Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Псаломъ 67 | |
67:1 | В конец, псалом песни Давиду. |
67:2 См.: 🔗Чис. 10:35 | Да воскреснет Бог, и расточатся врази Его, и да бежат от лица Его ненавидящии Его. |
67:3 См.: 🔗Иудиф. 16:15 | Яко изчезает дым, да изчезнут: яко тает воск от лица огня, тако да погибнут грешницы от лица Божия: |
67:4 См.: 🔗Пс. 63:11 | а праведницы да возвеселятся, да возрадуются пред Богом, да насладятся в веселии. |
67:5 См.: 🔗Ис. 40:3 🔗Ис. 57:14 | Воспойте Богу, пойте имени Его: путесотворите Возшедшему на запады, Господь имя Ему: и радуйтеся пред Ним. |
67:6 См.: 🔗Пс. 145:9 🔗Ин. 14:18 | Да смятутся от лица Его, Отца сирых и судии вдовиц: Бог в месте святем Своем. |
67:7 См.: 🔗Пс. 112:9 | Бог вселяет единомысленныя в дом, изводя окованныя мужеством, такожде преогорчевающыя живущыя во гробех. |
67:8 См.: 🔗Исх. 13:20 🔗Чис. 14:14 | Боже, внегда исходити Тебе пред людьми Твоими, внегда мимоходити Тебе в пустыни, |
67:9 См.: 🔗Исх. 20:18 | земля потрясеся, ибо небеса кануша от лица Бога Синаина, от лица Бога Израилева. |
67:10 | Дождь волен отлучиши, Боже, достоянию Твоему, и изнеможе, Ты же совершил еси е. |
67:11 | Животная Твоя живут на ней: уготовал еси благостию Твоею нищему, Боже. |
67:12 См.: 🔗Ис. 52:7 | Господь даст глагол благовествующым силою многою: |
67:13 | царь сил возлюбленнаго, красотою дому разделити корысти. |
67:14 | Аще поспите посреде предел, криле голубине посребрене, и междорамия ея в блещании злата: |
67:15 См.: 🔗Суд. 9:48 | внегда разнствит Небесный цари на ней, оснежатся в Селмоне. |
67:16 | Гора Божия, гора тучная, гора усыренная, гора тучная. |
67:17 См.: 🔗Пс. 113:4 | Вскую непщуете, горы усыренныя? Гора, юже благоволи Бог жити в ней: ибо Господь вселится до конца. |
67:18 См.: 🔗Втор. 33:2 | Колесница Божия тмами тем, тысяща гобзующих: Господь в них в Синаи во святем. |
67:19 См.: 🔗Еф. 4:10 | Возшел еси на высоту, пленил еси плен: приял еси даяния в человецех, ибо непокаряющыяся, еже вселитися. |
67:20 | Господь Бог благословен, благословен Господь день дне: поспешит нам Бог спасений наших. |
67:21 | Бог наш Бог еже спасати: и Господня, Господня исходища смертная. |
67:22 | Обаче Бог сокрушит главы врагов Своих, верх влас преходящих в прегрешениих своих. |
67:23 См.: 🔗Чис. 21:33 | Рече Господь: от Васана обращу, обращу во глубинах морских: |
67:24 См.: 🔗Пс. 57:11 🔗Отк. 14:20 | яко да омочится нога твоя в крови, язык пес твоих от враг от него. |
67:25 | Видена быша шествия Твоя, Боже, шествия Бога моего Царя, иже во святем. |
67:26 См.: 🔗Исх. 15:20 🔗1Цар. 18:6 | Предвариша князи близ поющих, посреде дев тимпанниц. |
67:27 См.: 🔗Пс. 21:23 🔗Ин. 20:17 | В церквах благословите Бога, Господа от источник Израилевых. |
67:28 | Тамо Вениамин юнейший во ужасе, князи Иудовы владыки их, князи Завулони, князи Неффалимли. |
67:29 | Заповеждь, Боже, силою Твоею: укрепи, Боже, сие, еже соделал еси в нас. |
67:30 См.: 🔗Пс. 71:10 🔗Ис. 60:6 | От храма Твоего во Иерусалим Тебе принесут царие дары. |
67:31 | Запрети зверем тростным: сонм юнец в юницах людских, еже затворити искушенныя сребром: расточи языки хотящыя бранем. |
67:32 См.: 🔗Ис. 18:7 | Приидут молитвенницы от Египта: Ефиопиа предварит руку свою к Богу. |
67:33 | Царства земная, пойте Богу, воспойте Господеви, |
67:34 | возшедшему на небо небесе на востоки: се, даст гласу Своему глас силы. |
67:35 | Дадите славу Богови: на Израили велелепота Его, и сила Его на облацех. |
67:36 | Дивен Бог во святых Своих: Бог Израилев, Той даст силу и державу людем Своим. Благословен Бог. |