Книга Премудрости Иисуса, сына Сирахова, глава 45 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 45
45:1	Возлюбленный Богом и человеки Моисей, егоже память во благословениих.
45:2	Уподобил есть его славе святых и возвеличи его во страсе врагов.
45:3 См.: 🔗Исх. 11:3	Во словесех его знамения устави и прослави его пред лицем царей: заповеда ему к людем своим и показа ему славу Свою:
45:4	в вере и кротости его освяти его, избра его от всякия плоти.
45:5 См.: 🔗Исх. 19:19	Слышан сотворил есть ему глас Свой и введе его во мглу,
45:6 См.: 🔗Исх. 19:5 🔗Исх. 31:18	и даде ему пред лицем заповеди, закон жизни и ведения, еже научити Иакова завету и судбам Его Израиля.
45:7 См.: 🔗Исх. 4:27	Аарона возвыси свята, подобна ему брата его от колена Левиина,
45:8	постави ему завет вечен и даде ему иерейство людий, ублажи его благоукрашением и препояса его одеждою славы,
45:9 См.: 🔗Исх. 28:2	облече его в совершение хваления и утверди его сосудами крепости,
45:10	остегнми и подиром и епомидою,
45:11 См.: 🔗Исх. 28:33	и окружи его шипки златыми и звонцы многими окрест, глашати глас во ступаниих его, слышан творити глас в церкви в память сыном людий Своих:
45:12	одеждою святою, со златом и иакинфом и порфирою, делом пестроделца, словом суда, явленьми истины,
45:13	истканною багряностию, делом художничим, камении многоценными, изваяньми печати, в связании злата, делом каменноделателя, на память в писании изваяннем по числу колен Израилевых:
45:14 См.: 🔗Исх. 28:36	венец злат верху кидара, изображение печати святыни, похвала чести, дело крепости, вожделения очес красима прекрасна.
45:15	Прежде его не быша таковая до века.
45:16	Не облечеся иноплеменник, точию сынове его и внучата его присно.
45:17	Жертвы их приносимы бяху по вся дни непрестанно дважды.
45:18 См.: 🔗Лев. 8:12	Исполни Моисей руце и помаза его елеем святым.
45:19 См.: 🔗Чис. 18:19 🔗Втор. 11:21	Бысть ему в завет вечен, и семени его во днех неба, служити Ему вкупе и священствовати, и благословляти люди Его именем Его.
45:20	Избра его от всех живых принести жертву Господеви, фимиам и благоухание на память, на очищение людем своим.
45:21	Даде ему заповеди Своя, власть в заветех судеб, научити Иакова свидением и в законе Его просветити Израиля.
45:22 См.: 🔗Чис. 16:1	Восташа нань чуждии, и возревноваша ему в пустыни мужие, иже при Дафане и Авироне, и сонм Кореов в ярости и гневе.
45:23 См.: 🔗Чис. 16:31	Виде Господь и не благоволи, и скончашася яростию гнева:
45:24 См.: 🔗Чис. 16:35	сотвори в них знамения, погубити я огнем пламене.
45:25	И приложи Ааронови славу и даде ему наследие: начатки первых жит раздели ему.
45:26	Хлеб в первых уготова на сытость: ибо жертвы Господни ясти будут, яже даде ему и семени его.
45:27 См.: 🔗Чис. 18:20	Обаче в земли людий не наследствит, и в людех не будет ему части: Сам бо часть его и наследие.
45:28 См.: 🔗Чис. 25:7	И Финеес сын Елеазаров третий во славе, егда ревноваше страху Господню, и ста в превращении людий благостию усердия души своея, и умоли о Израили.
45:29 См.: 🔗Чис. 25:12 🔗1Мак. 2:54	Сего ради поставлен ему бысть завет мирен, предстателем быти святых и людем его, да будет ему и семени его священства величество во век.
45:30 См.: 🔗Пс. 88:5	И завет Давиду, сыну Иессеову от колена Иудова, наследство царя сына от сына единаго: достояние священства Аарону и семени его.
45:31	Да даст нам премудрость в сердцах наших судити людем Его в правду, да не потребятся благая их и слава их в роды их.