Книга Бытия, глава 13

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 13
13:1 См.: 🔗Пс. 104:13	Изыде же Аврам от Египта сам и жена его, и вся, елика его, и Лот с ним в пустыню.
13:2 См.: 🔗Быт. 24:35 🔗Прит. 10:22	Аврам же бяше богат зело скоты и сребром и златом.
13:3 См.: 🔗Быт. 12:8 🔗Быт. 35:6	И иде отнюдуже прииде, в пустыню до Вефила, до места, идеже бе ему куща первее, между Вефилем и между Агге,
13:4 См.: 🔗Быт. 12:7	на место жертвенника, идеже сотвори его первее: и призва тамо Аврам имя Господне.
13:5	И Лоту ходящу со Аврамом бяху овцы, и волы, и кущы.
13:6 См.: 🔗Быт. 36:7	И не вмещаше их земля жити вкупе, яко имения их бяху многа: и не можаху жити вкупе.
13:7 См.: 🔗Быт. 21:25	И бысть распря между пастухи скота Аврамля и между пастухи скота Лотова: Хананее же и Ферезее тогда живяху на земли (той).
13:8 См.: 🔗Пс. 33:15 🔗Быт. 11:27 🔗Быт. 14:12	Рече же Аврам Лоту: да не будет распря между мною и тобою, и между пастухи твоими и между пастухи моими, яко человецы братия мы есмы:
13:9	не се ли вся земля пред тобою есть? Отлучися ты от мене: аще ты на лево, аз на десно: аще же ты на десно, аз на лево.
13:10 См.: 🔗Быт. 2:8 🔗Ис. 51:3 🔗Иез. 28:13	И возвед Лот очи свои, виде всю окрестную страну Иорданскую, яко вся напаяема бяше водою, прежде неже низвратити Богу Содом и Гоморр, яко рай Божий, и яко земля Египетска, даже приити до Зогора:
13:11	и избра себе Лот всю окрестную страну Иорданскую, и отиде Лот от востока: и разлучистася кийждо от брата своего.
13:12	Аврам же вселися в земли Ханаанстей, Лот же вселися во граде окрестных стран и вселися в Содоме.
13:13 См.: 🔗Быт. 18:20 🔗Быт. 19:13 🔗Иез. 16:49	Человецы же сущии в Содоме зли и грешни пред Богом зело.
13:14	Бог же рече Авраму, повнегда разлучитися Лоту от него: воззри очима твоима и виждь от места, идеже ты ныне еси, к северу, и ливе, и к востоку, и морю:
13:15 См.: 🔗Быт. 12:7 🔗Быт. 15:18 🔗Быт. 26:4 🔗Втор. 34:4	яко всю землю, юже ты видиши, тебе дам ю и семени твоему во веки,
13:16 См.: 🔗Быт. 32:12 🔗Втор. 10:22	и сотворю семя твое, яко песок земный: аще кто может исчести песок земный, то и семя твое изочтет:
13:17	востав проиди землю в долготу ея и в широту: яко тебе дам ю и семени твоему во век.
13:18 См.: 🔗Чис. 13:23	И отселився Аврам, пришед вселися у дуба Мамврийскаго, иже бяше в Хевроне: и созда ту жертвенник Господу.