Книга Иова, глава 23

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 23
23:1	Отвещав же Иов, рече:
23:2	вем убо, яко из руки моея обличение мое есть, и рука Его тяжка бысть паче моего воздыхания.
23:3	Кто убо увесть, яко обрящу Его и прииду ко кончине?
23:4	И реку мой суд, уста же моя исполню обличения,
23:5	уразумею же изцеления, яже ми речет, и ощущу, что ми возвестит.
23:6	И аще со многою крепостию найдет на мя, посем же не воспретит ми.
23:7	Истина бо и обличение от Него: да изведет же в конец суд мой.
23:8	Аще бо во первых пойду, ктому несмь: в последних же, како вем Его?
23:9	Ошуюю творящу Ему, и не разумех: обложит одесную, и не узрю.
23:10 См.: 🔗Иов. 31:4 🔗Иов. 33:9	Весть бо уже путь мой, искуси же мя яко злато.
23:11 См.: 🔗Пс. 118:51	Изыду же в заповедех Его, пути бо Его сохраних, и не уклонюся от заповедий Его
23:12	и не преступлю, в недрех же моих сокрых глаголголы Его.
23:13	Аще же и Сам судил тако, кто есть рекий противу Ему? Сам бо восхоте и сотвори.
23:14	Сего ради о Нем трепетен бых, наказуемь же попекохся о Нем:
23:15	сего ради от лица Его потщуся, поучуся и убоюся от Него.
23:16	И Господь умягчил сердце мое, и Вседержитель потщася о мне:
23:17	не ведех бо, яко найдет на мя тма, пред лицем же моим покрыет мрак.