Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 5 | |
5:1 | Слышите слово Господне, имже аз приемлю на вы плачь: дом Израилев падеся и ктому не приложит востати: |
5:2 | девица Израилева повержена на земли своей, несть возставляющаго ю. |
5:3 | Понеже сия глаголет Господь Бог: из града, из негоже исхождаше тысяща, останется в нем сто: и из негоже исхождаше сто, останет в нем десять дому Израилеву. |
5:4 См.: 🔗Пс. 33:11 | Понеже сия глаголет Господь к дому Израилеву: взыщите Мене и поживете: |
5:5 См.: 🔗Ам. 4:4 | а не взыскуйте Вефиля и в Галгалу не входите и ко кладязю клятвы не ходите, яко Галгала пленяема пленится, и Вефиль будет аки не быв. |
5:6 См.: 🔗Ис. 55:6 🔗Иер. 17:27 | Взыщите Господа и поживете, яко да не возжжется яко огнь дом Иосифов, и пояст его, и не будет угашающаго дому Израилева. |
5:7 | Господь творяй в высоту суд и правду на земли положи: |
5:8 См.: 🔗Ам. 9:6 | творяй вся и претворяяй, и обращаяй во утро сень смертную и день в нощь помрачаяй, призываяй воду морскую и разливаяй ю на лице земли: |
5:9 | Господь Бог Вседержитель имя Ему: разделяяй сокрушение на крепость и бедство на твердыню наводяй. |
5:10 См.: 🔗Ис. 29:21 🔗Соф. 1:12 | Возненавидеша у врат наказующаго, и словом праведным возгнушашася. |
5:11 См.: 🔗Соф. 1:13 | Сего ради понеже пястьми биете убогих и дары избранны приясте от них: домы украшены соградисте, и не вселитеся в них, винограды вожделенны насадисте, и не имате пити вина от них. |
5:12 См.: 🔗Ис. 59:15 🔗Ам. 8:4 | Яко уведех многа нечестия ваша, и крепцы греси ваши, попирающе праведнаго, приемлюще премены и убогия от врат отреяюще. |
5:13 См.: 🔗Ам. 8:3 | Сего ради смысляй в то время премолчит, яко время лукаво есть. |
5:14 | Взыщите добра, а не зла, яко да поживете, и будет тако с вами Господь Бог Вседержитель, якоже ресте: |
5:15 См.: 🔗Пс. 96:10 | возненавидехом злая и возлюбихом добрая: и возставите у врат суд, яко да помилует Господь Бог Вседержитель оставшая Иосифова. |
5:16 См.: 🔗Иер. 9:17 | Сего ради сия глаголет Господь Бог Вседержитель: на всех стогнах (будет) плачь, и на всех путех речется: увы люте, увы люте! Призовется земледелец на плачь и на рыдание, и на ведящих плачь, |
5:17 | и на всех путех плачь, понеже пройду среде тебе, рече Господь. |
5:18 | Увы люте желающым дне Господня! Вскую вам сей день Господень? Сей бо есть тма, а не свет: |
5:19 См.: 🔗Ис. 24:18 🔗Иер. 48:44 | якоже аще убежит человек от лица льва, и нападет нань медведица: и вскочит в дом и опрется рукама своима о стену, и усекнет его змия. |
5:20 См.: 🔗Иоил. 2:2 | Несть ли день Господень тма, а не свет, и мгла не имущи света своего? |
5:21 См.: 🔗Ис. 1:11 🔗Иер. 6:20 | Возненавидех и отвергох праздники вашя и не обоняю жертв в сонмех ваших: |
5:22 См.: 🔗Мал. 2:13 | зане аще принесете Ми всесожжения и жертвы вашя, не прииму, и на спасителная явления вашего не призрю. |
5:23 См.: 🔗Мф. 15:8 | Отстави от Мене глас песней твоих, и песни органов твоих не послушаю. |
5:24 | И повалится якоже вода суд, и правда якоже водотеча непроходна. |
5:25 См.: 🔗Деян. 7:42 | Еда заколения и требы принесосте Ми в пустыни лет четыредесять, доме Израилев? |
5:26 См.: 🔗Деян. 7:43 | И восприясте скинию Молохову и звезду бога вашего Ремфана, образы, яже сотвористе себе. |
5:27 | И преселю вы далее Дамаска, глаголет Господь: Бог Вседержитель имя Ему. |