Книга пророка Иезекииля, глава 12

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 12
12:1	И бысть слово Господне ко мне глаголя:
12:2 См.: 🔗Иер. 5:21	сыне человечь, посреде неправд их ты живеши, иже очи имут видети, и не видят, и ушы имут, еже слышати, и не слышат, зане дом преогорчеваяй есть.
12:3 См.: 🔗Иер. 26:3 🔗Иер. 36:3	И ты, сыне человечь, сотвори себе сосуды пленнически, и пленен буди днем пред ними, и преселен буди от места твоего на место другое пред ними, яко да видят, зане дом прогневляяй есть.
12:4	И да изнесеши сосуды твоя, яко сосуд пленнический, днем пред очима их: ты же изыдеши в вечер пред ними, якоже исходит пленник.
12:5	Прокопай себе стену, и да изыдеши сквозе ю пред ними.
12:6 См.: 🔗Иез. 24:24	На раменех взят будеши и покровен изыдеши, лице твое покрыеши, и да не видиши земли, понеже чудо тя дах дому Израилеву.
12:7	И сотворих тако все, елико ми заповеда Господь: и сосуды изнесох яко сосуды пленничы днем, и в вечер прокопах себе стену рукою, и отай изыдох, и на рамена взят бых пред ними.
12:8	И бысть слово Господне заутра ко мне глаголя:
12:9 См.: 🔗Иер. 23:33	сыне человечь, не реша ли к тебе дом Израилев, дом прогневляяй: что ты твориши?
12:10	Рцы к ним: тако глаголет Господь Бог: ко князю и старейшинам Иерусалимлим, и всему дому Израилеву, иже суть среде их,
12:11	рцы, яко аз чудеса творю, якоже сотворих, сице им будет: во преселении и во пленении изыдут.
12:12 См.: 🔗Иер. 52:7 🔗Ам. 4:3	И князь среде их на рамена взят будет, и отай изыдет сквозе стену, и прокопает, еже ему изыти сквозе ю, лице свое покрыет, да не видимь будет очесы, и сам земли не узрит.
12:13 См.: 🔗Иез. 17:20 🔗Иез. 32:3 🔗4Цар. 25:7	И простру мрежу Мою нань, и ят будет во одержании Моем, и введу его в Вавилон в землю Халдейску, и не узрит ея, и тамо скончается.
12:14 См.: 🔗Иез. 5:12	И вся, иже окрест его, помощники его, и вся заступающыя его разсею по всем ветром, и мечь излию вслед их:
12:15 См.: 🔗Иез. 22:15	и уведят, яко Аз Господь, егда разсыплю я во языки и разсею я по странам:
12:16 См.: 🔗Ис. 4:3 🔗Зах. 13:8	и оставлю от них мужы в число от меча и от глада и от смерти, яко да поведят вся беззакония их во языцех, аможе внидут: и уведят, яко Аз Господь.
12:17	И бысть слово Господне ко мне глаголя:
12:18 См.: 🔗Иез. 4:16 🔗Ос. 9:4 🔗Пс. 126:2	сыне человечь, хлеб твой с болезнию снеси и воду твою со страданием и скорбию испиеши.
12:19 См.: 🔗Иез. 4:16	И речеши к людем земли: сия глаголет Адонаи Господь живущым в Иерусалиме на земли Израилеве: хлебы своя с недостатком снедят и воду свою с пагубою испиют: яко да погибнет земля со исполнением своим, в нечестии бо вси живущии в ней.
12:20 См.: 🔗Иер. 4:27 🔗Иер. 9:11 🔗Мих. 6:13	И гради их населеннии опустеют, и земля их в погибель будет, и увесте, яко Аз Господь.
12:21	И бысть слово Господне ко мне глаголя:
12:22 См.: 🔗Авв. 2:3 🔗2Пет. 3:4 🔗Иер. 17:15	сыне человечь, кая притча сия вам на земли Израилеве, глаголющым: долги дни, погибе всякое видение?
12:23 См.: 🔗Ос. 1:4	Сего ради рцы к ним: тако глаголет Адонаи Господь: отвращу притчу сию, и потом не рекут притчи тоя дом Израилев, яко речеши к ним: приближишася дние и слово всякаго видения.
12:24 См.: 🔗Чис. 23:19 🔗1Цар. 3:19 🔗Ис. 34:16	Зане не будет ктому всякое видение ложное, и волхвуяй угодная среде сынов Израилевых.
12:25	Яко Аз Господь возглаголю словеса Моя, возглаголю и сотворю и не продолжу ктому: во дни вашя, доме прогневаяй, реку слово и сотворю, глаголет Адонаи Господь.
12:26	И бысть слово Господне ко мне глаголя:
12:27 См.: 🔗Иез. 11:3	сыне человечь, се, дом Израилев преогорчеваяй глаголюще глаголют: видение, еже сей видит, на дни многи, и на времена долга сей прорицает.
12:28	Сего ради рцы к ним: сия глаголет Господь Бог: не продолжатся ктому вся словеса Моя, яже возглаголю: яко возглаголю слово и сотворю, глаголет Адонаи Господь.