Книга Бытия, глава 46

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 46
46:1 См.: 🔗Исх. 1:1 🔗Чис. 20:15 🔗Втор. 10:22	Востав же Израиль сам и вся сущая его, прииде ко кладязю Клятвенному и пожре жертву Богу отца своего Исаака.
46:2	Рече же Бог ко Израилю в видении нощию, глаголя: Иакове, Иакове. Он же рече: что есть?
46:3	Он же рече ему: Аз есмь Бог отцев твоих, не убойся изыти во Египет: в язык бо велий сотворю тя тамо:
46:4 См.: 🔗Быт. 50:1	и Аз сниду с тобою во Египет, и Аз возведу тя до конца: и Иосиф возложит руки своя на очи твои.
46:5 См.: 🔗Деян. 7:15	Воста же Иаков от кладязя Клятвеннаго, и взяша сынове Израиля отца своего, и стяжание, и жены своя на колесницы, яже посла Иосиф, взяти его:
46:6 См.: 🔗Нав. 24:4 🔗Пс. 104:23 🔗Ис. 52:4	и вземше имения своя и все стяжание, еже стяжаша в земли Ханаанстей, внидоша во Египет Иаков и все семя его с ним:
46:7	сынове и сынове сынов его с ним, дщери и дщери дщерей его, и все семя свое введе во Египет.
46:8 См.: 🔗Исх. 1:1 🔗Исх. 6:14 🔗Чис. 26:5 🔗1Пар. 5:1	Сия же имена сынов Израилевых вшедших во Египет купно со Иаковом отцем своим: Иаков и сынове его: первенец Иаковль Рувим.
46:9	Сынове же Рувимли: Енох и Фаллос, Асрон и Харми.
46:10 См.: 🔗1Пар. 4:24	Сынове же Симеони: Иемуил и Иамин, и Аод и Ахин, и Саар и Саул, сын Хананитидин.
46:11 См.: 🔗1Пар. 6:1 🔗Исх. 6:16 🔗Чис. 3:17	Сынове же Левиини: Гирсон, Кааф и Мерарий.
46:12 См.: 🔗Быт. 38:2 🔗1Пар. 2:3 🔗1Пар. 4:1	Сынове же Иудины: Ир и Авнан, и Силом и Фарес и Зара: умроша же Ир и Авнан в земли Ханаани. Быша же сынове Фаресу: Есром и Иемуил.
46:13 См.: 🔗1Пар. 7:1	Сынове же Иссахаровы: Фола и Фуа, и Асум и Самвран.
46:14 См.: 🔗Чис. 26:26	Сынове же Завулони: Серед и Аллон и Ахоил.
46:15	Сии сынове Лиини, ихже роди Иакову в Месопотамии Сирстей, и Дину дщерь его: всех душ сынов и дщерей тридесять три.
46:16 См.: 🔗Чис. 26:15	Сынове же Гадовы: Сафон и Ангис, и Саннис и Фасован, и Аидис и Ароидис и Ареилис.
46:17 См.: 🔗1Пар. 7:30	Сынове же Асировы: Иемна и Ессуа, и Иеул и Вариа, и Сара сестра их. Сынове же Вариины: Ховор и Мелхиил.
46:18	Сии сынове Зелфины, юже даде Лаван Лии, дщери своей, яже роди сих Иакову, шестьнадесять душ.
46:19	Сынове же Рахили, жены Иаковли: Иосиф и Вениамин.
46:20 См.: 🔗Быт. 41:50	Быша же сынове Иосифу в земли Египетстей, ихже роди ему Асенефа, дщи Петефриа жреца Илиопольска, Манассию и Ефрема. Быша же сынове Манассиины, ихже роди ему наложница Сира, Махира. Махир же роди Галаада. Сынове же Ефраима, брата Манассиина: Суталаам и Таам. Сынове же Суталаамли, Едом.
46:21 См.: 🔗1Пар. 7:6 🔗1Пар. 8:1	Сынове же Вениамини: Вала и Ховор и Асфил. Быша же сынове Валовы: Гира и Ноеман, и Анхис и Рос, и Мамфим и Офимим. Гира же роди Арада.
46:22	Сии сынове Рахилины, ихже роди Иакову, всех душ осмьнадесять.
46:23 См.: 🔗Чис. 26:42	Сынове же Дановы: Асом.
46:24 См.: 🔗Чис. 26:48 🔗1Пар. 7:13	Сынове же Неффалимли: Асиил и Гони, и Иссаар и Селлим.
46:25	Сии сынове Валлины, юже даде Лаван Рахили дщери своей, яже роди сих Иакову: всех душ седмь.
46:26	Всех же душ вшедших со Иаковом во Египет, яже изыдоша из чресл его, кроме жен сынов Иаковлих, всех душ шестьдесят шесть.
46:27 См.: 🔗Исх. 1:5 🔗Втор. 10:22 🔗Деян. 7:14	Сынове же Иосифовы, иже быша ему в земли Египетстей, душ девять: всех душ дому Иаковля, яже приидоша со Иаковом во Египет, душ седмьдесят пять.
46:28	Иуду же посла пред собою ко Иосифу срести его у Иройска града в земли Рамессийстей.
46:29 См.: 🔗Быт. 33:4 🔗Быт. 45:14	Впряг же Иосиф колесницы своя, изыде во сретение Израилю, отцу своему, ко Ироону граду: и явився ему, нападе на выю его и плакася плачем великим.
46:30 См.: 🔗Быт. 45:28 🔗Лк. 2:29	И рече Израиль ко Иосифу: да умру отныне, понеже видех лице твое: еще бо ты еси жив.
46:31 См.: 🔗Быт. 47:1	Рече же Иосиф ко братии своей: шед повем фараону и реку ему: братия моя и дом отца моего, иже быша в земли Ханаани, приидоша ко мне:
46:32	они же суть мужие пастуси, мужие бо скотопитателие быша: и скоты, и волы, и вся своя приведоша:
46:33	аще убо призовет вас фараон и речет вам: что дело ваше есть?
46:34 См.: 🔗Быт. 47:6 🔗Быт. 43:32	Рцыте: мужие скотопитателие есмы, раби твои, издетска даже до ныне, и мы и отцы наши: да вселитеся в земли Гесем аравийстей: мерзость бо есть Египтяном всяк пастух овчий.