Книга Числа, глава 15

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 15
15:1	И рече Господь к Моисею, глаголя:
15:2	глаголи сыном Израилевым и речеши к ним: егда внидете в землю вселения вашего, юже Аз даю вам,
15:3 См.: 🔗Лев. 7:16 🔗Исх. 29:18	и сотворите принос Господу во всесожжение или жертву, еже возвеличити мольбу, или благовольну, или в праздники вашя в воню благовония Господу, аще убо от волов, или от овец:
15:4 См.: 🔗Лев. 2:5 🔗Исх. 16:36	и да принесет приносяй дар свой Господу жертву, муки пшеничны десятую часть ефи (меры), вмешены в елей четвертыя части ина (меры):
15:5	и вина на возлияние четвертую часть ина сотворите во всесожжение или в жертву: агнцу единому да сотвориши толико, принос воню благовония Господу.
15:6	И овну, егда творите его во всесожжение или в жертву, да сотвориши жертву муки пшеничны две десятины вмешаны в елеи, третию часть ина (меры):
15:7	и вина на возлияние третию часть ина принесете в воню благовония Господу.
15:8	Аще же творите от волов во всесожжение или в жертву, еже возвеличити мольбу, или во спасителное Господу,
15:9	и принесет с телцем принос муки пшеничны три десятины вмешаны в елей, пол ина (меры):
15:10	и вина на возлияние пол ина (меры), принос в воню благовония Господу.
15:11	Тако да сотвориши телцу единому, или овну единому, или агнцу единому от овец или от коз:
15:12	по числу их, яже аще сотворите, тако сотворите единому по числу их.
15:13 См.: 🔗Лев. 1:17 🔗Лев. 3:5	Всяк туземец да сотворит тако сицевая принести приношения в воню благовония Господу:
15:14	аще же пришлец в вас прибудет в земли вашей, или иже аще будет в вас в родех ваших, и сотворит принос в воню благовония Господу, якоже творите вы, тако да сотворит.
15:15 См.: 🔗Исх. 12:49 🔗Лев. 24:22 🔗Чис. 9:14	Сонме Господнь, закон един да будет вам и пришелцем прилежащым в вас, закон вечный в роды вашя: якоже вы, (тако) и пришлец да будет пред Господем:
15:16 См.: 🔗Втор. 1:16	закон един да будет и оправдание едино да будет вам и пришелцу прилежащему в вас.
15:17	И рече Господь к Моисею, глаголя:
15:18	глаголи сыном Израилевым и речеши к ним: егда внидете в землю, в нюже Аз ввожду вас тамо,
15:19 См.: 🔗Исх. 23:15	и будет егда ясте от хлебов земли (тоя), отложите участие во отделение Господу: начаток теста вашего,
15:20 См.: 🔗Неем. 10:37 🔗Лев. 23:10	хлеб отлучите участие оное: якоже участие от гумна,
15:21	тако отделите той хлеб, начаток теста вашего, и дадите Господу участие в роды вашя.
15:22 См.: 🔗Лев. 4:13	Егда же согрешите и не сотворите всех заповедий сих, ихже глагола Господь Моисею,
15:23	якоже повеле Господь Бог к вам рукою Моисеовою, от дне в оньже повеле Господь к вам, и потом в роды вашя,
15:24 См.: 🔗Лев. 4:13	и будет аще от очес сонма сотворится неволею, и да сотворит весь сонм телца единаго непорочна от волов во всесожжение, в воню благовония Господу, и жертву сего, и возлияние его по уставлению, и козла единаго от коз греха ради:
15:25	и да помолится жрец от всем сонме сынов Израилевых, и оставится им, яко нехотение есть: и сии принесоша дар свой, принесение Господу греха ради своего пред Господем, нехотений ради своих,
15:26	и оставится всему сонму сынов Израилевых и пришелцу прилежащему в вас, яко всем людем нехотенное.
15:27 См.: 🔗Лев. 4:27	Аще же душа едина не хотящи согрешит, да приведет козу едину единолетну греха ради:
15:28	и да помолится жрец о души нехотевшей и согрешшей нехотением пред Господем, и да помолится о ней, и оставится ей.
15:29 См.: 🔗Исх. 12:49 🔗Лев. 24:22	Населнику (земли) сынов Израилевых и пришелцу прилежащему в них, закон един да будет им, иже аще сотворит не хотящь.
15:30	И душа яже сотворит рукою гордости от туземец или от пришелцев, Бога сия разгневает, и потребится душа та от людий своих:
15:31	яко слово Господне презре и заповеди Его разсыпа, сотрением да сотрется душа та: и грех ея на ней.
15:32 См.: 🔗Исх. 20:8	И бяху сынове Израилевы в пустыни, и обретоша мужа собирающа дрова в день субботный,
15:33	и приведоша его обретшии собирающа дрова в день субботный к Моисею и Аарону и ко всему сонму сынов Израилевых,
15:34 См.: 🔗Лев. 24:12	и ввергоша его в темницу: не совещаша бо, что сотворят ему.
15:35	И рече Господь к Моисею, глаголя: смертию да умрет человек сей, да побиете его камением весь сонм вне полка.
15:36 См.: 🔗Нав. 7:25	И изведоша его весь сонм вне полка, и побиша его камением весь сонм вне полка, якоже глагола Господь Моисею.
15:37	И рече Господь к Моисею, глаголя:
15:38 См.: 🔗Втор. 22:12 🔗Мф. 23:5	глаголи сыном Израилевым и речеши им: и да сотворят себе рясны на воскрилиих риз своих в роды своя: и возложите на рясны воскрилий прядение синее,
15:39	и будет вам на ряснах: и узрите их, и воспомянете вся заповеди Господни и сотворите я, и не развратитеся вслед мыслей своих и вслед очес ваших, имиже вы соблудисте вслед их:
15:40 См.: 🔗Мф. 15:3	яко да помянете и сотворите вся заповеди Моя, и будете святи Богу вашему:
15:41 См.: 🔗Исх. 20:2 🔗Лев. 11:45 🔗Быт. 17:7	Аз Господь Бог ваш, изведый вас из земли Египетския, быти вам Бог: Аз Господь Бог ваш.