Откровение Иоанна Богослова (Апокалипсис), глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1	И слышах глас велий от храма глаголющь седмим Ангелом: идите и излийте седмь фиал ярости Божия на землю.
16:2 См.: 🔗Исх. 9:9 🔗Отк. 13:17	И иде первый Ангел и излия фиал свой на землю: и бысть гной зол и лют на человецех имущих начертание зверино и кланяющихся иконе его.
16:3	И вторый Ангел излия фиал свой в море: и бысть кровь яко мертвеца, и всяка душа жива умре в мори.
16:4	И третий Ангел излия фиал свой на реки и на источники водныя: и бысть кровь.
16:5 См.: 🔗Отк. 4:8	И слышах Ангела воднаго глаголюща: праведен еси, Господи, сый и Иже бе, и преподобн, яко сия судил еси:
16:6 См.: 🔗Ис. 49:26 🔗Мф. 23:34	зане кровь святых и пророк излияша, и кровь им дал еси пити: достойни бо суть.
16:7	И слышах другаго от олтаря глаголюща: ей, Господи Боже Вседержителю, истинни и прави суди Твои.
16:8	И четвертый Ангел излия фиал свой на солнце: и дано бысть ему опаляти человеки огнем.
16:9	И опалишася человецы зноем великим, и хулиша имя Божие, иже имать область на язвах сих, и не покаяшася дати Ему славы.
16:10	И пятый Ангел излия фиал свой на престол зверин: и бысть царство его омрачено, и жваху языки своя от болезни,
16:11	и хулиша Бога небеснаго от болезни и от язв своих, и не покаяшася от дел своих.
16:12 См.: 🔗Иер. 50:38	И шестый Ангел излия фиал свой на реку велику Евфрат: и изсяче вода ея, да уготовится путь царем сущым от восток солнечных.
16:13 См.: 🔗Отк. 12:9 🔗Отк. 19:20 🔗Отк. 20:10	И видех из уст змия и из уст зверя и из уст лжаго пророка духи три нечистыя, яко жабы исходящыя:
16:14 См.: 🔗Мф. 24:24	суть бо дуси демонстии творяще знамения, иже исходят к царем всея вселенныя, собрати я на брань в день той великий Бога Вседержителя.
16:15 См.: 🔗Мф. 24:46 🔗Лк. 12:39 🔗2Кор. 5:3 🔗1Фес. 5:2 🔗Отк. 3:3	Се, гряду яко тать: блажен бдяй и блюдый ризы своя, да не наг ходит и узрят срамоту его.
16:16	И собра их на место нарицаемое еврейски Армагеддон.
16:17	И седмый Ангел излия фиал свой на воздух: и изыде глас велий от храма небесе от престола, глаголя: бысть.
16:18 См.: 🔗Отк. 4:5 🔗Отк. 8:5 🔗Отк. 11:13	И быша блистания и громи и гласи, и бысть трус велик, яков николиже бысть, отнележе быша человецы на земли, толик трус, тако велий.
16:19 См.: 🔗Иер. 25:15 🔗Отк. 14:8	И бысть град велик в три части, и гради язычестии падоша, и Вавилон великий помяновен бысть пред Богом, дати ему чашу вина ярости гнева Своего.
16:20	И всяк остров бежа, и горы не обретошася:
16:21	и град велик, яко талантес, сниде с небесе на человеки: и хулиша человецы Бога от язвы градныя, яко велия есть язва его зело.