Вторая книга Царств (Вторая книга Самуила), глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1 См.: 🔗2Цар. 9:2 🔗2Цар. 19:17	И Давид прейде мало что от роса, и се, Сива отрок Мемфивосфеов в сретение ему: и супруг ослят оседланых, и на них двести хлебов, и сто гроздий, и сто фиников, и мех вина.
16:2	И рече царь к Сиве: что сия тебе? И рече Сива: ослята на яждение дому цареву, а хлебы и финики на снедение отроком, и вино пити ослабевшым в пустыни.
16:3 См.: 🔗2Цар. 19:26	И рече царь: и где сын господина твоего? И рече Сива ко царю: се, седит во Иерусалиме, яко рече: днесь возвратят ми весь дом Израилев царство отца моего.
16:4 См.: 🔗2Цар. 19:29	И рече царь к Сиве: се, тебе вся елика суть Мемфивосфеова. И рече Сива поклонився: да обрящу благодать пред очима твоима, господи мой царю.
16:5 См.: 🔗2Цар. 3:16 🔗2Цар. 19:16 🔗3Цар. 2:8	И прииде Давид царь до Вафирима, и се, оттуду муж исхождаше от рода дому Сауля, имя же ему Семей сын Гирань: изыде же исходя и проклиная
16:6	и камением метая на Давида и на вся отроки царя Давида: и вси людие и вси сильнии одесную и ошуюю царя бяху.
16:7 См.: 🔗Пс. 5:7	И тако рече Семей проклиная его: изыди, изыди, мужу кровей и мужу беззаконный:
16:8	возврати на тя Господь вся крови дому Сауля, понеже воцарился еси вместо его: и даде Господь царство в руце Авессалома сына твоего: и се, ты в злобе твоей, яко муж кровей ты.
16:9 См.: 🔗2Цар. 19:21	И рече Авесса сын Саруин ко царю: почто проклинает пес умерший сей господина моего царя? Ныне пойду, и отиму главу его.
16:10 См.: 🔗Иов. 5:7	И рече царь ко Авессе: что мне и вам, сынове Саруины? Оставите его, и тако да проклинает, яко Господь рече ему проклинати Давида: и кто речет: почто сотворил еси тако?
16:11 См.: 🔗2Цар. 19:16 🔗Исх. 22:28	И рече Давид ко Авессе и ко всем отроком своим: се, сын мой изшедый из чрева моего ищет души моея, а кольми паче сын Иеминиев: оставите его проклинати мя, яко рече ему Господь:
16:12 См.: 🔗2Цар. 15:25	негли призрит Господь на смирение мое, и возвратит ми благая вместо клятвы Его во днешний день.
16:13 См.: 🔗3Цар. 2:8	И идяше Давид и вси мужие его путем: а Семей идяше со страны горы близ его идый и проклиная, и камением меща со страны его, и перстию сыпая.
16:14	И прииде царь и вси людие иже с ним утруждени, и препочиша ту.
16:15	Авессалом же и вси мужие Израилевы внидоша во Иерусалим, и Ахитофел с ним.
16:16 См.: 🔗2Цар. 15:37	И бысть егда прииде Хусий первый друг Давидов ко Авессалому: и рече Хусий ко Авессалому: да живет царь.
16:17	И рече Авессалом к Хусию: сия ли милость твоя со другом твоим? Почто не отшел еси со другом твоим?
16:18	И рече Хусий ко Авессалому: ни, но вслед (иду), егоже избра Господь и людие сии и вси мужие Израилевы, того есмь, и с тем буду:
16:19	и второе, кому аз поработаю? Не пред сыном ли его? Якоже работах пред отцем твоим, тако буду и пред тобою.
16:20	И рече Авессалом ко Ахитофелу: дадите себе совет, что сотворим?
16:21 См.: 🔗2Цар. 15:16	И рече Ахитофел ко Авессалому: вниди к подложницам отца твоего, яже остави стрещи дом свой, и услышат вси Израилтяне, яко посрамил еси отца твоего, и возмогут руки всех сущих с тобою.
16:22 См.: 🔗2Цар. 12:11	И поставиша Авессалому шатер на палате, и вниде Авессалом к подложницам отца своего пред очима всех Израилтян.
16:23 См.: 🔗2Цар. 15:31	И совет Ахитофелев, егоже совещаваше во дни первыя, имже образом вопросил бы кто Бога о словеси, тако всяк совет Ахитофелев, и иже Давиду, и иже Авессалому.