Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 9 | |
9:1 См.: 🔗Ис. 22:4 🔗Иер. 14:17 | Кто даст главе моей воду и очесем моим источник слез? И плачуся день и нощь о побиенных дщере людий моих. |
9:2 См.: 🔗Иер. 7:9 | Кто даст мне в пустыни виталище последнее? И оставлю люди моя и отиду от них: понеже вси любодействуют, соборище преступников. |
9:3 | И налякоша язык свой яко лук: лжа и неверство укрепишася на земли, ибо от злых во злая произыдоша и Мене не познаша, рече Господь. |
9:4 См.: 🔗Мих. 7:5 🔗Мф. 10:36 | Кийждо от искренняго своего да стрежется, и на братию свою не уповайте, ибо всяк брат запинанием запнет, и всяк друг льстивно наскочит. |
9:5 См.: 🔗Пс. 63:4 | Кийждо другу своему посмеется, истины не возглаголют: научиша язык свой глаголати лжу, неправдоваша и не восхотеша обратитися. |
9:6 См.: 🔗Ос. 4:1 | Лихва на лихву и лесть на лесть: не восхотеша уведети Мене, рече Господь. |
9:7 См.: 🔗Ис. 1:25 🔗Ис. 48:10 | Сего ради тако глаголет Господь Сил: се, Аз разжегу их и искушу их: что бо ино сотворю от лица лукавства дщери людий Моих? |
9:8 | Стрела уязвляющая язык их, льстивии глаголы уст их: приятелю своему глаголет мирная, внутрь же себе имеет вражду. |
9:9 См.: 🔗Иер. 5:9 | Еда на сих не посещу? Рече Господь: или людем таковым не отмстит душа Моя? |
9:10 | На горах восприимите плачь и тужение и на стезях пустыни рыдание, яко оскудеша, за еже не быти человеком преходящым: не слышаша гласа обитания от птиц небесных и даже до скотов, ужасошася, отидоша. |
9:11 | И дам Иерусалим в преселение и в жилище змием и грады Иудины положу в разорение, яко не будет обитающаго. |
9:12 | Кто муж премудр, и уразумеет сие? И к немуже слово уст Господних, да возвестит вам, чесо ради погибе земля, сожжена есть яко пустыня, еяже никтоже проходит? |
9:13 См.: 🔗Втор. 29:25 | И рече Господь ко мне: понеже оставиша закон Мой, егоже дах пред лицем их, и не послушаша гласа Моего и не ходиша по нему, |
9:14 См.: 🔗Ис. 65:2 🔗Вар. 1:22 | но поидоша по изволению сердца своего лукаваго и вслед идолов, имже научиша их отцы их: |
9:15 См.: 🔗Иер. 8:14 🔗Иер. 23:15 | сего ради тако глаголет Господь Сил, Бог Израилев: се, Аз напитаю люди сия теснотами и в питие дам им воду желчную, |
9:16 См.: 🔗Лев. 26:33 | и расточу их во языки, ихже не знаша тии и отцы их, и послю на них мечь, дондеже истлятся. |
9:17 См.: 🔗Ам. 5:16 | Сия рече Господь Сил: призовите плачевниц, и да приидут, и ко женам премудрым послите, и да вещают |
9:18 См.: 🔗Иер. 13:17 | и да приимут над вами плачь, и да изведут очи ваши слезы, и вежди ваши да излиют воду: |
9:19 | зане глас плача слышан бысть во Сионе: како бедни быхом, постыждени зело, яко оставихом землю и отринухом жилища наша? |
9:20 | Темже слышите, жены, слово Господне, и приимите ушима вашима словеса уст Его, и научите дщери вашя рыданию, и каяждо искреннюю свою плачу: |
9:21 | понеже взыде смерть сквозе окна ваша и вниде в землю вашу погубити отрочата отвне и юношы от стогн. |
9:22 См.: 🔗Иер. 7:33 | (Глаголи:) сия рече Господь: и будут мертвии человецы в пример на лицы поля земли вашея, яко сено созади жнущаго, и не будет собирающаго. |
9:23 См.: 🔗1Кор. 1:31 | Тако глаголет Господь: да не хвалится мудрый мудростию своею, и да не хвалится крепкий крепостию своею, и да не хвалится богатый богатством своим: |
9:24 См.: 🔗Ин. 17:3 🔗Иер. 22:16 | но о сем да хвалится хваляйся, еже разумети и знати, яко Аз есмь Господь творяй милость и суд и правду на земли, яко в сих воля Моя, глаголет Господь. |
9:25 | Се, дние грядут, глаголет Господь, и посещу на всех, иже обрезаную имут плоть свою: |
9:26 См.: 🔗Деян. 7:51 🔗Рим. 2:28 | на Египет и на Идумею, и на Едом и на сыны Аммони, и на сыны Моавли и на всякаго остризающаго власы по лицу своему, обитающыя в пустыни, яко вси языцы необрезани плотию, весь же дом Израилев необрезани суть сердцы своими. |