Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 22 | |
22:1 | И седе три лета, и не бе брани между Сириею и между Израилем. |
22:2 См.: 🔗2Пар. 18:2 | И бысть в лето третие, и сниде Иосафат царь Иудин к царю Израилеву. |
22:3 См.: 🔗3Цар. 4:13 🔗3Цар. 20:34 | И рече царь Израилев ко отроком своим: весте ли, яко моя есть Реммафа Галаадская, и мы молчим взяти ю от руки царя Сирийска? |
22:4 См.: 🔗2Пар. 18:3 🔗4Цар. 3:7 | И рече царь Израилев ко Иосафату: взыдеши ли с нами в Реммафу Галаадскую на брань? И рече Иосафат: якоже аз, такожде и ты: якоже людие мои, людие твои: якоже кони мои, кони твои. |
22:5 См.: 🔗2Пар. 18:4 | И рече Иосафат царь Иудин к царю Израилеву: вопросите убо днесь Господа. |
22:6 См.: 🔗2Пар. 18:5 | И собра царь Израилев вся пророки яко четыреста мужей, и рече царь им: взыду ли в Реммафу Галаадскую на брань, или оставлю? И реша: взыди, яко дая предаст Господь в руки царевы. |
22:7 См.: 🔗2Пар. 18:6 | И рече Иосафат к царю Израилеву: несть ли зде пророка Господня, и вопросили быхом Господа им? |
22:8 | И рече царь Израилев ко Иосафату: еще есть един муж на вопрошение им Господа, и аз возненавидех его, яко не глаголет о мне добре, но злая, Михеа сын Иемвлаань. И рече царь Иосафат Иудин: не глаголи, царю, тако. |
22:9 | И призва царь Израилев скопца единаго и рече: скоро иди по Михею сына Иемвлааня. |
22:10 | Царь же Израилев и Иосафат царь Иудин седяста кийждо на престоле своем вооружени во вратех Самарийских, и вси пророцы прорицаху пред ними. |
22:11 См.: 🔗2Пар. 18:10 🔗Иер. 28:14 | И сотвори себе Седекиа сын Ханаань рога железна и рече: тако глаголет Господь: сими рогами избодеши Сирию, дондеже скончается. |
22:12 | И вси пророцы прорицаху тако, глаголюще: взыди в Реммафу Галаадскую, и наставит тя, и предаст Господь в руце твои царя Сирийскаго. |
22:13 См.: 🔗2Пар. 18:12 | И посол шед призвати Михею, рече ему, глаголя: се, ныне вси пророцы усты едиными глаголют добрая о цари, буди убо и ты в словесех твоих по словесем единаго от сих и глаголи добрая. |
22:14 См.: 🔗Иер. 23:28 🔗Иер. 42:4 | И рече Михеа: жив Господь, яко яже речет Господь ко мне, сия возглаголю. |
22:15 См.: 🔗2Пар. 18:14 | И прииде ко царю. И рече ему царь: Михее, взыду ли в Реммафу Галаадскую на брань, или оставлю? И рече ему: взыди, и благопоспешит Господь в руки царевы. |
22:16 См.: 🔗2Пар. 18:15 | И рече ему царь: еще аз дважды заклинаю тя, да речеши истину пред Господем. |
22:17 См.: 🔗Чис. 27:17 🔗2Пар. 18:16 | И рече Михеа: не тако: видех всего Израиля разсеяна по горам якоже стада, имже несть пастыря: и рече Господь: не Господь ли сим в Бога? Да возвратится кийждо в дом свой с миром. |
22:18 См.: 🔗2Пар. 18:17 | И рече царь Израилев ко Иосафату царю Иудину: не рех ли тебе, яко не проричет сей ми добрая, но токмо злая? |
22:19 | И рече Михеа: не тако: не аз: слыши глагол Господень: не тако: видех Господа Бога Израилева седящаго на престоле Своем, и все воинство небесное стояше окрест Его одесную Его и ошуюю Его: |
22:20 | и рече Господь: кто прельстит Ахаава царя Израилева, и взыдет и падет в Реммафе Галаадстей? И рече сей тако, и сей тако: |
22:21 См.: 🔗2Пар. 18:20 🔗Иов. 1:6 | и изыде дух, и ста пред Господем, и рече: аз прельщу и: |
22:22 | и рече к нему Господь: в чем? И рече: изыду и буду дух лжив во устех всех пророк его: и рече: прельстиши и возможеши: изыди и сотвори тако: |
22:23 См.: 🔗2Фес. 2:11 | и се, ныне даде Господь дух лжив во уста всех пророк твоих сих, и Господь глагола на тя злая. |
22:24 См.: 🔗2Пар. 18:23 🔗Иер. 20:2 | И приступи Седекиа сын Ханаань, и порази Михею в лице и рече: каковый сей прейде Дух Господень от мене, еже глаголати в тебе? |
22:25 См.: 🔗2Пар. 18:24 | И рече Михеа: се, ты узриши в день он, егда внидеши в ложницу сокровища твоего, еже скрытися ту. |
22:26 | И рече царь Израилев: поимите Михею, и возвратите его ко Аммону князю града и ко Иоасу сыну цареву, |
