Книга Премудрости Соломона, глава 6 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 6
6:1	Слышите убо, царие, и разумейте: научитеся, судии концев земли:
6:2	внушите, содержащии множества и гордящиися о народех языков:
6:3 См.: 🔗Сир. 17:14 🔗1Пет. 2:13 🔗Рим. 13:1 🔗Тит. 3:1	яко дана есть от Господа держава вам и сила от Вышняго, иже истяжет дела ваша и помышления испытает:
6:4 См.: 🔗Рим. 13:4	яко слузи суще царства Его не судисте право, ни сохранисте закона, ниже по воли Божией ходисте.
6:5 См.: 🔗Ис. 2:17	Страшно и скоро явится вам: яко суд жесточайший преимущым бывает,
6:6	ибо малый достоин есть милости, сильнии же сильне истязани будут.
6:7 См.: 🔗Втор. 10:17 🔗Кол. 3:25 🔗2Пар. 19:7 🔗Иов. 34:19 🔗Сир. 35:12 🔗Деян. 10:34 🔗1Пет. 1:17 🔗Рим. 2:11 🔗Гал. 2:6 🔗Еф. 6:9	Не щадит бо лица всех Владыка, ниже усрамится вельможи, яко мала и велика Сей сотвори, подобне же проразумевает о всех:
6:8	державным же крепко настоит испытание.
6:9	К вам убо, о, царие, словеса моя, да научитеся премудрости и не падете:
6:10	ибо сохраняющии преподобне преподобная преподобни будут, и иже научившиися сим, обрящут ответ.
6:11	Возжелейте убо словес моих, возлюбите и накажитеся.
6:12 См.: 🔗Прит. 8:17 🔗Сир. 24:23	Светла и не увядаема есть премудрость, и удобно видится от любящих ю, и обрящется от ищущих ю:
6:13	предваряет желающым предуведетися.
6:14 См.: 🔗Прит. 1:20 🔗Рим. 10:6	Утреневавый к ней не утрудится: приседящую бо обрящет при вратех своих.
6:15	Еже бо мыслити о ней, разума (есть) совершенство, и бдяй ея ради вскоре без печали будет:
6:16 См.: 🔗Мф. 4:18 🔗Мф. 10:11	яко достойных ея сама обходит ищущи, и на стезях показуется им благоприятно, и во всем провидении сретает их.
6:17 См.: 🔗Прит. 4:7	Начало бо ея истиннейшее наказания возжеление,
6:18 См.: 🔗Ин. 14:15	попечение же наказания любы, любы же хранение законов ея,
6:19 См.: 🔗Иак. 4:8	хранение же законов утверждение нерастления (есть), нерастление же творит близ быти Бога:
6:20	возжеление убо премудрости возводит к царству (вечному).
6:21 См.: 🔗2Цар. 14:11 🔗3Цар. 3:9 🔗Прит. 29:14	Аще убо наслаждаетеся престолами и скиптры, о, царие людий, почтите премудрость, да во веки царствуете.
6:22	Что же есть премудрость, и како бысть, возвещу,
6:23 См.: 🔗Прит. 4:11	и не утаю от вас таин, но от начала рождения изслежду,
6:24	и положу на свет разум ея и не преминую истины,
6:25 См.: 🔗Иак. 3:16	ниже завистию тающему спутьствую, яко сей не будет причастник премудрости.
6:26 См.: 🔗Прит. 11:14	Множество же премудрых спасение миру, и царь премудр утверждение людем.
6:27	Сего ради приимите наказание по словесем моим, и полезно будет вам.