, ума, еже разумети творити вся дела святыни, ткания и пестрения ткати червленицею и багряницею и виссоном, творити всякое дело художества различна. |