Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 4 | |
4:1 | Аще обратишися, Израилю, глаголет Господь, ко Мне обратися: и аще отимеши мерзости твоя от уст твоих, и от лица Моего убоишися, |
4:2 | и кленешися, живет Господь, во истине и в суде и в правде, и благословят в Нем языцы и в Нем восхвалят Бога во Иерусалиме. |
4:3 См.: 🔗Ос. 10:12 | Сия бо глаголет Господь мужем Иудиным и обитателем Иерусалимлим: поновите себе поля и не сейте на тернии: |
4:4 См.: 🔗Втор. 10:16 🔗Иер. 21:12 | обрежитеся Богу вашему и обрежите жестосердие ваше, мужие Иудины и обитающии во Иерусалиме, да не изыдет яко огнь ярость Моя, и возгорится, и не будет угашаяй, ради лукавства начинаний ваших. |
4:5 См.: 🔗Иер. 8:14 | Возвестите во Иудеи, и да услышится во Иерусалиме: глаголите, воспойте трубою на земли, возопийте зело и рцыте: соберитеся, и внидем во грады тверды. |
4:6 См.: 🔗Иер. 1:14 | Воздвигше (знамение) бежите в Сион, потщитеся, не стойте, яко злая Аз навожду от севера и сотрение велико. |
4:7 | Взыде лев от ложа своего, и погубляяй языки воздвижеся и изыде от места своего, да положит землю твою в пустыню, и гради твои разорятся, оставшии без обитателей. |
4:8 См.: 🔗Иер. 6:26 | О сих препояшитеся во вретища и плачите и рыдайте, яко не отвратися гнев ярости Господни от вас. |
4:9 См.: 🔗Иез. 32:10 | И будет в день той, глаголет Господь, погибнет сердце царево и сердце началников, и священницы ужаснутся, и пророцы удивятся. |
4:10 См.: 🔗Иер. 6:14 | И рекох: о, Владыко Господи, еда обольстил еси люди сия и Иерусалима, рекий: мир будет вам? И се, пройде мечь даже до души их. |
4:11 См.: 🔗Иер. 18:17 🔗Иер. 51:1 | Во время оно речется людем сим и Иерусалиму: дух заблуждения в пустыни, путь дщере людий Моих, не ко очищению, ниже во святое: |
4:12 См.: 🔗Иер. 1:16 | дух исполнения от сих приидет Мне, и ныне Аз возглаголю суды Моя к ним. |
4:13 См.: 🔗Авв. 1:8 | Се, яко облак взыдет, и яко вихрь колесницы его, быстрее орлов кони его: горе нам, яко бедствуем. |
4:14 См.: 🔗Ис. 1:16 | Омый от лукавства сердце твое, Иерусалиме, да спасешися: доколе будут в тебе помышления бед твоих? |
4:15 См.: 🔗Иер. 8:16 | Глас бо возвещающаго от Дана приидет, и слышана будет болезнь от горы Ефремли. |
4:16 См.: 🔗Иер. 2:15 | Рцыте языком: се, приидоша: возвестите во Иерусалиме: полцы идут от земли дальния и даша на грады Иудины глас свой, |
4:17 | аки стражы селнии быша над ним окрест: яко пренебрегл Мя еси, глаголет Господь. |
4:18 См.: 🔗Прем. 1:8 | Пути твоя и начинания твоя сотвориша тебе сия: сие лукавство твое, понеже горько, яко прикоснуся сердцу твоему. |
4:19 | Чрево мое, чрево мое болит мне, и чувства сердца моего, смущается душа моя, терзается сердце мое: не умолчу, яко глас трубы услышала душа моя, вопль рати и беды: |
4:20 | сотрение (на сотрение) призывается, понеже опустела вся земля, внезапу опусте жилище мое, расторгошася кожы моя. |
4:21 | Доколе зрети имам бежащих, слышащь гласы трубныя? |
4:22 См.: 🔗Лк. 16:4 | Понеже вождеве людий Моих Мене не познаша: сынове буии суть и безумни, мудри суть, еже творити злая, благо же творити не познаша. |
4:23 См.: 🔗Ис. 5:30 | Воззрех на землю, и се, ничтоже, и на небо, и не бе света его. |
4:24 | Видех горы, и трепетаху, и вси холми возмутишася. |
4:25 См.: 🔗Иер. 9:10 🔗Иер. 50:3 | Воззрех, и се, не бе человека, и вся птицы небесныя ужасахуся. |
4:26 См.: 🔗Иер. 2:7 | Видех, и се, Кармил пуст, и вси гради сожжени огнем от лица Господня, и от лица гнева ярости Его погибоша. |
4:27 | Сия глаголет Господь: пуста будет вся земля, скончания же не сотворю. |
4:28 См.: 🔗Иер. 18:8 | О сих да плачет земля, и да помрачится небо свыше: понеже глаголах, и не раскаюся: устремихся и не отвращуся от него. |
4:29 См.: 🔗Иер. 4:25 | От гласа яздящих и напряженна лука побеже всяка страна: внидоша в разселины и в дубравы сокрышася и на камение взыдоша: вси гради оставлени суть, не обитает в них человек. |
4:30 | Ты же, запустелая, что сотвориши? Аще облечешися во багряницу и украсишися монисты златыми, аще намажеши стивием очи твои, всуе украшение твое: отринуша тя любовницы твои, души твоея ищут. |
4:31 | Глас бо яко родящия слышах стенания твоего: аки первородящия глас дщере Сиони истает, и опустит руце свои: горе мне, яко изчезает душа моя над убиенными. |