Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 28 | |
28:1 См.: 🔗4Цар. 16:2 | Сын двадесяти и пяти лет бе Ахаз, егда царствовати нача, и шестьнадесять лет царствова во Иерусалиме: и не сотвори правое пред Господем, якоже Давид отец его. |
28:2 См.: 🔗4Цар. 16:3 | И пойде по путем царей Израилевых: ибо и изваянная сотвори, |
28:3 | и идолом их пожре в земли Веенномли и проведе сынов своих сквозе огнь по мерзостем языков, ихже потреби Господь от лица сынов Израилевых: |
28:4 См.: 🔗Втор. 12:2 | и кадяше на высоких и на холмех и под всяким древом дубравным. |
28:5 См.: 🔗4Цар. 16:5 | И предаде его Господь Бог его в руце царя Сирска и порази его, и плени от них плен мног, и приведе в Дамаск, и в руки царя Израилева предаде его, и порази его язвою великою. |
28:6 | И уби Факей сын Ромелиев царь Израилев от Иуды во един день сто двадесять тысящ мужей крепких силою, егда оставиша Господа Бога отец своих. |
28:7 | И уби Зехрий муж силен от Ефрема Маасию сына царева и Езрикама началника дому его и Елкана наместника царева. |
28:8 | Плениша же сынове Израилевы от братии своих триста тысящ жен, сынов и дщерей: и плен мног плениша от них, и принесоша корысти в Самарию. |
28:9 См.: 🔗2Пар. 15:1 🔗1Езд. 9:7 | И бе тамо пророк Господень, именем Одид, иже изыде во сретение воем грядущым в Самарию и рече им: се, гнев Господа Бога отец ваших противу Иуды, и предаде их в руки вашя, и убисте их во гневе, и даже до небесе достиже (ваше немилосердие): |
28:10 См.: 🔗Лев. 25:42 🔗Втор. 15:9 | и ныне сынов Иудиных и Иерусалимлих вы глаголете покорити в рабы и рабыни: не се ли, аз есмь с вами, свидетелствовати Господу Богу вашему? |
28:11 | И ныне послушайте мене и возвратите плен, егоже пленисте от братий ваших, яко гнев ярости Господни на вас. |
28:12 | И восташа началницы от сынов Ефремлих, Азариа сын Иоанан и Варахиа сын Васаллимофов, и Езекиа сын Селлумов и Амасиа сын Елдаев на грядущих от брани, |
28:13 См.: 🔗Чис. 18:5 🔗Нав. 22:20 | и рекоша им: не введите плена семо к нам, зане согрешим Господу, вы хощете приложити ко грехом нашым и к безумию нашему, велик бо грех наш, и гнев ярости Господни на Израили. |
28:14 | И оставиша воини плен и корысти пред началники и пред всем множеством. |
28:15 См.: 🔗Втор. 15:13 🔗Втор. 34:3 | И восташа мужие реченнии по имени и взяша плененых, и всех нагих облекоша от корыстей, и одеяша их и обуша их, и даша ясти и пити им и помазатися, и всадиша на подяремника всякаго немощнаго, и отвезоша их во Иерихон град финический ко братии их, и возвратишася в Самарию. |
28:16 См.: 🔗4Цар. 16:7 | Во время оно посла царь Ахаз ко царю Ассурску, прося помощи себе и в том, |
28:17 | понеже Идумеане нападоша и поразиша Иуду и плениша плен: |
28:18 См.: 🔗4Цар. 18:8 | и иноплеменницы нападоша на грады напольныя и от полуденныя Иудеи и взяша Вефсамис, и яже в дому Господни, и яже в дому царстем, и князей, и даша царю Аилон и Гадироф, и Сохоф и веси его, и Гамзон и веси его, и Фамну и веси ея, и вселишася тамо. |
28:19 См.: 🔗Иер. 15:4 🔗Исх. 32:25 | Яко смири Господь Иудею ради Ахаза царя Иудина, понеже отступи отступлением от Господа. |
28:20 | И прииде на него Фелгафелласар царь Ассурский, и озлоби его, и пресели, иже бяху в Дамасце, в Мидию, из Сирии же пресели в Дамаск пребывати. |
28:21 См.: 🔗4Цар. 16:8 🔗Иер. 2:36 | И взя Ахаз сущая в дому Господни и яже в дому царстем и у началников, и даде царю Ассурску: и не бысть на помощь ему, но токмо к печали его. |
28:22 | И приложи отступити от Господа и рече царь Ахаз: |
28:23 См.: 🔗4Цар. 16:10 | взышу богов Дамасковых биющих мя. И рече: бози царя Сирска, тии укрепляют их, сим убо пожру, и будут ми в помощь. Тии же быша к падению его и всего Израиля. |
28:24 См.: 🔗4Цар. 16:4 | И остави Ахаз сосуды дому Господня и сокруши их, и заключи врата дому Божия, и сотвори себе требища во всех углех Иерусалима, |
28:25 | и во всех градех Иудиных сотвори высокая, еже кадити богом чуждим, и разгнева Господа Бога отец своих. |
28:26 См.: 🔗4Цар. 16:1 | Прочая же словеса его и деяния его первая и последняя, се, писана суть в книзе царей Иудиных и Израилевых. |
28:27 См.: 🔗4Цар. 16:20 🔗Ис. 14:28 | И успе Ахаз со отцы своими, и погребоша его во граде Давидове, ибо не внесоша его во гробы царей Израилевых. И воцарися Езекиа сын его вместо его. |