Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 21 | |
21:1 См.: 🔗3Цар. 18:45 | И бысть по глаголех сих, и виноград един бе у Навуфеа Иезраилитянина при гумне Ахаава царя Самарийска. |
21:2 См.: 🔗Лев. 25:14 🔗Втор. 11:10 | И рече Ахаав к Навуфею, глаголя: даждь ми виноград твой, и будет ми во вертоград зелий, яко близ есть сей дому моего, и дам ти вместо сего виноград ин добр паче сего: аще же угодно пред тобою, дам ти сребро измену винограда сего, и будет ми во вертоград зелий. |
21:3 | И рече Навуфей ко Ахааву: да не будет мне от Господа Бога моего дати наследие отец моих тебе. |
21:4 | И прииде Ахаав в дом свой смущен и оскорблен о словеси, еже глагола к нему Навуфей Иезраилитянин, и рече: не дам тебе наследия отец моих. И бысть дух Ахаавль смущен, и успе на одре своем и покры лице свое и не яде хлеба. |
21:5 | И вниде Иезавель жена его к нему и рече к нему: что дух твой есть смущен, и не яси ты хлеба? |
21:6 | И рече к ней (Ахаав): яко глаголах Навуфею Иезраилитянину глаголя: даждь ми виноград твой за сребро: и аще хощеши, дам ти виноград ин вместо его: и рече: не дам ти наследия отец моих. |
21:7 См.: 🔗Мф. 6:24 | И рече к нему Иезавель жена его: ты ли ныне твориши тако, царю Израилев? Востани и яждь хлеб и молча буди, аз же дам ти виноград Навуфеа Иезраилитянина. |
21:8 | И написа книгу на имя Ахаавле, и запечата ю печатию его, и посла книгу к старейшинам и свободным живущым с Навуфеем. |
21:9 | И писано бяше в книзе тако: поститеся постом и посадите Навуфеа и в начале людий: |
21:10 См.: 🔗2Цар. 19:21 🔗Иов. 1:5 | и посадите два мужа сыны законопреступных противу ему, и да засвидетелствуют о нем, глаголюще, яко (не) благослови Бога и царя: и да изведут его и побиют камением, и да умрет. |
21:11 | И сотвориша тако мужие града его старейшии и свободнии живущии во граде его, якоже посла к ним Иезавель, и якоже писано бяше в книгах, яже посла к ним: |
21:12 | и нарекоша пост, и посадиша Навуфеа в начале людий, |
21:13 | и приидоста два мужа сынове законопреступных и седоста противу его, и засвидетелствоваша на него мужие отступницы Навуфеовы пред людьми, глаголюще: сей (не) благослови Бога и царя. И изведоша его вон из града и побиша его камением, и умре. |
21:14 | И послаша ко Иезавели, глаголюще: камением побиен бысть Навуфей и умре. |
21:15 См.: 🔗Иов. 24:6 | И бысть егда услыша Иезавель глаголющих, яко побиен Навуфей и умре, и рече Иезавель ко Ахааву: востани, наследуй виноград Навуфеа Иезраилитянина, иже не взя у тебе сребра, и уже несть Навуфей жив, но умре. |
21:16 | И бысть егда услыша Ахаав, яко убиен бысть Навуфей Иезраилитянин, и раздра ризы своя и облечеся во вретище. И бысть по сих, и воста и сниде Ахаав в виноград Навуфеа Иезраилитянина наследити его. |
21:17 | И рече Господь ко Илии Фесвитянину, глаголя: |
21:18 | востани и сниди на сретение Ахааву царю Израилеву, иже в Самарии, се бо, сей в винограде Навуфееве, яко сниде тамо наследити его: |
21:19 См.: 🔗3Цар. 22:38 | и речеши ему, глаголя: сице глаголет Господь: понеже ты убил еси (Навуфеа) и приял еси в наследие (виноград его), сего ради тако глаголет Господь: на месте, идеже полизаша свинии и пси кровь его, тамо полижут и кровь твою, и блудницы измыются в крови твоей. |
21:20 См.: 🔗4Цар. 17:17 | И рече Ахаав ко Илии: обрел ли еси мя, враже мой? И рече Илиа: обретох: понеже ты всуе продан еси сотворити лукавое пред Господем, во еже разгневати Его: |
21:21 См.: 🔗4Цар. 9:8 | сице глаголет Господь: се, Аз наведу на тя злая и попалю задняя твоя, и искореню Ахаавля мочащагося к стене, и содержимыя и оставшихся во Израили: |
21:22 См.: 🔗3Цар. 15:29 | и предам дом твой якоже дом Иеровоама сына Наватова, и якоже дом Ваасы сына Ахиина, о прогневаниих, имиже прогневал Мя еси, и грешити сотворил еси Израиля. |
21:23 См.: 🔗4Цар. 9:36 | И ко Иезавели рече Господь, глаголя: пси снедят ю в предградии Иезраеля: |
21:24 См.: 🔗3Цар. 14:11 🔗3Цар. 16:4 | умершаго Ахаавля во граде снедят пси, и умершаго его на поли снедят птицы небесныя: |
21:25 См.: 🔗3Цар. 21:20 | и в суете ты еси, Ахааве, иже продан бысть сотворити лукавое пред Господем, яко преврати его Иезавель жена его. |
21:26 См.: 🔗Лев. 26:30 | И омерзися зело, еже ходити вслед мерзостей, яже сотвори Аморрей, егоже истреби Господь от лица сынов Израилевых. |
21:27 | И бысть егда услыша Ахаав словеса сия, умилися от лица Господня, и идяше плачася, и раздра ризы своя, и препоясася вретищем по телу своему и постися: и бе облечен во вретище от дне, в оньже уби Навуфеа Иезраилитянина, и хождаше скорбен. |
21:28 | И бысть глагол Господень рукою раба его Илии о Ахааве, |
21:29 См.: 🔗2Пар. 12:7 | и рече Господь: видел ли еси, яко умилися Ахаав от лица Моего? Сего ради не наведу зла во днех его: но во днех сына его наведу зло на дом его. |