Евангелие от Луки, глава 12

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 12
12:1 См.: 🔗Мф. 16:6 🔗Мк. 8:15	О нихже собравшымся тмам народа, яко попирати друг друга, начат глаголати учеником Своим первее: внемлите себе от кваса фарисейска, еже есть лицемерие.
12:2 См.: 🔗Мф. 10:26 🔗Мк. 4:22 🔗Лк. 8:17	Ничтоже бо покровено есть, еже не открыется, и тайно, еже не уразумеется:
12:3	зане, елика во тме ресте, во свете услышатся: и еже ко уху глаголасте во храмех, проповестся на кровех.
12:4 См.: 🔗Ис. 8:12 🔗Ис. 51:7 🔗Иер. 1:8 🔗Мф. 10:28	Глаголю же вам другом Своим: не убойтеся от убивающих тело и потом не могущих лишше что сотворити:
12:5	сказую же вам, кого убойтеся: убойтеся имущаго власть по убиении воврещи в дебрь огненную: ей, глаголю вам, того убойтеся.
12:6 См.: 🔗Мф. 10:29	Не пять ли птиц ценится пенязема двема? И ни едина от них несть забвена пред Богом.
12:7 См.: 🔗Лк. 21:18	Но и власи главы вашея вси изочтени суть. Не убойтеся убо: мнозех птиц унши есте вы.
12:8 См.: 🔗Мф. 10:32	Глаголю же вам: всяк, иже аще исповесть Мя пред человеки, и Сын Человеческий исповесть его пред Ангелы Божиими:
12:9 См.: 🔗Мк. 8:38 🔗Лк. 9:26 🔗2Тим. 2:12	а отвергийся Мене пред человеки отвержен будет пред Ангелы Божиими.
12:10 См.: 🔗Мф. 12:31 🔗Мк. 3:28 🔗1Ин. 5:16	И всяк иже речет слово на Сына Человеческаго, оставится ему: а на Святаго Духа хулившему не оставится.
12:11 См.: 🔗Мф. 10:19 🔗Мк. 13:11	Егда же приведут вы на соборища и власти и владычества, не пецытеся, како или что отвещаете, или что речете:
12:12	Святый бо Дух научит вы в той час, яже подобает рещи.
12:13	Рече же Ему некий от народа: Учителю, рцы брату моему разделити со мною достояние.
12:14	Он же рече ему: человече, кто Мя постави судию или делителя над вами?
12:15 См.: 🔗Мк. 4:19 🔗1Тим. 6:9	Рече же к ним: блюдите и хранитеся от лихоимства: яко не от избытка кому живот его есть от имения его.
12:16	Рече же притчу к ним, глаголя: человеку некоему богату угобзися нива:
12:17	и мысляше в себе, глаголя: что сотворю, яко не имам где собрати плодов моих?
12:18	И рече: се сотворю: разорю житницы моя, и болшыя созижду, и соберу ту вся жита моя и благая моя:
12:19 См.: 🔗Сир. 11:17 🔗1Кор. 15:32	и реку души моей: душе, имаши многа блага, лежаща на лета многа: почивай, яждь, пий, веселися.
12:20 См.: 🔗Иов. 20:22 🔗Пс. 38:7 🔗Иер. 17:11	Рече же ему Бог: безумне, в сию нощь душу твою истяжут от тебе: а яже уготовал еси, кому будут?
12:21 См.: 🔗Мф. 6:20 🔗1Тим. 6:19	Тако собираяй себе, а не в Бога богатея.
12:22 См.: 🔗Пс. 54:23 🔗Мф. 6:25 🔗1Пет. 5:7	Рече же ко учеником Своим: сего ради глаголю вам: не пецытеся душею вашею, что ясте: ни телом, во что облечетеся:
12:23	душа болши есть пищи, и тело одежды.
12:24 См.: 🔗Пс. 103:27	Смотрите вран, яко не сеют, ни жнут: имже несть сокровища, ни житницы, и Бог питает их: кольми паче вы есте лучши птиц?
12:25	Кто же от вас пекийся может приложити возрасту своему лакоть един?
12:26	Аще убо ни мала чесо можете, что о прочих печетеся?
12:27	Смотрите крины, како растут: не труждаются, ни прядут: глаголю же вам, яко ни Соломон во всей славе своей облечеся, яко един от сих.
