Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 2 | |
2:1 См.: 🔗Дан. 9:2 | И устави Господь слово Свое, еже глагола на нас и на судий наших, судивших во Израили, и на цари нашя и на князи нашя, и на всякаго человека Израилева и Иудина, |
2:2 См.: 🔗Втор. 28:53 | навести на ны зло велие, еже не сотворися под всем небесем, якоже сотворися во Иерусалиме, по писанным в законе Моисеове, |
2:3 | еже ясти нам плоть человеческу сына своего и плоть человеческу дщере своея. |
2:4 | И даде я подручны всем царствам, яже окрест нас, на укоризну и в непрохождение во всех людех, иже окрест нас, аможе их разсея Господь. |
2:5 | И быхом во исподи, а не в верху, яко согрешихом Господеви Богу нашему, не слушающе гласа Его. |
2:6 См.: 🔗Вар. 1:15 🔗Дан. 9:7 | Господеви Богу нашему правда, нам же и отцем нашым стыдение лиц, якоже день сей. |
2:7 | Иже глагола Господь на нас вся злая, сия приидоша на ны, |
2:8 | зане не молихомся лицу Господню, еже отвратитися комуждо от мыслей сердца своего злаго. |
2:9 См.: 🔗Дан. 9:14 | И убудися Господь о злобах и наведе на нас сия, (яже постигоша ны,) яко праведен Господь во всех делех Своих, яже заповеда нам. |
2:10 См.: 🔗Лев. 26:14 | И не послушахом гласа Его ходити в повелениих Его, яже даде пред лицем нашим. |
2:11 См.: 🔗Дан. 9:15 | И ныне, Господи Боже Израилев, иже извел еси люди Твоя из земли Египетския рукою крепкою и мышцею высокою, знамении и чудесы и силою великою, и сотворил еси Себе имя, якоже день сей, |
2:12 См.: 🔗Дан. 9:5 | согрешихом, нечествовахом, неправдовахом, Господи Боже наш, во всех оправданиих Твоих. |
2:13 См.: 🔗Дан. 9:16 | Да отвратится убо от нас ярость Твоя, яко остася нас мало во языцех, аможе разсеял ны еси. |
2:14 | Услыши, Господи, молитву нашу и прошение наше, и избави нас Тебе ради, и даждь нам благодать пред лицем преселивших нас: |
2:15 | да увесть вся земля, яко Ты Господь Бог наш, и яко имя Твое призвася на Израили и на племени его. |
2:16 См.: 🔗Втор. 26:15 🔗Ис. 63:15 | Господи, призри из дому святаго Твоего на нас и вонми нам, и приклони ухо Твое и услыши нас. |
2:17 | Отверзи, Господи, очи Твои и виждь, яко не умершии, иже во аде, ихже взяся дух их от утроб их, воздадят Тебе славу и оправдание Господеви: |
2:18 См.: 🔗Мф. 5:6 | но душа сетующая о величестве зла, иже ходит слячен и боляй, и очи оскудевающии, и душа алчущая воздадят Тебе славу и правду, Господи! |
2:19 См.: 🔗Дан. 9:18 | Яко не по оправданием отец наших, ни царей наших (изливаем молитвы) мы, и предлагаем молитвы нашя пред лицем Твоим, Господи Боже наш! |
2:20 | Яко послал еси ярость Твою и гнев Твой на нас, якоже глаголал еси рукою отрок Твоих пророк, глаголя: |
2:21 См.: 🔗Иер. 27:12 | тако рече Господь: приклоните рамена ваша и послужите царю Вавилонскому, и седите на земли, юже дах отцем вашым: |
2:22 См.: 🔗Иер. 38:2 | и аще не послушаете гласа Господня, еже работати царю Вавилонску, оскудение сотворю из градов Иудиных и внеуду Иерусалима, |
2:23 | и отиму (от вас) глас веселия и глас радования, глас жениха и глас невесты, и будет вся земля в непрохождение от живущих. |
2:24 См.: 🔗Иер. 27:17 | И не послушахом гласа Твоего служити царю Вавилонску: и уставил еси словеса Твоя, яже глаголал еси рукою отрок Твоих пророков, еже изнести кости царей наших и кости отец наших от места их. |
2:25 | И се, суть извержены зною дневному и студени нощней, и изомроша болезньми злыми, гладом и мечем и затчением. |
2:26 | И положил еси дом Твой, в немже наречеся имя Твое, якоже день сей, злобы ради дому Израилева и дому Иудина. |
2:27 | И сотворил еси в нас, Господи Боже наш, по всей тихости Твоей и по всем щедротам Твоим великим, |
2:28 См.: 🔗Лев. 26:3 | якоже глаголал еси рукою раба Твоего Моисеа в день, в оньже заповедал еси ему вписати закон Твой пред сыны Израилевыми, глаголя: |
2:29 См.: 🔗Лев. 26:33 | аще не послушаете гласа Моего, множество сие великое и многое обратится в мал язык во языцех, аможе Аз разсею я: |
2:30 См.: 🔗Втор. 9:13 🔗Лев. 26:41 | разумех бо, яко не имут послушати Мене, яко людие жестоковыйни суть, и обратятся к сердцу своему на земли преселения своего, |
2:31 См.: 🔗Втор. 30:6 | и уведят, яко Аз Господь Бог их: и дам им сердце, (и уразумеют,) и ушы, и услышат, |
2:32 | и похвалят Мя на земли преселения своего, и помянут имя Мое, |
2:33 | и обратятся от хребта своего жестокаго и от злоб своих, яко помянут путь отец своих согрешивших пред Господем: |
2:34 | и возвращу я на землю, еюже кляхся отцем их, Аврааму и Исааку и Иакову, и возобладают ею: и умножу я, и не умалятся: |
2:35 См.: 🔗Иер. 32:38 | и уставлю им завет вечен, еже быти Мне им в Бога, и тии будут Мне людие: и не подвигну ктому людий Моих Израиля и земли, юже дах им. |