Послание апостола Павла к Евреям, глава 11

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 11
11:1 См.: 🔗Рим. 8:24	Есть же вера уповаемых извещение, вещей обличение невидимых.
11:2	В сей бо свидетелствовани быша древнии.
11:3 См.: 🔗Быт. 1:1 🔗Пс. 32:6	Верою разумеваем совершитися веком глаголголом Божиим, во еже от неявляемых видимым быти.
11:4 См.: 🔗Быт. 4:4 🔗Мф. 23:35	Верою множайшую жертву Авель паче Каина принесе Богу, еюже свидетелствован бысть быти праведник, свидетелствующу о дарех его Богу: и тою умерый еще глаголет.
11:5 См.: 🔗Быт. 5:24 🔗Сир. 44:15 🔗Сир. 49:16	Верою Енох преложен бысть не видети смерти: и не обреташеся, зане преложи его Бог: прежде бо преложения его свидетелствован бысть, яко угоди Богу.
11:6	Без веры же невозможно угодити (Богу): веровати же подобает приходящему к Богу, яко есть, и взыскающым Его мздовоздатель бывает.
11:7 См.: 🔗Быт. 6:22 🔗Сир. 44:17 🔗Иез. 14:14	Верою ответ приим Ное о сих, яже не у виде, убоявся сотвори ковчег во спасение дому своего: еюже осуди (весь) мир, и правды, яже по вере, бысть наследник.
11:8 См.: 🔗Быт. 12:4	Верою зовом Авраам послуша изыти на место, еже хотяше прияти в наследие, и изыде не ведый, камо грядет.
11:9	Верою прииде Авраам на землю обетования, якоже на чужду, в кровы вселися со Исааком и Иаковом снаследникома обетования тогожде:
11:10 См.: 🔗Евр. 12:22	ждаше бо основания имущаго града, емуже художник и содетель Бог.
11:11 См.: 🔗Быт. 17:19 🔗Быт. 21:2 🔗Рим. 4:19	Верою и сама Сарра неплоды силу во удержание семене прият и паче времене возраста роди, понеже верна непщева Обетовавшаго.
11:12 См.: 🔗Быт. 15:5 🔗Быт. 22:17	Темже и от единаго родишася, да еще умерщвленнаго, якоже звезды небесныя множеством и яко песок вскрай моря безчисленный.
11:13 См.: 🔗Быт. 23:4 🔗Быт. 47:9	По вере умроша сии вси, не приемше обетований, но издалеча видевше я, и целовавше, и исповедавше, яко страннии и пришелцы суть на земли:
11:14	ибо таковая глаголющии являются, яко отечествия взыскуют.
11:15	И аще бы убо оно помнили, из негоже изыдоша, имели бы время возвратитися:
11:16 См.: 🔗Исх. 3:15 🔗Мф. 22:32	ныне же лучшаго желают, сиречь небеснаго: темже не стыдится сими Бог, Бог нарицатися их: уготова бо им град.
11:17 См.: 🔗Быт. 22:9	Верою приведе Авраам Исаака искушаемь, и единороднаго приношаше, обетования приемый,
11:18 См.: 🔗Быт. 21:12 🔗Рим. 9:7	к немуже глаголано бысть: яко о Исааце наречется тебе семя:
11:19	помыслив, яко и из мертвых воскресити силен (есть) Бог, темже того и в притче прият.
11:20 См.: 🔗Быт. 27:27	Верою о грядущих благослови Исаак Иакова и Исава.
11:21 См.: 🔗Быт. 47:31 🔗Быт. 48:14	Верою Иаков умирая коегождо сына Иосифова благослови и поклонися на верх жезла его.
11:22 См.: 🔗Быт. 50:24	Верою Иосиф умирая о исхождении сынов Израилевых памятствова и о костех своих заповеда.
11:23 См.: 🔗Исх. 2:2 🔗Деян. 7:20	Верою Моисей родився сокровен бысть три месяцы от отец своих, зане видеша красно отроча и не убояшася повеления царева.
11:24 См.: 🔗Исх. 2:11	Верою Моисей, велик быв, отвержеся нарицатися сын дщере фараоновы:
11:25	паче (же) изволи страдати с людьми Божиими, нежели имети временную греха сладость,
11:26	болшее богатство вменив Египетских сокровищ поношение Христово: взираше бо на мздовоздаяние.
11:27 См.: 🔗Исх. 10:29 🔗Исх. 13:17	Верою остави Египет, не убоявся ярости царевы: Невидимаго бо яко видя, терпяше.
11:28 См.: 🔗Исх. 12:3	Верою сотвори Пасху и пролитие крове, да не погубляяй перворожденная коснется их.
11:29 См.: 🔗Исх. 14:21	Верою преидоша Чермное море аки по сусе земли: егоже искушение приемше Египтяне истопишася.
11:30 См.: 🔗Нав. 6:19	Верою стены Иерихонския падоша обхождением седмих дний.
11:31 См.: 🔗Нав. 2:1 🔗Нав. 6:24	Верою Раав блудница не погибе с сопротивльшимися, приимши сходники с миром (и иным путем изведши).
11:32 См.: 🔗Суд. 4:6 🔗Суд. 7:15 🔗Суд. 11:11 🔗Суд. 13:24 🔗1Цар. 7:10 🔗1Цар. 17:45	И что еще глаголю? Не достанет бо ми повествующу времене о Гедеоне, Вараце же и Сампсоне и Иеффаи, о Давиде же и Самуиле, и о (других) пророцех,
11:33 См.: 🔗Дан. 6:22	иже верою победиша царствия, содеяша правду, получиша обетования, заградиша уста львов,
11:34 См.: 🔗1Цар. 14:6 🔗3Цар. 19:3 🔗Ис. 38:9 🔗Дан. 3:25	угасиша силу огненную, избегоша острея меча, возмогоша от немощи, быша крепцы во бранех, обратиша в бегство полки чуждих:
11:35 См.: 🔗3Цар. 17:22 🔗4Цар. 4:36	прияша жены от воскресения мертвых своих: инии же избиени быша, не приемше избавления, да лучшее воскресение улучат:
11:36 См.: 🔗Быт. 39:20 🔗Суд. 16:25 🔗Иер. 20:2	друзии же руганием и ранами искушение прияша, еще же и узами и темницею,
11:37 См.: 🔗3Цар. 21:13 🔗2Пар. 24:21 🔗Иер. 26:23	камением побиени быша, претрени быша, искушени быша, убийством меча умроша, проидоша в милотех (и) в козиях кожах, лишени, скорбяще, озлоблени:
11:38 См.: 🔗1Цар. 22:1 🔗3Цар. 17:3	ихже не бе достоин (весь) мир, в пустынех скитающеся и в горах и в вертепах и в пропастех земных.
11:39 См.: 🔗Лк. 10:24	И сии вси послушествани бывше верою, не прияша обетования,
11:40	Богу лучшее что о нас предзревшу, да не без нас совершенство приимут.