Книга пророка Софонии, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1	Соберитеся и свяжитеся, язык ненаказанный,
2:2	прежде неже быти вам якоже цвету мимоходящу в день, прежде неже приити на вы гневу Господню, прежде неже приити на вы дню ярости Господни.
2:3 См.: 🔗Ис. 51:7	Взыщите Господа, вси смиреннии земли, суд содевайте и правды взыщите, (взыщите кротости) и отвещайте я, яко да покрыетеся в день гнева Господня.
2:4	Зане Газа расхищена будет, и Аскалон во изчезновение будет: и Азот в полудни отвержется, и Аккарон искоренится.
2:5	Горе живущым на ужи морстем, пришелцы Критстии: слово Господне на вас, Ханаане, земле иноплеменников, и погублю вы от жилища:
2:6	и будет Крит пажить стадам и ограда овцам,
2:7 См.: 🔗Ис. 11:14 🔗Иер. 29:14 🔗Иер. 30:3	и будет уже морское оставшым дому Иудина: на них пожируют в домех Аскалоних, к вечеру витати имут от лица сынов Иудиных, яко присети их Господь Бог их и возврати плен их.
2:8 См.: 🔗Иез. 25:3 🔗Иер. 49:3	Слышах поношения Моавля и укоризны сынов Аммоних, о нихже поношаху людем Моим и величахуся на пределы Моя.
2:9 См.: 🔗Иер. 48:1 🔗Втор. 29:23	Сего ради живу Аз, глаголет Господь Сил, Бог Израилев: зане Моав яко Содома будет, и сынове Аммони яко Гоморра, и Дамаск оставлен яко стог гуменный и разорен во век: и прочии людий Моих расхитят я, и оставшии языка Моего наследят их.
2:10 См.: 🔗Соф. 2:8	Сие им за досаждение их, зане поносиша и возвеличишася на люди Господа Вседержителя.
2:11 См.: 🔗Зах. 13:2 🔗Тов. 14:5 🔗Ин. 4:21	Явится Господь на них и потребит вся боги языков земных: и поклонятся Ему кийждо от места своего, вси острови язычестии.
2:12 См.: 🔗Ис. 18:1	И вы, Мурини, язвени оружием Моим будете.
2:13 См.: 🔗Наум. 1:14 🔗Наум. 2:2 🔗Наум. 3:15	И прострет руку Свою на север и погубит Ассирианина, и положит Ниневию во изчезновение безводно, яко пустыню:
2:14 См.: 🔗Ис. 13:21 🔗Ис. 34:11	и пожируют посреде ея стада и вси зверие земнии, и хамелеоны и ежеве во гнездах ея вогнездятся: и зверие возвыют в разселинах ея, и вранове во вратех ея, зане кедр возношение ея.
2:15 См.: 🔗Ис. 47:8	Сей град презорливый, живяй на уповании, глаголяй в сердцы своем: аз есмь, и несть по мне еще: како бысть во изчезновение, пажить зверем? Всяк мимоходяй сквозе его позвиждет и воздвигнет руце свои.