22:27 См.: 🔗3Цар. 20:11 🔗Пс. 79:6 | и рцыте, да посадят его в темницу, и да кормят его хлебом печальным и водою печальною, дондеже возвращуся в мире. |
22:28 | И рече Михеа: аще возвращаяся возвратишися в мире, то не глагола Господь мною. И рече: слышите, людие вси. |
22:29 См.: 🔗2Пар. 18:28 | И взыде царь Израилев и Иосафат царь Иудин с ним в Реммафу Галаадскую. |
22:30 См.: 🔗2Пар. 18:29 | И рече царь Израилев ко Иосафату царю Иудину: прикрый мя, и вниду в сечь, и ты облецыся в ризу мою. И прикрыся царь Израилев и вниде в сечь. |
22:31 | Царь же Сирский заповеда князем колесниц своих тридесятим и двум, глаголя: не бийтеся ни с великим ни с малым, но токмо с царем Израилевым единым. |
22:32 См.: 🔗2Пар. 18:31 | И бысть егда узреша воеводы колесниц Иосафата царя Иудина, и реша: видится царь Израилев сей. И обступиша его еже сразитися с ним: и возопи Иосафат. |
22:33 | И бысть егда узреша воеводы колесниц, яко несть царь Израилев той, и возвратишася от него: |
22:34 См.: 🔗2Пар. 18:33 | и наляче лук един муж приметно, и порази царя Израилева между легким и щитом. И рече (царь) всаднику своему: обрати руки твоя, и изведи мя от брани, яко язвен есмь. |
22:35 См.: 🔗3Цар. 20:42 🔗2Пар. 18:34 | И умножися брань в той день, и царь бе стоя на колеснице противу Сириан от утра даже до вечера, и лияшеся кровь из язвы в недра колесницы, и умре в вечер, и изливашеся кровь от язвы даже до недр колесницы. |
22:36 | И ста проповедник о западе солнца, глаголя: кийждо вас да идет во свой град и во свою землю, яко умре царь. |
22:37 | И приидоша в Самарию, и погребоша в Самарии царя. |
22:38 См.: 🔗3Цар. 21:19 | И омыша кровь с колесницы на источнице Самарийстем, и полизаша свинии и пси кровь его, и блудницы измышася в крови его, по глаголу Господню, егоже глагола. |
22:39 См.: 🔗Ам. 3:15 🔗2Пар. 18:2 | Прочая же словес Ахаавлих, и вся яже сотвори, и храм слоновый, егоже созда, и вся грады, яже сотвори, не се ли, сия писана быша в книзе словес дний царей Израилевых? |
22:40 | И успе Ахаав со отцы своими, и воцарися Охозиа сын его вместо его. |
22:41 См.: 🔗2Пар. 17:1 | И Иосафат сын Асы воцарися над Иудою в четвертое лето Ахаава царя Израилева. |
22:42 | Иосафат сын тридесяти пяти лет (бе), егда нача царствовати, и двадесять пять лет царствова во Иерусалиме. Имя же матери его Азува, дщи Салаиля. |
22:43 См.: 🔗3Цар. 15:14 🔗2Пар. 15:17 | И хождаше по всем путем Асы отца своего, не уклонися от него, творя правое пред очима Господнима, токмо высоких не разори: еще людие жряху и кадяху на высоких. |
22:44 См.: 🔗2Пар. 19:2 | И умирися Иосафат с царем Израилевым. |
22:45 См.: 🔗2Пар. 18:1 | Прочая же словес Иосафатовых, и силы его, елика сотвори, не се ли, писана суть в книзе словес дний царей Иудиных? |
22:46 См.: 🔗3Цар. 15:12 | И прочее мерзости, еже остася во дни Асы отца его, отя от земли. |
22:47 См.: 🔗2Цар. 8:14 🔗3Цар. 11:17 | И царя не бе во Едоме поставленнаго. |
22:48 См.: 🔗3Цар. 9:28 🔗2Пар. 20:36 | Царь же Иосафат сотвори корабли Фарсийския, еже ити во Офир по злато, но не поидоша, зане сокрушишася корабли во Асеон – Гавере. |
22:49 См.: 🔗2Пар. 19:2 | Тогда рече Охозиа сын Ахаавль ко Иосафату: да идут раби мои с рабы твоими в кораблех. И не восхоте Иосафат. |
22:50 См.: 🔗2Пар. 21:1 | И умре Иосафат со отцы своими, и погребен бысть у отец своих во граде Давида отца своего. И воцарися Иорам сын его вместо его. |
22:51 | И Охозиа сын Ахаавов воцарися над Израилем в Самарии, в лето седмоенадесять Иосафата царя Иудина, и царствова над Израилем в Самарии лета два, |
22:52 См.: 🔗3Цар. 15:26 | и сотвори лукавое пред Господем, и нача ходити по путем отца своего Ахаава и по пути Иезавели матере своея, и во гресех дому Иеровоама сына Наватова, иже введе во грех Израиля: |
22:53 См.: 🔗Суд. 2:11 | и поработа Ваалу, и поклонися ему, и разгнева Господа Бога Израилева, по всем бывшым прежде его. |