12:28	Аще же траву, на селе днесь сущу и утре в пещь вмещему, Бог тако одевает: кольми паче вас, маловери?
12:29	И вы не ищите, что ясте, или что пиете: и не возноситеся:
12:30	всех бо сих языцы мира сего ищут: ваш же Отец весть, яко требуете сих:
12:31 См.: 🔗Мф. 6:33 🔗Мк. 10:30	обаче ищите Царствия Божия, и сия вся приложатся вам.
12:32	Не бойся, малое стадо: яко благоизволи Отец ваш дати вам Царство.
12:33 См.: 🔗Мф. 6:20	Продадите имения ваша и дадите милостыню. Сотворите себе влагалища неветшающа, сокровище неоскудеемо на небесех, идеже тать не приближается, ни моль растлевает.
12:34	Идеже бо сокровище ваше, ту и сердце ваше будет.
12:35 См.: 🔗1Пет. 1:13 🔗Еф. 3:16	Да будут чресла ваша препоясана, и светилницы горящии:
12:36	и вы подобни человеком чающым господа своего, когда возвратится от брака, да пришедшу и толкнувшу, абие отверзут ему.
12:37	Блажени раби тии, ихже пришед господь обрящет бдящих: аминь глаголю вам, яко препояшется и посадит их, и минув послужит им.
12:38	И аще приидет во вторую стражу, и в третию стражу приидет, и обрящет (их) тако, блажени суть раби тии.
12:39 См.: 🔗Мф. 24:43 🔗2Пет. 3:10 🔗1Фес. 5:2 🔗Отк. 16:15	Се же ведите, яко аще бы ведал господин храмины, в кий час тать приидет, бдел убо бы, и не бы дал подкопати дому своего:
12:40	и вы убо будите готови: яко, в оньже час не мните, Сын Человеческий приидет.
12:41	Рече же Ему Петр: Господи, к нам ли притчу сию глаголеши, или ко всем?
12:42 См.: 🔗Мф. 24:45	Рече же Господь: кто убо есть верный строитель и мудрый, егоже поставит господь над челядию своею, даяти во время житомерие?
12:43	Блажен раб той, егоже пришед господь его обрящет творяща тако:
12:44	воистинну глаголю вам, яко над всем имением своим поставит его.
12:45	Аще же речет раб той в сердцы своем: коснит господин мой приити: и начнет бити рабы и рабыни, ясти же и пити и упиватися:
12:46	приидет господин раба того в день, в оньже не чает, и в час, в оньже не весть: и растешет его, и часть его с неверными положит.
12:47 См.: 🔗Ин. 15:22	Той же раб ведевый волю господина своего, и не уготовав, ни сотворив по воли его, биен будет много:
12:48	неведевый же, сотворив же достойная ранам, биен будет мало. Всякому же, емуже дано будет много, много взыщется от него: и емуже предаша множайше, множайше просят от него.
12:49	Огня приидох воврещи на землю, и что хощу, аще уже возгореся?
12:50 См.: 🔗Мф. 20:22	Крещением же имам креститися, и како удержуся, дондеже скончаются?
12:51 См.: 🔗Мф. 10:34	Мните ли, яко мир приидох дати на землю? Ни, глаголю вам, но разделение:
12:52	будут бо отселе пять во единем дому разделени, трие на два, и два на три:
12:53 См.: 🔗Мих. 7:6	разделится отец на сына, и сын на отца: мати на дщерь, и дщи на матерь: свекры на невесту свою, и невеста на свекровь свою.
12:54 См.: 🔗Мф. 16:2	Глаголаше же и народом: егда узрите облак восходящь от запада, абие глаголете: туча грядет: и бывает тако:
12:55	и егда юг веющь, глаголете: зной будет: и бывает.
12:56	Лицемери, лице небу и земли весте искушати: времене же сего како не искушаете?
12:57	Что же и о себе не судите праведное?
12:58 См.: 🔗Мф. 5:25	Егда бо грядеши с соперником твоим ко князю, на пути даждь делание избыти от него: да не како привлечет тебе к судии, и судия тя предаст слузе, и слуга всадит тя в темницу:
12:59	глаголю тебе: не изыдеши оттуду, дондеже и последнюю медницу воздаси.