Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 9 | |
9:1 | Истину глаголю о Христе, не лгу, послушествующей ми совести моей Духом Святым, |
9:2 | яко скорбь ми есть велия и непрестающая болезнь сердцу моему: |
9:3 См.: 🔗Исх. 32:32 | молил бых ся бо сам аз отлучен быти от Христа по братии моей, сродницех моих по плоти, |
9:4 | иже суть Израилите, ихже всыновление и слава, и завети и законоположение, и служение и обетования: |
9:5 | ихже отцы, и от нихже Христос по плоти, сый над всеми Бог благословен во веки, аминь. |
9:6 См.: 🔗Чис. 23:19 🔗Рим. 3:3 | Не такоже, яко отпаде слово Божие: не вси бо сущии от Израиля, сии Израиль, |
9:7 См.: 🔗Быт. 21:12 🔗Евр. 11:18 | ни зане суть семя Авраамле, вси чада: но во Исааце, рече, наречется ти семя. |
9:8 См.: 🔗Гал. 4:28 | Сиречь, не чада плотская, сия чада Божия: но чада обетования причитаются в семя. |
9:9 См.: 🔗Быт. 18:10 | Обетования бо слово сие: на сие время прииду, и будет Сарре сын. |
9:10 См.: 🔗Быт. 25:21 | Не точию же, но и Ревекка от единаго ложа Исаака отца нашего имущи: |
9:11 | еще бо не рождшымся, ни сотворившым что благо или зло, да по избранию предложение Божие пребудет |
9:12 См.: 🔗Быт. 25:23 | не от дел, но от Призывающаго, речеся ей, яко болий поработает меншему, |
9:13 См.: 🔗Мал. 1:2 | якоже есть писано: Иакова возлюбих, Исава же возненавидех. |
9:14 См.: 🔗Втор. 32:4 | Что убо речем? Еда неправда у Бога? Да не будет. |
9:15 См.: 🔗Исх. 33:19 | Моисеови бо глаголет: помилую, егоже аще помилую, и ущедрю, егоже аще ущедрю. |
9:16 | Темже убо ни хотящаго, ни текущаго, но милующаго Бога. |
9:17 См.: 🔗Исх. 9:16 🔗Исх. 14:4 | Глаголет бо Писание фараонови: яко на истое сие воздвигох тя, яко да покажу тобою силу Мою и да возвестится имя Мое по всей земли. |
9:18 | Темже убо, егоже хощет, милует: а егоже хощет, ожесточает. |
9:19 См.: 🔗Ис. 46:10 🔗Иер. 49:19 | Речеши убо ми: чесо ради еще укоряет, воли бо Его кто противитися может? |
9:20 См.: 🔗Ис. 29:16 🔗Ис. 45:9 | Темже убо, о, человече, ты кто еси, против отвещаяй Богови? Еда речет здание создавшему е: почто мя сотворил еси тако? |
9:21 См.: 🔗Иер. 18:4 🔗2Тим. 2:20 | Или не имать власти скудельник на брении, от тогожде смешения сотворити ов убо сосуд в честь, ов же не в честь? |
9:22 См.: 🔗Рим. 2:4 | Аще же хотя Бог показати гнев Свой и явити силу Свою, пренесе во мнозе долготерпении сосуды гнева совершены в погибель: |
9:23 См.: 🔗Рим. 8:28 | и да скажет богатство славы Своея на сосудех милости, яже предуготова в славу, |
9:24 См.: 🔗Рим. 3:29 | ихже и призва нас не точию от Иудей, но и от язык: |
9:25 См.: 🔗Ос. 2:23 🔗1Пет. 2:10 | якоже и во Осии глаголет: нареку не люди Моя люди Моя, и невозлюбленую возлюблену: |
9:26 См.: 🔗Ос. 1:10 | и будет, на месте, идеже речеся им: не людие Мои есте вы, тамо нарекутся сынове Бога живаго. |
9:27 | Исаиа же вопиет о Израили: аще будет число сынов Израилевых яко песок морский, останок спасется: |
9:28 См.: 🔗Ис. 10:22 | слово бо скончавая и сокращая в правде, яко слово сокращено сотворит Господь на земли, |
9:29 См.: 🔗Ис. 1:9 🔗Быт. 19:24 | и якоже прорече Исаиа: аще не бы Господь Саваоф оставил нам семене, якоже Содом убо были быхом, и якоже Гоморру уподобилися быхом. |
9:30 См.: 🔗Рим. 10:20 | Что убо речем, яко языцы, не гонящии правду, постигоша правду, правду же, яже от веры: |
9:31 См.: 🔗Рим. 11:7 | Израиль же, гоня закон правды, в закон правды не постиже. |
9:32 | Чесо ради? Зане не от веры, но от дел закона: преткнушася бо о камень претыкания, |
9:33 | якоже есть писано: се, полагаю в Сионе камень претыкания и камень соблазна: и всяк веруяй в Онь не постыдится. |