Книга Числа, глава 23

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 23
23:1	И рече Валаам к Валаку: созижди мне зде седмь требищ, и уготовай мне зде седмь телцев и седмь овнов.
23:2	И сотвори Валак, якоже рече ему Валаам: и вознесе телца и овна на требище.
23:3	И рече Валаам к Валаку: стани у требы своея, и пойду, аще явится мне Бог в сретение, и слово, еже мне укажет, повем тебе. И ста Валак у требы своея.
23:4	И Валаам иде вопросити Бога, и иде прямо: и явися Бог Валааму. И рече к нему Валаам: седмь требищ изготових и возложих телца и овна на требище.
23:5	И вложи Бог слово во уста Валааму и рече: возвратився к Валаку тако глаголи.
23:6	И возвратися к нему: он же стояше у всесожжений своих, и вси князи Моавли с ним: и бысть Дух Божий на нем.
23:7 См.: 🔗Втор. 23:4	И восприим притчу свою рече: от Месопотамии приведе мя Валак царь Моавль, от гор восточных, глаголя: гряди, проклени ми Иакова, и гряди, проклени ми Израиля:
23:8 См.: 🔗Нав. 24:10	что проклену, егоже не кленет Господь? Или что зло реку, егоже не злословит Бог?
23:9 См.: 🔗Втор. 33:28	Яко от верха гор узрю его и от холм проуразумею его: се, людие едини населятся и со языки не вменятся:
23:10 См.: 🔗Быт. 13:16 🔗3Цар. 19:4	кто изследит семя Иаковле? И кто изочтет сонмы Израиля? Да умрет душа моя в душах праведных, и буди семя мое, якоже семя их.
23:11	И рече Валак к Валааму: что сотворил еси ми? На проклятие враг моих призвах тя, и се, благословил еси (я) благословением.
23:12 См.: 🔗Втор. 32:31	И рече Валаам к Валаку: не елика ли вложит Бог во уста моя, сие сохраню глаголати?
23:13	И рече к нему Валак: пойди еще со мною на место ино, с негоже не узриши их оттуду, но разве часть некую их узриши, всех же не узриши, и проклени ми их оттуду.
23:14 См.: 🔗Втор. 3:27	И поя его на стражу села, на верх Истесанаго, и созда тамо седмь требищ, и возложи телца и овна на требище.
23:15	И рече Валаам к Валаку: стани у требы своея, аз же пойду вопросити Бога.
23:16	И срете Бог Валаама, и вложи слово во уста ему и рече: возвратися к Валаку, и речеши сия.
23:17	И возвратися к нему: он же стояше у всесожжений своих, и вси князи Моавли с ним. И рече ему Валак: что глагола Господь?
23:18	И восприим притчу свою, рече: востани, Валак, и послушай, внуши свидетель, сыне Сепфоров:
23:19 См.: 🔗1Цар. 15:29 🔗Мал. 3:6 🔗Тит. 1:2	не яко человек Бог колеблется, ниже яко сын человеческий изменяется: Той глаголаше, не сотворит ли? Речет, и не пребудет ли?
23:20	Се, благословляти приведен есмь: благословлю, и не отвращу:
23:21 См.: 🔗Пс. 54:11 🔗Иер. 50:20	не будет труда во Иакове, ниже узрится болезнь во Израили: Господь Бог его с ним, слава царская на нем:
23:22 См.: 🔗Чис. 24:8	Бог изведый его из Египта, якоже слава единорога в нем:
23:23	несть бо вражбы во Иакове, ниже волхвования во Израили: во время наречется Иакову и Израилю, что совершит Бог:
23:24 См.: 🔗Быт. 49:9	се, людие яко львичища востанут, и яко лев вознесется: не уснет, дондеже снест лов и кровь посеченых испиет.
23:25 См.: 🔗Чис. 22:6	И рече Валак к Валааму: ни клятвами мне клени их, ниже благословением благослови их.
23:26	И отвещав Валаам, рече к Валаку: не рех ли ти, глаголя: слово, еже аще возглаголет Бог, сие сотворю?
23:27	И рече Валак к Валааму: гряди, пойму тя на место ино, аще угодно будет Богу, и проклени ми их оттуду.
23:28 См.: 🔗Чис. 25:3	И поя Валак Валаама на верх Фогора, простирающася в пустыню.
23:29	И рече Валаам к Валаку: созижди мне зде седмь требищ, и уготовай мне зде седмь телцев и седмь овнов.
23:30	И сотвори Валак, якоже рече ему Валаам: и вознесе телца и овна на требище.