Книга Премудрости Иисуса, сына Сирахова, глава 48 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 48
48:1 См.: 🔗Иер. 5:14 🔗Ин. 5:35	И воста Илиа пророк яко огнь, и слово его яко свеща горяше:
48:2	иже нанесе на ня глад и ревностию своею умали я,
48:3 См.: 🔗3Цар. 17:1	словом Господним удержа небо и сведе тако трижды огнь с небесе.
48:4 См.: 🔗3Цар. 18:38 🔗4Цар. 1:10	Коль прославился еси, Илие, чудесы твоими, и кто подобен тебе похвалитися?
48:5 См.: 🔗3Цар. 17:22	Воздвигнув мертвеца от смерти и из ада словом Вышняго,
48:6 См.: 🔗3Цар. 21:19 🔗4Цар. 5:4	сведый цари в пагубу и прославленныя от одра их,
48:7 См.: 🔗3Цар. 21:19	слышавый в Синаи обличение и в Хориве судбы отмщения,
48:8 См.: 🔗3Цар. 19:16	помазуяй цари на воздаяние и пророки преемники по себе,
48:9 См.: 🔗4Цар. 2:11	взявыйся вихром огненным на колеснице коней огненных,
48:10 См.: 🔗Мал. 4:6	вписан во обличения на времена, утолити гнев прежде ярости и обратити сердце отчее к сыну и устроити колена Иаковля.
48:11	Блажени видевшии тя и любовию украшеннии.
48:12	Ибо мы житием поживем.
48:13 См.: 🔗4Цар. 2:11	Илиа, иже вихром покровен бысть, и Елиссей исполнися духа его и во дни своя не поколебася от князей, и не преможе его никтоже:
48:14 См.: 🔗4Цар. 13:21	всяко слово не превзыде его, и во успении пророчествова тело его:
48:15 См.: 🔗4Цар. 2:14 🔗4Цар. 13:21	и в житии своем сотвори чудеса, и во умертвии дивна дела его.
48:16	Во всех сих не покаяшася людие и не отступиша от грех своих, дондеже пленени быша от земли своея и расточени быша по всей земли.
48:17	И остася людий мало, и князь в дому Давидове.
48:18	Нецыи убо от них сотвориша угодное, нецыи же умножиша грехи.
48:19 См.: 🔗4Цар. 20:20	Езекиа утверди град свой и введе посреде его воду: ископа железом камень и созда источники водам.
48:20 См.: 🔗4Цар. 18:13 🔗2Пар. 32:1 🔗Ис. 36:1	Во днех его взыде Сеннахирим и посла Рапсака, и воздвиже руку свою на Сиона и возвеличися гордынею своею.
48:21	Тогда подвигошася сердца и руце их, и поболеша яко раждающыя.
48:22	И помолишася Господу милостивому, воздевше руки своя к Нему:
48:23	и Святый с небесе скоро услыша я и избави я рукою Исаииною:
48:24 См.: 🔗4Цар. 19:35 🔗Ис. 37:36 🔗1Мак. 7:41 🔗2Мак. 15:22	порази полки Ассирийския, и сокруши я Ангел Его.
48:25	Сотвори бо Езекиа угодное Господеви и укрепися на путех Давида отца своего, яже заповеда Исаиа, пророк велий и верен в видении своем.
48:26 См.: 🔗4Цар. 20:9 🔗2Пар. 32:24 🔗Ис. 38:8	Во днех его воспятися солнце, и приложи жития цареви:
48:27	духом велиим виде последняя и утеши сетующыя в Сионе:
48:28	даже до века показа будущая и сокровеная, прежде неже приити им.