Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 19 | |
19:1 См.: 🔗3Цар. 18:40 | И возвести Ахаав Иезавели жене своей вся, елика сотвори Илиа, и яко изби пророки оружием. |
19:2 См.: 🔗3Цар. 2:23 🔗3Цар. 20:10 | И посла Иезавель ко Илии и рече: аще ты еси Илиа, аз же Иезавель: сия да сотворят ми бози и сия да приложат ми, яко в сей же час утро положу душу твою, якоже душу единаго от них. |
19:3 См.: 🔗Быт. 21:31 | И убояся Илиа, и воста, и отиде души ради своея, и прииде в Вирсавию землю Иудину, и остави отрочище свое тамо, |
19:4 | сам же иде в пустыню дне путь, и прииде, и седе под смерчием, и проси души своей смерти, и рече: довлеет ныне (ми), возми убо от мене душу мою, Господи, яко несмь аз лучший отец моих. |
19:5 | И ляже, и успе под садом: и се, Ангел Господень коснуся ему и рече ему: востани, яждь и пий. |
19:6 | И воззре Илиа: и се, у возглавия его опреснок ячменный и чванец воды. И воста, и яде и пи, и возвратився успе. |
19:7 | И обратися Ангел Господень вторицею, и коснуся ему, и рече ему: востани, яждь и пий, яко мног от тебе путь. |
19:8 | И воста, и яде и пи: и иде в крепости яди тоя четыредесять дний и четыредесять нощей до горы Божия Хорив. |
19:9 См.: 🔗3Цар. 18:9 | И вниде тамо в пещеру, и вселися в ней. И се, глагол Господень к нему и рече: что ты зде, Илие? |
19:10 См.: 🔗Рим. 11:3 | И рече Илиа: ревнуя поревновах по Господе (Бозе) Вседержители, яко оставиша Тя сынове Израилевы: олтари Твоя раскопаша, и пророки Твоя избиша оружием, и остах аз един, и ищут души моея изяти ю. |
19:11 | И рече: изыди утро и стани пред Господем в горе: и се, мимо пойдет Господь, и дух велик и крепок разоряя горы и сокрушая камение в горе пред Господем, (но) не в дусе Господь: и по дусе трус, и не в трусе Господь: |
19:12 | и по трусе огнь, и не во огни Господь: и по огни глас хлада тонка, и тамо Господь. |
19:13 См.: 🔗Исх. 3:6 | И бысть яко услыша Илиа, покры лице свое милотию своею, и изыде и ста пред вертепом. И се, к нему бысть глас и рече: что ты зде, Илие? |
19:14 | И рече Илиа: ревнуя поревновах по Господе Бозе Вседержители, яко оставиша завет Твой сынове Израилевы, и олтари Твоя раскопаша, и пророки Твоя избиша оружием, и остах аз един, и ищут души моея изяти ю. |
19:15 | И рече Господь к нему: иди, возвратися путем своим, и изыдеши на путь пустыни Дамасковы, и помажеши Азаила на царство Сирийское, |
19:16 См.: 🔗4Цар. 9:1 🔗Сир. 48:8 | и Ииуа сына Намессиина помажеши на царство над Израилем, и Елиссеа сына Сафатова от Авелмаула помажеши вместо себе пророка: |
19:17 См.: 🔗4Цар. 9:24 🔗2Пар. 22:8 | и будет спасаемаго от оружия Азаилева убиет Ииуй, и спасаемаго от оружия Ииуина убиет Елиссей: |
19:18 См.: 🔗Рим. 11:4 | и оставиши во Израили седмь тысящ мужей, вся колена, яже не преклониша колена Ваалу, и всяка уста, яже не молишася ему. |
19:19 См.: 🔗4Цар. 1:8 🔗Зах. 13:4 | И иде оттуду, и обрете Елиссеа сына Сафатова, и сей оряше двеманадесятьма супругома волов пред ним, и той сам по двоюнадесяти супруг. И прииде Илиа к нему, и поверже милоть свою на него. |
19:20 | И остави Елиссей волы, и тече вслед Илии, и рече: (молю тя,) да облобыжу отца моего и матерь мою, и иду вслед тебе. И рече ему Илиа: иди, возвратися, яко сотворих тебе. |
19:21 См.: 🔗1Цар. 6:14 | И возвратися от него: и взя супруги волов, и закла, и испече я в сосудех воловных, и даде людем, и ядоша. И воста, и иде вслед Илии, и служаше ему. |