Книга пророка Иезекииля, глава 3

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 3
3:1 См.: 🔗Отк. 10:9	И рече ко мне: сыне человечь, снеждь свиток сей, и иди и рцы сыном Израилевым.
3:2	И отверзох уста моя, и напита мя свитком сим
3:3 См.: 🔗Отк. 10:10	и рече ко мне: сыне человечь, уста твоя снедят, и чрево твое насытится свитка сего даннаго тебе. И снедох его, и бысть во устех моих яко мед сладок.
3:4	И рече ко мне: сыне человечь иди и вниди в дом Израилев, и глаголи словеса Моя к ним:
3:5 См.: 🔗Ис. 33:19	яко не к людем глубокоречивым и косноязычным посылаемь еси, к дому Израилеву,
3:6	ниже к людем многим иноязычным, иноречивым, ни тяжким языком сущым, ихже не разумел бы еси словес: аще же и к тацем послал бых тя, то и тии послушали быша тебе:
3:7 См.: 🔗Ис. 48:4	а дом Израилев не восхощет послушати тебе, понеже не хотят слушати Мене, яко весь дом Израилев непокориви суть и жестокосерди:
3:8 См.: 🔗Иер. 1:18	и се, дах лице твое сильно противу лица их, и прю твою укреплю противу при их:
3:9 См.: 🔗Иер. 1:8	и будет, всегда крепчае камене дах прю твою: не убойся их, ни ужасайся лица их, зане дом разгневаяй есть.
3:10	И рече ко мне: сыне человечь, вся словеса, яже глаголах с тобою, возми в сердце твое и ушима твоима послушай:
3:11 См.: 🔗Иез. 2:5	и шед вниди в плен к сыном людий твоих, и речеши к ним и возглаголеши к ним: тако глаголет Адонаи Господь: аще убо послушают и аще убо повинутся.
3:12 См.: 🔗Иез. 8:3	И взя мя дух, и слышах глас за собою труса велика, глаголющих: благословена слава Господня от места Его.
3:13	И видех глас крил животных скриляющихся друг ко другу, и глас колес держащься их, и глас труса велика.
3:14	И дух воздвиже мя и взя мя, и поидох вознесен во устремлении духа моего, и рука Господня бысть на мне крепкая.
3:15	И внидох в пленники вознесен, и обыдох живущыя на реце Ховар, и седох ту седмь дний, ходя посреде их.
3:16	И бысть по седмих днех слово Господне ко мне глаголя:
3:17 См.: 🔗Иез. 33:7	сыне человечь стража дах тя дому Израилеву, да слышиши слово от уст Моих и воспретиши им от Мене.
3:18 См.: 🔗2Пет. 1:13 🔗Иез. 34:10 🔗1Тим. 5:22	Внегда глаголати Ми беззаконнику: смертию умреши: и не возвестиши ему, ни соглаголеши, еже остатися беззаконнику и обратитися от пути своего, еже живу быти ему: беззаконник той в беззаконии своем умрет, крове же его от руки твоея взыщу.
3:19 См.: 🔗Деян. 18:6 🔗Деян. 20:26	И ты аще возвестиши беззаконнику, и не обратится от беззакония своего и от пути своего (беззаконна): той беззаконник во беззаконии своем умрет, а ты душу твою избавиши.
3:20 См.: 🔗Иез. 18:24	И егда совратится праведник от правд своих и сотворит согрешение: и дам муку пред ним, той умрет, яко ты не воспретил еси ему, и во гресех своих умрет, зане не помянутся правды его, яже сотвори: крове же его от руки твоея взыщу.
3:21	Ты же аще возвестиши праведному, еже не согрешити, и той не согрешит: праведный жизнию поживет, яко воспретил еси ему, и ты твою душу избавиши.
3:22	И бысть на мне рука Господня, и рече ко мне: востани и изыди на поле, и тамо возглаголется к тебе.
3:23 См.: 🔗Иез. 1:3 🔗Иез. 8:4	И востах и изыдох на поле: и се, тамо слава Господня стояше, якоже видение и якоже слава Господня, юже видех на реце Ховар, и падох на лицы моем.
3:24 См.: 🔗Иез. 2:2	И прииде на мя дух и постави мя на ногу моею: и глагола ко мне и рече ми: вниди и затворися среде дому твоего.
3:25 См.: 🔗Иез. 4:8	И ты, сыне человечь, се, дашася на тя узы, и свяжут тя ими, и не изыдеши от среды их:
3:26 См.: 🔗Иез. 12:2	и язык твой привяжу к гортани твоему, и онемееши и не будеши им в мужа обличения, понеже дом разгневаяй есть:
3:27 См.: 🔗Иез. 2:5 🔗Отк. 22:11	и внегда глаголати Ми к тебе, отверзу уста твоя, и речеши к ним: сия глаголет Адонаи Господь: слышай да слышит, и не покаряяйся да не покаряется, зане дом преогорчеваяй есть.