Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 8 | |
8:1 См.: 🔗1Пар. 18:1 | И бысть по сих, и порази Давид иноплеменники и победи их, и взя Давид отлученное от руки иноплеменничи. |
8:2 | И порази Давид Моава, и размери их ужами, положив их на земли: и быша два ужа на умерщвление, и два ужа на оживление: и бысть Моав Давиду в раба дающа дань. |
8:3 См.: 🔗3Цар. 11:23 | И порази Давид Адраазара сына Раава царя Сувска, идущу ему поставити руку свою на реце Евфрате: |
8:4 См.: 🔗2Цар. 10:18 | и предвзя Давид от него тысящу колесниц и седмь тысящ конник и двадесять тысящ мужей пешцев, и разруши Давид вся колесницы, и остави себе от них сто колесниц. |
8:5 См.: 🔗2Цар. 10:6 | И прииде Сириа Дамаскова помощи Адраазару царю Сувску, и порази Давид от Сирии двадесять две тысящы мужей, |
8:6 См.: 🔗1Пар. 18:6 | и постави Давид стражу в Сирии, яже под Дамаском, и бысть Сириа Давиду в рабы дающыя дань: и спасе Господь Давида во всех, аможе хождаше. |
8:7 См.: 🔗2Пар. 12:2 | И взя Давид гривны златыя, яже быша на отроцех Адраазара царя Сувска, и принесе я во Иерусалим: и взя их Сусаким царь Египетск, егда взыде во Иерусалим во дни Ровоама сына Соломоня. |
8:8 См.: 🔗1Пар. 18:8 | И от Метевака и от избранных градов Адраазаровых взя Давид медь многу зело, из неяже сотвори Соломон море медяно и столпы, и умывалницы и вся сосуды. |
8:9 См.: 🔗1Пар. 18:9 | И услыша Фоа царь Имафский, яко порази Давид всю силу Адраазарову, |
8:10 | и посла Фоа Иеддурама сына своего к царю Давиду вопросити его яже о мире, и благословити его, понеже победи Адраазара и уби его, зане сопротивляяся бе Адраазару: и в руку его быша сосуды сребряны и сосуды златы и сосуды медяны: |
8:11 См.: 🔗1Пар. 18:11 | и сия освяти царь Давид Господу со сребром и златом, еже освяти от всех градов, имиже возоблада, |
8:12 | от Идумеи и от Моава, и от сынов Аммоних и от иноплеменник, и от Амалика и от корыстей Адраазара сына Раава, царя Сувска. |
8:13 См.: 🔗1Пар. 18:12 | И сотвори Давид (себе) имя: и егда возвращашеся, порази Идумею в Гевелеме, до осминадесять тысящ: |
8:14 См.: 🔗1Пар. 18:13 | и постави во Идумеи Давид стражу, во всей Идумеи, и быша вси Идумеане раби царю Давиду: и спасе Господь Давида во всех, аможе хождаше. |
8:15 См.: 🔗1Пар. 18:14 | И царствова Давид над всем Израилем, и бе Давид творяй суд и правду над всеми людьми своими. |
8:16 См.: 🔗2Цар. 20:23 🔗1Пар. 18:15 | И Иоав сын Саруин над воинствы (его), и Иосафат сын Ахилудов над памятописанми, |
8:17 См.: 🔗1Пар. 6:12 🔗1Пар. 9:11 | и Садок сын Ахитов и Ахимелех сын Авиафарь жерцы, и Саса книжник, |
8:18 | и Ванеа сын Иодаев советник, и Хелефий и Фелетий, и сынове Давидовы началницы двора быша. |