Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 23 | |
23:1 См.: 🔗Лев. 19:11 | Да не приимеши слуха суетна, да не приложишися с неправедным быти свидетель неправеден: |
23:2 | да не будеши со многими на злобу, да не приложишися ко множеству уклонитися со множайшими, яко превратити суд, |
23:3 См.: 🔗Лев. 19:15 | и нищаго да не помилуеши на суде. |
23:4 См.: 🔗Втор. 22:1 | Аще же срящеши говядо врага твоего или осля его заблуждающее, обратив да отдаси ему: |
23:5 См.: 🔗Лк. 14:5 | аще же узриши осля врага твоего падшее под бременем его, да не мимоидеши е, но да воздвигнеши е с ним. |
23:6 См.: 🔗Втор. 16:19 🔗Ис. 10:1 | Да не превратиши суда нищему в суде его. |
23:7 См.: 🔗Дан. 13:62 | От всякаго слова неправеднаго да отступиши: неповинна и праведна да не убиеши, и не оправдиши нечестиваго даров ради, |
23:8 См.: 🔗Втор. 16:19 🔗Сир. 20:29 | и да не возмеши даров: дары бо ослепляют очи видящым и погубляют словеса праведна. |
23:9 | И пришелца не оскорбляйте, ни стужите (ему): вы бо весте душу пришелчу, понеже сами бесте пришелцы в земли Египетстей. |
23:10 См.: 🔗Лев. 25:3 | Шесть лет да сееши землю твою и да собереши плоды ея: |
23:11 | в седмое же оставление да сотвориши и опустиши ю, и да ясти будут убозии языка твоего, останки же да снедят зверие дивии: тако да сотвориши винограду твоему и масличию твоему. |
23:12 См.: 🔗Исх. 20:9 🔗Лев. 23:3 | В шесть дний да сотвориши дела твоя, в седмый же день покой: да почиет вол твой и осел твой, и да почиет сын рабы твоея и пришлец. |
23:13 | Вся, елика глаголах вам, сохраните, имен же богов инех не поминайте, ниже да слышатся изо уст ваших. |
23:14 | Три краты в лете сотворите Ми праздник: |
23:15 См.: 🔗Исх. 13:3 🔗Сир. 35:4 | праздник опресноков сохраните творити, седмь дний ядите опресноки, якоже заповедах тебе, во время месяца новых плодов, в той бо изшел еси из Египта, да не явишися предо Мною тощь: |
23:16 См.: 🔗Лев. 23:34 | и праздник жатвы первородных жит сотвориши от дел твоих, яже посееши на ниве твоей: и праздник скончания при исходе лета в собрании дел твоих, яже от нив твоих. |
23:17 См.: 🔗Исх. 34:23 🔗Втор. 16:16 | Три краты в лете да явится всяк мужеск пол твой пред Господем Богом твоим. |
23:18 | Егда бо изжену языки от лица твоего и разширю пределы твоя, да не пожреши на квасе крове жертвы Моея, ниже да долежит тук праздника Моего до утрия. |
23:19 См.: 🔗Исх. 34:26 🔗Втор. 14:21 | Начатки первых жит земли твоея да внесеши в дом Господа Бога твоего. Да не свариши ягняте во млеце матере его. |
23:20 См.: 🔗Исх. 13:21 🔗Исх. 14:19 | И се, Аз послю Ангела Моего пред лицем твоим, да сохранит тя на пути, яко да введет тя в землю, юже уготовах тебе: |
23:21 | вонми себе и послушай Его, и не ослушайся Его: не обинется бо тебе, имя бо Мое есть на Нем: |
23:22 См.: 🔗Втор. 18:15 🔗Быт. 12:3 | аще слухом послушаеши гласа Моего и сотвориши вся, елика Аз заповедаю тебе, и сохраниши завет Мой, будете Ми люди избранни от всех язык: Моя бо есть вся земля, вы же будете Ми царское священие и язык свят. Сия словеса да речеши сыном Израилевым. Аще слухом послушаеши гласа Моего и сотвориши вся, елика реку тебе, враг буду врагом твоим и сопротивлюся сопротивником твоим. |
23:23 | Пойдет бо Ангел Мой наставляяй тя и введет тя ко Аморрею и Хеттею, и Ферезею и Хананею, и Гергесею и Евею и Иевусею, и потреблю их (от лица вашего): |
23:24 См.: 🔗Исх. 20:5 🔗Быт. 35:2 | да не поклонишися богом их, ниже послужиши им: да не сотвориши по делом их, но разорением разориши и сокрушением сокрушиши капища их, |
23:25 См.: 🔗Мф. 6:33 🔗Исх. 15:26 | и да послужиши Господу Богу твоему: и благословлю хлеб твой и вино твое и воду твою, и отвращу болезнь от вас. |
23:26 См.: 🔗Втор. 7:14 | Не будет безчаден, ниже неплоды на земли твоей: число дний твоих исполняя исполню. |
23:27 См.: 🔗Быт. 35:5 | И страх послю ведущий тя, и устрашу вся языки, в няже ты входиши к ним, и дам вся сопротивники твоя в бегуны: |
23:28 См.: 🔗Втор. 7:20 🔗Нав. 24:12 | и послю шершни пред тобою, и изжену Аморреи и Евеи, и Иевусеи и Хананеи и Хеттеи от тебе: |
23:29 | не изжену их в лете единем, да не будет земля пуста, и мнози будут на тя звери земнии: |
23:30 | помалу помалу изжену их от тебе, дондеже возрастеши и наследиши землю. |
23:31 | И положу пределы твоя от Чермнаго моря до моря Филистимля, и от пустыни до реки великия Евфрата, и предам в руце ваши седящих на земли и изжену их от тебе: |
23:32 См.: 🔗Исх. 34:15 🔗Втор. 7:2 | да не смесишися с ними, и с боги их да не завещаеши завета, |
23:33 См.: 🔗Исх. 34:12 | и да не останутся на земли твоей, да не сотворят тя согрешити ко Мне: аще бо поработаеши богом их, сии будут тебе в соблазн. |