Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 43 | |
43:1 См.: 🔗Иез. 40:6 | И веде мя ко вратом зрящым на востоки и изведе мя: |
43:2 См.: 🔗Иез. 1:24 | и се, слава Бога Израилева грядяше по пути врат зрящих на востоки, и глас полка аки глас усугубляющих многих, и земля светяшеся аки свет от славы Его окрест. |
43:3 См.: 🔗Иез. 1:3 | И видение, еже видех, по видению, еже видех, егда вхождах помазати град: и видение колесницы, юже видех, подобяшеся видению, еже видех на реце Ховар. И падох на лице мое. |
43:4 | Слава же Господня вниде во храм по пути врат зрящих на восток. |
43:5 | И взя мя дух и введе мя во двор внутренний: и се, полн славы дом Господень. |
43:6 | И стах, и се, глас от храма глаголющаго ко мне, и муж стояше близ мене |
43:7 | и рече ко мне: сыне человечь, видел ли еси место престола Моего и место стопы ног Моих, идеже вселится имя Мое среде дому Израилева во век? И не осквернят ктому имене Моего святаго дом Израилев, тии и старейшины их во блужении своем и во убийствах старейшин своих среде себе, |
43:8 | внегда полагаху преддверие Мое во преддвериих своих и праги Моя близ прагов своих: и даша стену Мою яко держащуюся Мене и онех, и оскверниша имя Мое святое в беззакониих своих, яже творяху: и скончах я в ярости Моей и во избиении: |
43:9 | и ныне да отринут блужение свое и убийства старейшин своих от Мене, и вселюся среде их во век. |
43:10 См.: 🔗Иез. 16:63 🔗Иез. 40:4 | Ты же, сыне человечь, покажи дому Израилеву храм, и да престанут от грехов своих: и видение его, и чиноположение его, |
43:11 | и тии приимут казнь свою о всех, яже сотвориша: и распишеши храм и уготование его, и исходы его и входы его, и бытие его и вся повеления его и вся законы его возвестиши им и да впишеши пред ними, и снабдят вся оправдания Моя и вся повеления Моя и сотворят я. |
43:12 См.: 🔗Иез. 41:4 | И расписание храма на верху горы: вси пределы его окрест Святая Святых суть. |
43:13 См.: 🔗Иез. 40:5 | Сей закон храма, и сия мера требника, в лакоть лактя и длани, недро глубины лакоть на лакоть и лакоть в широту, и ограждение устия ему окрест, пяди. |
43:14 | И сия высота требника, и от глубины начала вдоления его ко очистилищу великому, еже внизу, двух лактей, широта же лакоть: а от очистилища малаго ко очистилищу великому лакти четыри, и широта лакоть. |
43:15 | И ариил четырех лактей, а от ариила и выше рогов лакоть: |
43:16 | ариил же дванадесять лактей в долготу и дванадесять лактей в широту, четвероуголен на четыри части своя. |
43:17 См.: 🔗Иез. 43:13 | И очистилище четыренадесять лактей в долготу и четыренадесять лактей в широту, четвероуголно на четыри части своя: и ограждение ему окрест окружающее его пол лактя, и обдержание его лакоть окрест, и степени его зрящыя на восток. |
43:18 См.: 🔗Исх. 40:16 🔗Лев. 8:11 | И рече ко мне: сыне человечь, сия глаголет Господь Бог Израилев: сия заповеди требника в день сотворения его, еже возносити на нем всесожжения и возливати нань кровь. |
43:19 См.: 🔗Иез. 40:46 | И даси жерцем и левитом, иже суть от семене Садукова, приступающым ко Мне, глаголет Господь Бог, еже служити Мне, телца от говяд за грех: |
43:20 | и да возмут от крове его и да возложат на четыри роги требника и на четыри части очистилища и на основание окрест, и окропиши е, и очистят е: |
43:21 См.: 🔗Лев. 16:3 | и да возмут телца, иже за грех, и да сожжется во отлученнем храме вне святых. |
43:22 | А во вторый день да возмут два козлища от коз непорочных за грех и да очистят требник, якоже очистиша телцем. |
43:23 | И егда скончают очищение, да принесут телца от говяд непорочна и овна от овец непорочна, |
43:24 | и да принесете пред Господа: и да возвергут на ня жерцы соль и да вознесут я Господеви всесожжения. |
43:25 | Седмь дний да сотвориши козлище за грех по вся дни, и телца от говяд и овна от овец непорочна, да сотворят седмь дний: |
43:26 См.: 🔗Исх. 28:41 | и да очистят требник и освятят его, и наполнят руки своя. |
43:27 | И скончают седмь дний, и будет от осмаго дне и потом, сотворят жерцы на жертвеннице всесожжения ваша и яже спасения вашего: и прииму вы, глаголет Господь. |