Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 21 | |
21:1 См.: 🔗2Пар. 33:1 | Сын дванадесяти лет Манассиа, егда нача царствовати, и пятьдесят пять лет царствова во Иерусалиме. Имя матере его Офовиа. |
21:2 См.: 🔗Втор. 18:9 🔗2Пар. 28:3 | И сотвори лукавое пред очима Господнима, и хождаше вслед мерзостей языков, ихже отрину Господь от лица сынов Израилевых: |
21:3 См.: 🔗2Пар. 33:3 | и обратися, и созда высокая, иже разори отец его Езекиа, и воздвиже жертвенник Ваалу, и сотвори дубравы, яже сотвори Ахаав царь Израилев, и поклонися всей силе небесней и поработа им: |
21:4 | и созда олтарь в дому Господни, якоже рече Господь: во Иерусалиме положу имя Мое. |
21:5 | И сотвори олтарь всей силе небесней на дву двору дому Господня: |
21:6 | и провождаше сыны своя чрез огнь, и вражаше, и волшвения творяше, и сотвори капища, и волшебницы умножи творити лукавое пред очима Господнима, еже прогневати Его: |
21:7 См.: 🔗3Цар. 9:3 | и постави изваяное Дубравы в храме, о немже рече Господь к Давиду и к Соломону сыну его: в храме сем и во Иерусалиме, егоже избрах от всех колен Израилевых, и положу ту имя Мое на веки, |
21:8 См.: 🔗2Пар. 33:8 | и не приложу подвигнутися нозе Израилеве от земли, юже дах отцем их, аще тии соблюдут вся елика заповедах, по всей заповеди, юже заповеда им раб Мой Моисей. |
21:9 См.: 🔗2Пар. 33:9 | И не послушаша, и прельсти их Манассиа, еже сотворити лукавое пред очима Господнима паче язык, яже истреби Господь от лица сынов Израилевых. |
21:10 См.: 🔗2Пар. 33:18 | И глагола Господь рукою рабов Своих пророков, глаголя: |
21:11 См.: 🔗4Цар. 24:3 | за сия, елика сотвори Манассиа царь Иудин мерзости сия лукавыя, паче всех яже сотвориша Аморрее, иже прежде сего быша, и введе во грех и Иуду, в кумирех своих: |
21:12 См.: 🔗1Цар. 3:11 🔗Иер. 19:3 | не тако: сице глаголет Господь Бог Израилев: се, Аз наведу злая на Иерусалим и на Иуду, яко всякому слышащему пошумят обоя уха его, |
21:13 | и простру на Иерусалим меру Самарийскую и весы дому Ахаавля: и истреблю Иерусалима, якоже изглаждается алавастр изглаждаемый и превращается в лице свое: |
21:14 | и изрину останки достояния Моего и предам их в руки врагов их, и будут в расхищение и в плен всем врагом своим: |
21:15 См.: 🔗Иер. 15:4 | понеже сотвориша лукавое пред очима Моима и быша прогневляюще Мя от дне, в оньже изведох отцы их от земли Египетския, и до дне сего. |
21:16 См.: 🔗4Цар. 24:4 🔗Иез. 22:4 | Еще же кровь неповинную излия Манассиа многу зело, дондеже наполни Иерусалиму уста до уст, кроме грехов его, имиже во грех введе Иуду, сотворити лукавое пред очима Господнима. |
21:17 См.: 🔗2Пар. 33:18 | И прочая словес Манассииных, и вся елика сотвори, и грех его, имже согреши, не сия ли написана в книзе словес дний царей Иудиных? |
21:18 См.: 🔗2Пар. 33:20 | И успе Манассиа со отцы своими, и погребен бысть в вертограде дому своего, в вертограде Озы. И воцарися Аммон сын его вместо его: |
21:19 См.: 🔗2Пар. 33:21 | сын двадесяти дву лет бе Аммон, егда нача царствовати и два лета царствова во Иерусалиме. Имя же матери его Месоллам, дщи Арусова из Иетевы. |
21:20 См.: 🔗2Пар. 33:22 | И сотвори лукавое пред очима Господнима, якоже сотвори Манассиа отец его, |
21:21 | и хождаше по всему пути, имже ходи отец его, и поработа кумиром, имже поработа отец его, и поклонися им: |
21:22 См.: 🔗3Цар. 11:33 | и остави Господа Бога отец своих, и не ходи путем Господним. |
21:23 См.: 🔗4Цар. 12:20 | И восташа отроцы Аммоновы нань и умертвиша царя в дому его. |
21:24 См.: 🔗4Цар. 14:5 🔗2Пар. 33:25 | Людие же земли (тоя) избиша всех воставших на царя Аммона, и воцариша людие земли тоя Иосию сына его вместо его. |
21:25 См.: 🔗2Пар. 33:21 | И прочая словес Аммоновых, елика сотвори, не се ли, сия написана и в книзе словес дний царей Иудиных? |
21:26 См.: 🔗2Пар. 33:25 | И погребоша его во гробе его в вертограде Озине. И воцарися Иосиа сын его вместо его. |