Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 1 | |
1:1 | Павел, Апостол Иисус Христов волею Божиею, и Тимофей брат, |
1:2 | сущым в Колоссаех святым и верным братиям о Христе Иисусе: |
1:3 См.: 🔗Флп. 1:3 | благодать вам и мир от Бога Отца нашего, и Господа Иисуса Христа. Благодарим Бога и Отца Господа нашего Иисуса Христа, всегда о вас молящеся, |
1:4 См.: 🔗Евр. 6:10 | слышавше веру вашу, яже о Христе Иисусе, и любовь, юже имате ко всем святым, |
1:5 | за упование отложенное вам на небесех, еже прежде слышасте в словеси истины благовествования, |
1:6 См.: 🔗Мф. 13:8 🔗Ин. 15:16 | сущаго в вас, якоже и во всем мире: и есть плодоносно и растимо, якоже и в вас, от негоже дне слышасте и разуместе благодать Божию во истине: |
1:7 | якоже и уведесте от Епафраса, возлюбленнаго соработника нашего, иже есть верен о вас служитель Христов, |
1:8 | иже и яви нам вашу любовь в дусе. |
1:9 См.: 🔗Рим. 12:2 | Сего ради и мы, от негоже дне слышахом, не престаем о вас молящеся и просяще, да исполнитеся в разуме воли Его, во всяцей премудрости и разуме духовнем, |
1:10 | яко ходити вам достоине Богу во всяцем угождении и всяком деле блазе, плодоносяще и возрастающе в разуме Божии, |
1:11 См.: 🔗Деян. 5:41 | всякою силою возмогающе по державе славы Его, во всяцем терпении и долготерпении с радостию. |
1:12 См.: 🔗Деян. 26:18 | Благодаряще Бога и Отца, призвавшаго вас в причастие наследия святых во свете. |
1:13 См.: 🔗Мф. 3:17 🔗Евр. 2:15 | Иже избави нас от власти темныя и престави в Царство Сына любве Своея, |
1:14 См.: 🔗Рим. 3:25 | о Немже имамы избавление Кровию Его и оставление грехов. |
1:15 См.: 🔗Прит. 8:22 🔗Евр. 1:3 | Иже есть образ Бога невидимаго, перворожден всея твари. |
1:16 | Яко Тем создана быша всяческая, яже на небеси и яже на земли, видимая и невидимая, аще престоли, аще господствия, аще начала, аще власти: всяческая Тем и о Нем создашася. |
1:17 См.: 🔗Ин. 1:1 | И Той есть прежде всех, и всяческая в Нем состоятся. |
1:18 | И Той есть глава телу Церкве, Иже есть начаток, перворожден из мертвых, яко да будет во всех Той первенствуя. |
1:19 См.: 🔗Кол. 2:9 | Яко в Нем благоизволи всему исполнению вселитися, |
1:20 | и Тем примирити всяческая к Себе, умиротворив Кровию креста Его, чрез Него, аще земная, аще ли небесная. |
1:21 | И вас, иногда сущих отчужденных и врагов помышленьми в делех лукавых, |
1:22 | ныне же примири в теле Плоти Его смертию Его, представити вас святых и непорочных и неповинных пред Собою, |
1:23 | аще убо пребываете в вере основани и тверди, и неподвижими от упования благовествования, еже слышасте, проповеданное всей твари поднебесней, емуже бых аз Павел служитель. |
1:24 См.: 🔗Рим. 5:3 | Ныне радуюся во страданиих моих о вас, яко исполняю лишение скорбей Христовых во плоти моей за Тело Его, еже есть Церковь. |
1:25 См.: 🔗1Кор. 4:1 🔗1Кор. 9:17 | Ейже бых аз служитель по смотрению Божию, данному мне в вас, исполнити слово Божие, |
1:26 См.: 🔗Рим. 14:24 🔗Еф. 3:9 | тайну сокровенную от век и от родов: ныне же явися святым Его, |
1:27 См.: 🔗Рим. 9:23 🔗Еф. 3:17 | Имже восхоте Бог сказати, кое богатство славы тайны сея во языцех, иже есть Христос в вас, упование славы, |
1:28 См.: 🔗2Кор. 11:2 | Егоже мы проповедуем, наказующе всякаго человека и учаще всяцей премудрости, да представим всякаго человека совершенна о Христе Иисусе: |
1:29 См.: 🔗1Кор. 15:10 🔗Флп. 2:13 | в немже и труждаюся и подвизаюся по действу Его действуемому во мне силою. |