Книга Иисуса Навина, глава 23

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 23
23:1 См.: 🔗Нав. 21:44 🔗Нав. 22:4	И бысть по днех мнозех, егда упокои Господь Бог Израиля от всех врагов его иже окрест, и Иисус состареся прошед дни.
23:2 См.: 🔗Нав. 24:1	И созва Иисус вся сыны Израилевы и старейшины их, и князи их и судии их и книгочия их, и рече к ним: аз состарехся и проидох дни:
23:3 См.: 🔗Втор. 9:5	вы же видесте вся, елика сотвори Господь Бог ваш всем языком сим от лица вашего, зане Господь Бог наш споборствовавый нам:
23:4	видите, яко низвергох вам языки оставшыяся вам сия во жребиих племеном вашым, от Иордана вся языки потребих, и от моря великаго, еже определит на запад солнца:
23:5 См.: 🔗Исх. 14:14 🔗Втор. 6:19	Господь же Бог ваш Сам потребит их от лица вашего, дондеже погибнут, и послет на ня звери дивия, дондеже потребит их и цари их от лица вашего, и наследите землю их, якоже глагола вам Господь Бог ваш:
23:6 См.: 🔗Втор. 5:32	укрепитеся убо зело хранити и творити вся написанная в книгах закона Моисеова, да не уклонитеся от него на десно или на лево:
23:7 См.: 🔗Исх. 23:13 🔗Пс. 15:4 🔗Иер. 5:7	яко да не внидете во языки оставшыяся сия, и имена богов их да не возименуются в вас, ниже да кленетеся ими, ниже да послужите им, ниже поклонитеся им:
23:8	но токмо Господу Богу вашему прилепитеся, якоже твористе до сего дне:
23:9 См.: 🔗Лев. 26:7	и потреби Господь от лица вашего языки велики и сильны, и никто противоста вам до сего дне:
23:10 См.: 🔗Лев. 26:8 🔗Суд. 3:31	един от вас прогна тысящы, яко Господь Бог ваш споборствоваше вам:
23:11 См.: 🔗Втор. 4:15	и сохраните зело любити Господа Бога вашего:
23:12 См.: 🔗Втор. 7:3 🔗Неем. 10:30	аще бо отвратитеся и приложитеся ко оставшымся языком сим, иже с вами, и браки сотворите с ними, и смеситеся с ними, и они с вами,
23:13 См.: 🔗Суд. 2:3 🔗Чис. 33:55 🔗Втор. 7:4	ведением уведите, яко не приложит Господь потребити языки сия от лица вашего: и будут вам в сети и в соблазны, и в гвоздия в пятах ваших и в стрелы во очесех ваших, дондеже погибнете от земли благия сея, юже даде вам Господь Бог ваш:
23:14 См.: 🔗3Цар. 2:2 🔗Нав. 21:45 🔗1Цар. 3:19	аз же днесь отхожду в путь, якоже и вси иже на земли: и познаете всем сердцем вашим и душею вашею, яко ни едино слово отпаде от всех словес благих, яже рече Господь Бог ваш к вам: вся приходят вам, и не разнствова от них ни едино слово:
23:15	и будет, имже образом приходят на вас вся словеса добрая, яже глагола Господь Бог к вам, тако наведет Господь на вы вся словеса злая, дондеже потребит вы от земли благия сея, юже даде вам Господь Бог ваш:
23:16 См.: 🔗Лев. 26:14 🔗3Цар. 9:6	внегда преступите завет Господа Бога вашего, егоже заповеда вам, и шедше послужите богом иным и поклонитеся им: и разгневается яростию Господь на вы, и погибнете скоро от земли благия, юже даде Господь вам.