Книга Премудрости Иисуса, сына Сирахова, глава 28 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 28
28:1 См.: 🔗Втор. 32:35 🔗Рим. 12:19	Отмщаяй от Господа обрящет отмщение, и грехи своя соблюдаяй соблюдет.
28:2 См.: 🔗Мф. 6:14	Остави обиду искреннему твоему, и тогда помольшутися, греси твои разрешатся.
28:3	Человек на человека сохраняет гнев, а от Господа ищет изцеления:
28:4 См.: 🔗Мф. 6:15	над человеком подобным себе не имать милости, а о гресех своих молится:
28:5	сам сый плоть, хранит гнев: кто очистит грехи его?
28:6 См.: 🔗Сир. 7:39	Помяни последняя и престани враждовати, (помяни) истление и смерть и пребывай в заповедех.
28:7 См.: 🔗Лев. 19:18	Помяни заповеди и не гневайся на ближняго,
28:8	и завет Вышняго и презирай невежество.
28:9	Удаляйся от свара и умалиши грехи:
28:10	человек бо яр разжизает свар, и муж грешник возмятет други и посреде мирных вложит клевету.
28:11 См.: 🔗Прит. 26:21	Яково вещество огня, тако возгорится: якова крепость свара, такожде и огнь разгорится:
28:12 См.: 🔗Прит. 17:11	якова крепость человеча, такожде ярость его будет, и якоже богатство его, возвысит гнев свой.
28:13	Рвение скорое возжигает огнь, и свар наглый проливает кровь.
28:14 См.: 🔗Прит. 11:12	Аще подуеши на искру, возгорится: и аще плюнеши на ню, угаснет: обоя же изо уст твоих исходят.
28:15	Шепотника и двоязычника подобает клясти: многих бо мирных погубиша.
28:16 См.: 🔗Прит. 16:28 🔗Прит. 17:20	Язык трегубый многи потрясе и разлучи я от языка во язык,
28:17	и грады тверды разори и домы вельможей преврати:
28:18	язык трегубый жены доблия изгна и лиши я от трудов их:
28:19	внемляй ему не имать обрести покоя, ниже вселится со безмолвием.
28:20 См.: 🔗Прит. 18:7 🔗Иер. 9:8	Язва бичная струпы творит, язва же язычная сокрушает кости.
28:21	Мнози падоша острием меча, но не якоже падшии языком:
28:22	блажен, иже укрыется от него, иже не пройде в ярости его, иже не повлече ига его и узами его не связан бысть:
28:23	иго бо его иго железно, и узы его узы медяны:
28:24	смерть люта смерть его, и паче его лучше есть ад.
28:25	Не обладает благоверными, и в пламени его не сгорят.
28:26	Оставляющии Господа впадутся в онь, и в них возгорится и не угаснет: послан будет на ня яко лев, и яко пард погубит я.
28:27	Виждь, огради стяжание твое тернием,
28:28	сребро твое и злато твое свяжи,
28:29 См.: 🔗Иак. 3:3	и словесем твоим сотвори вес и меру, и устам твоим сотвори дверь и завору.
28:30	Внимай, да не како поползнешися им, ниже падеши прямо ловящему.