Евангелие от Иоанна, глава 20

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 20
20:1 См.: 🔗Мф. 28:1 🔗Мк. 16:1 🔗Лк. 24:1	Во едину же от суббот Мариа Магдалина прииде заутра, еще сущей тме, на гроб, и виде камень взят от гроба:
20:2	тече убо и прииде к Симону Петру и к другому ученику, егоже любляше Иисус, и глагола има: взяша Господа от гроба, и не вем, где положиша Его.
20:3	Изыде же Петр и другий ученик и идяста ко гробу:
20:4	течаста же оба вкупе: и другий ученик тече скорее Петра и прииде прежде ко гробу,
20:5	и приник виде ризы лежащя: обаче не вниде.
20:6 См.: 🔗Лк. 24:12	Прииде же Симон Петр вслед его, и вниде во гроб, и виде ризы (едины) лежащя
20:7	и сударь, иже бе на главе Его, не с ризами лежащь, но особь свит на единем месте.
20:8	Тогда убо вниде и другий ученик, пришедый прежде ко гробу, и виде и верова:
20:9 См.: 🔗Пс. 15:10 🔗Ис. 53:11 🔗Ион. 2:1	не у бо ведяху Писания, яко подобает Ему из мертвых воскреснути.
20:10	Идоста же паки к себе ученика.
20:11 См.: 🔗Мф. 28:1 🔗Мк. 16:5	Мариа же стояше у гроба вне плачущи: якоже плакашеся, приниче во гроб,
20:12	и виде два Ангела в белых (ризах) седяща, единаго у главы и единаго у ногу, идеже бе лежало тело Иисусово.
20:13	И глаголаста ей она: жено, что плачешися? Глагола има: яко взяша Господа моего, и не вем, где положиша Его.
20:14 См.: 🔗Мф. 28:9 🔗Мк. 16:9	И сия рекши обратися вспять и виде Иисуса стояща, и не ведяше, яко Иисус есть.
20:15	Глагола ей Иисус: жено, что плачеши? Кого ищеши? Она (же) мнящи, яко вертоградарь есть, глагола Ему: господи, аще ты еси взял Его, повеждь ми, где еси положил Его, и аз возму Его.
20:16	Глагола ей Иисус: Марие. Она (же) обращшися глагола Ему: Раввуни, еже глаголется, Учителю.
20:17 См.: 🔗Пс. 21:23 🔗Мф. 28:10 🔗Рим. 8:29 🔗Евр. 2:11	Глагола ей Иисус: не прикасайся Мне, не у бо взыдох ко Отцу Моему: иди же ко братии Моей и рцы им: восхожду ко Отцу Моему и Отцу вашему, и Богу Моему и Богу вашему.
20:18	Прииде (же) Мариа Магдалина поведающи учеником, яко виде Господа, и сия рече ей.
20:19 См.: 🔗Мк. 16:14 🔗Лк. 24:36 🔗Деян. 13:31 🔗1Кор. 15:5	Сущу же позде в день той во едину от суббот, и дверем затворенным, идеже бяху ученицы (Его) собрани, страха ради Иудейска, прииде Иисус и ста посреде и глагола им: мир вам.
20:20 См.: 🔗Ин. 16:22	И сие рек, показа им руце (и нозе) и ребра Своя. Возрадовашася убо ученицы, видевше Господа.
20:21 См.: 🔗Ин. 17:18	Рече же им Иисус паки: мир вам: якоже посла Мя Отец, и Аз посылаю вы.
20:22	И сие рек, дуну и глагола им: приимите Дух Свят:
20:23 См.: 🔗Мф. 16:19 🔗Мф. 18:18	имже отпустите грехи, отпустятся им: и имже держите, держатся.
20:24	Фома же, един от обоюнадесяте, глаголемыи Близнец, не бе (ту) с ними, егда прииде Иисус.
20:25 См.: 🔗Ин. 19:34	Глаголаху же ему друзии ученицы: видехом Господа. Он же рече им: аще не вижу на руку Его язвы гвоздинныя, и вложу перста моего в язвы гвоздинныя, и вложу руку мою в ребра Его, не иму веры.
20:26	И по днех осмих паки бяху внутрь ученицы Его, и Фома с ними. Прииде Иисус дверем затворенным, и ста посреде (их) и рече: мир вам.
20:27	Потом глагола Фоме: принеси перст твой семо и виждь руце Мои: и принеси руку твою и вложи в ребра Моя: и не буди неверен, но верен.
20:28	И отвеща Фома и рече Ему: Господь мой и Бог мой.
20:29 См.: 🔗1Пет. 1:8 🔗2Кор. 5:7	Глагола ему Иисус: яко видев Мя, веровал еси: блажени не видевшии и веровавше.
20:30 См.: 🔗Ин. 21:25	Многа же и ина знамения сотвори Иисус пред ученики Своими, яже не суть писана в книгах сих:
20:31 См.: 🔗Ин. 3:15 🔗Рим. 15:4	сия же писана быша, да веруете, яко Иисус есть Христос Сын Божий, и да верующе живот имате во имя Его.