Четвёртая книга Царств (Вторая книга Царей), глава 22

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 22
22:1 См.: 🔗2Пар. 34:1	Сын осми лет бе Иосиа, егда нача царствовати, и тридесять едино лето царствова во Иерусалиме. Имя же матери его Иедида, дщи Едеева, от Васурофа.
22:2 См.: 🔗Сир. 49:4	И сотвори правое пред очима Господнима, и хождаше во всех путех Давида отца своего, не совратися ни на десно, ни на шуее.
22:3 См.: 🔗2Пар. 34:8	И бысть во осмоенадесять лето царства Иосиина, в седмый месяц, посла царь Сафана, сына Езелиина, сына Месолламля, книгочию дому Господня, глаголя:
22:4 См.: 🔗1Пар. 6:13 🔗2Пар. 34:9	взыди к Хелкии жерцу великому и запечатлей сребро внесеное в дом Господень, еже собраша стрегущии врат от людий,
22:5 См.: 🔗2Пар. 34:10	и да дадут е в руки творящих дела приставником в храме Господни: да дадят е творящым дела в дому Господни, еже подкрепляти разселины храма,
22:6	древоделем и каменосечцем и покупающым древа и камение тесаное на утверждение разселин храма.
22:7 См.: 🔗4Цар. 12:15	Обаче не сочисляху их о сребре даемем им, яко верно тии творяху.
22:8 См.: 🔗Втор. 31:26 🔗2Пар. 34:14	И рече Хелкиа жрец великий ко Сафану книгочию: книгу закона (Божия) обретох в дому Господни. И даде Хелкиа книгу Сафану, и прочте ю.
22:9 См.: 🔗2Пар. 34:16	И вниде в дом Господень и царю Иосии, и возвести царю слово и рече: слияша раби твои сребро обретшееся в дому Господни, и даша е приставницы в руки творящым дела в храме Господни.
22:10 См.: 🔗2Пар. 34:18	И рече Сафан книгочия к царю, глаголя книгу закона даде ми Хелкиа жрец. И прочте ю Сафан пред царем.
22:11	И бысть яко услыша царь словеса книги законныя, и раздра ризы своя,
22:12 См.: 🔗2Пар. 34:20 🔗Иер. 26:24	и заповеда царь Хелкии жрецу и Ахикаму сыну Сафаню, и Аховору сыну Михеину и Сафану книгочию и Асаию рабу цареву, глаголя:
22:13	приидите, испросите Господа о мне и о всех людех и о всем Иуде, и о словесех книги обретшияся сея, яко велик гнев Господень разжженый на нас, понеже не послушаша отцы наши словес книги сея, еже творити по всем написанным на ны.
22:14 См.: 🔗Иер. 26:24 🔗2Пар. 34:22	И иде Хелкиа жрец и Ахикам, и Аховор и Сафан и Асаиас ко Олдаме пророчице, жене Селима сына Фекуева, сына Араса ризохранителя: и сия живяше во Иерусалиме в масене: и глаголаша к ней по сему.
22:15 См.: 🔗2Пар. 34:23	И рече им: сице глаголет Господь Бог Израилев: рцыте мужеви пославшему вы ко мне:
22:16 См.: 🔗4Цар. 24:2 🔗2Пар. 34:24	тако глаголет Господь: се, Аз наведу злая на место сие и на живущыя в нем, вся словеса книжная, яже прочте царь Иудин:
22:17 См.: 🔗Втор. 31:29 🔗4Цар. 23:26 🔗Иер. 7:20	понеже оставиша Мя и кадяху богом другим, яко да прогневают Мя делесы рук своих, и разжжется ярость Моя на место сие и не угаснет:
22:18	и ко царю Иудину пославшему вас вопросити Господа, сице рцыте ему: тако глаголет Господь Бог Израилев: словеса, яже слышал еси,
22:19 См.: 🔗Иер. 24:9 🔗Иер. 44:12 🔗Ис. 38:5	за сия, яко умягчися сердце твое и смирился еси пред лицем Господним, услышав елика глаголах на место сие и на живущыя в нем, еже быти в погубление и в проклятие, и раздрал еси ризы твоя, и плакался предо Мною, и Аз убо услышах, глаголет Господь:
22:20 См.: 🔗Ис. 57:2 🔗4Цар. 23:30 🔗2Пар. 35:24	сего ради Аз приложу тя ко отцем твоим, и соберешися во гроб твой в мире, и не узриши очима твоима всех злых, яже Аз имам навести на место сие и на живущыя в нем.