Первая книга Паралипоменон (Первая книга Хроник, Первая Летопись), глава 10

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 10
10:1 См.: 🔗1Цар. 31:1	Филистими же воеваша противу Израиля, и бежаша мужие Израилевы от лица иноплеменническа и падоша ранени на горе Гелвуи.
10:2	И погнаша иноплеменницы вслед Саула и вслед сынов его: и убиша иноплеменницы Ионафана и Аминадава и Мелхисуа, сынов Сауловых.
10:3	И отягчися брань на Саула, и обретоша его стрелцы в луках и в трудех, и изнеможе от стрел.
10:4 См.: 🔗1Цар. 31:4 🔗Суд. 9:54	И рече Саул к носящему оружие его: извлецы мечь твой и прободи мя им, да не когда приидут необрезаннии сии и поругаются мне. И не восхоте носяй оружие его, яко убояся зело. И взя Саул мечь и нападе нань.
10:5	И виде носяй оружие его, яко умре Саул, и нападе и он на мечь свой и умре.
10:6	И умре Саул и три сына его в день он: и весь дом его купно умре.
10:7 См.: 🔗1Цар. 31:7	И видеша вси мужие Израилевы, иже во юдоли, яко побежа Израиль, и яко умре Саул и сынове его, и оставиша грады своя и побегоша: и приидоша иноплеменницы и вселишася в них.
10:8	И бысть заутра, и приидоша иноплеменницы совлачати падших корысти, и обретоша Саула и сынов его падших на горе Гелвуи:
10:9	и обнажиша его, и взяша главу его и оружие его, и послаша в землю иноплеменничу, да обносится (и покажется) идолом их и людем:
10:10 См.: 🔗1Цар. 31:10	оружия же их положиша в капищи бога своего: и главу его поткнуша в капищи Дагонове.
10:11 См.: 🔗Суд. 21:8 🔗1Цар. 31:11	И услышаша вси живущии во Иависе Галаадстем вся, яже Филистими сотвориша Саулу и сыном его и Израилю:
10:12 См.: 🔗1Цар. 31:13 🔗2Цар. 2:5	и восташа от Галаада вси мужие крепцыи, и приидоша и взяша труп Саулов и труп сынов его, и принесоша их во Иавис, и погребоша кости их под дубом во Иависе: и постишася седмь дний.
10:13 См.: 🔗1Цар. 15:23 🔗1Цар. 28:8	И умре Саул за беззакония своя, имиже беззаконнова Господеви по словеси Господню, понеже не сохрани, яко вопроси Саул волшебницы еже вопросити, и отвеща ему Самуил пророк.
10:14 См.: 🔗1Цар. 16:13 🔗2Цар. 12:7	И не взыска Господа Саул: сего ради уби его и возврати царство его Давиду сыну Иессееву.