Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 15 | |
15:1 | Аз есмь лоза истинная, и Отец Мой делатель есть: |
15:2 См.: 🔗Мф. 15:13 🔗Гал. 5:22 | всяку розгу о Мне не творящую плода, измет ю: и всяку творящую плод, отребит ю, да множайший плод принесет. |
15:3 См.: 🔗Ин. 13:10 🔗1Ин. 2:7 | Уже вы чисти есте за слово, еже глаголах вам. |
15:4 | Будите во Мне, и Аз в вас. Якоже розга не может плода сотворити о себе, аще не будет на лозе, тако и вы, аще во Мне не пребудете. |
15:5 См.: 🔗Деян. 4:12 | Аз есмь лоза, вы (же) рождие: (и) иже будет во Мне, и Аз в нем, той сотворит плод мног, яко без Мене не можете творити ничесоже: |
15:6 | аще кто во Мне не пребудет, извержется вон, якоже розга, и изсышет: и собирают ю и во огнь влагают, и сгарает: |
15:7 | аще пребудете во Мне и глаголголы Мои в вас пребудут, егоже аще хощете, просите, и будет вам: |
15:8 | о сем прославися Отец Мой, да плод мног сотворите и будете Мои учениицы. |
15:9 | Якоже возлюби Мя Отец, и Аз возлюбих вас: будите в любви Моей: |
15:10 | аще заповеди Моя соблюдете, пребудете в любви Моей, якоже Аз заповеди Отца Моего соблюдох и пребываю в Его любви. |
15:11 | Сия глаголах вам, да радость Моя в вас будет и радость ваша исполнится. |
15:12 | Сия есть заповедь Моя, да любите друг друга, якоже возлюбих вы: |
15:13 | болши сея любве никтоже имать, да кто душу свою положит за други своя. |
15:14 | Вы друзи Мои есте, аще творите, елика Аз заповедаю вам: |
15:15 | не ктому вас глаголю рабы, яко раб не весть, что творит господь его: вас же рекох други, яко вся, яже слышах от Отца Моего, сказах вам. |
15:16 См.: 🔗Мк. 16:15 | Не вы Мене избрасте, но Аз избрах вас и положих вас, да вы идете и плод принесете, и плод ваш пребудет, да, егоже аще просите от Отца во имя Мое, даст вам. |
15:17 | Сия заповедаю вам, да любите друг друга. |
15:18 См.: 🔗1Ин. 3:13 | Аще мир вас ненавидит, ведите, яко Мене прежде вас возненавиде: |
15:19 | аще от мира бысте были, мир убо свое любил бы: якоже от мира несте, но Аз избрах вы от мира, сего ради ненавидит вас мир. |
15:20 | Поминайте слово, еже Аз рех вам: несть раб болий господа своего: аще Мене изгнаша, и вас изженут: аще слово Мое соблюдоша, и ваше соблюдут: |
15:21 См.: 🔗Ин. 16:3 | но сия вся творят вам за имя Мое, яко не ведят Пославшаго Мя. |
15:22 | Аще не бых пришел и глаголал им, греха не быша имели: ныне же вины не имут о гресе своем: |
15:23 | ненавидяй Мене, и Отца Моего ненавидит: |
15:24 | аще дел не бых сотворил в них, ихже ин никтоже сотвори, греха не быша имели: ныне же и видеша, и возненавидеша Мене и Отца Моего: |
15:25 См.: 🔗Пс. 68:5 🔗Пс. 34:19 | но да сбудется слово, писанное в законе их, яко возненавидеша Мя туне. |
15:26 См.: 🔗Лк. 24:49 🔗Ин. 14:26 | Егда же приидет Утешитель, Егоже Аз послю вам от Отца, Дух истины, Иже от Отца исходит, Той свидетелствует о Мне: |
15:27 | и вы же свидетелствуете, яко искони со Мною есте. |