|
Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 7 | |
| 7:1 | Случися же и седмим братиям вкупе с материю ятым, понуждаемым быти от царя ясти противу правил мяса свиная, бичми и жилами волуями мучимым. |
| 7:2 | Един же от них, иже бе первый, тако рече: что хощеши вопрошати и научитися от нас? Готови бо есмы умрети, нежели преступити отеческия законы. |
| 7:3 | Разгневався же царь повеле сковрады и конобы разжещи. |
| 7:4 | Умже скоро разжженным бывшым, повеле сущему от них предводителю слова отрезати язык, и со всего кожу содравше, краи удов телесных отсещи, прочиим братиям и матери смотрящым. |
| 7:5 | И егда уже неключимь сотворен бысть всеми (удесы), повеле огню предати еще дышуща и пещи на сковраде: пару же умножающуся от сковрады, (прочии купно) с материю друг друга поощряху умрети мужественно, глаголюще сице: |
| 7:6 | Господь Бог зрит и о истине нашей утешается, якоже пред лицем свидетелствующею песнию изяви Моисей глаголя: и о рабех Своих утешится. |
| 7:7 | Умершу же первому сим образом, втораго изводяху на поругание: и кожу со главы его со власы содравше, и вопрошаху: будеши ли ясти прежде неже умучено будет все тело по удам. |
| 7:8 | Он же отвещав отеческим гласом, рече: ни. Темже и сей по ряду прият мучение, якоже и первый. |
| 7:9 | В последнем же издыхании быв, рече: ты убо, окаяннейший, от настоящаго живота нас погубляеши, Царь же мира умерших нас Своих ради законов воскресит нас в воскресение живота вечнаго. |
| 7:10 | По сем же третий поругаемь бе, и языка испрошен, абие издаде и руце дерзостне простре и мужественне рече: |
| 7:11 | от небесе сия притяжах, и Его ради законов презираю сия, и от Него сия паки уповаю восприяти. |
| 7:12 | Яко и сам царь и сущии с ним удивляхуся юнаго великодушию, яко ни во чтоже полагаше муки. |
| 7:13 | И сему скончавшуся, и четвертаго такожде мучаху мучителе. |
| 7:14 | И егда уже бысть к смерти тако рече: лучше убиваемым от человек упования чаяти от Бога, паки имущым воскрешеным быти от Него, тебе же воскресение в живот не будет. |
| 7:15 | По сем же пятаго приведше мучиша. И он воззрев нань, рече: |
| 7:16 | власть в человецех имея тленен сый, еже хощеши, твориши: не мни же роду нашему от Бога оставлену быти: |
| 7:17 | ты же потерпи и зри велию державу Его, како тебе и семя твое умучит. |
| 7:18 | По сем приведоша шестаго. И той умрети начинающь рече: не прельщайся суетно, мы бо себе ради сия страждем согрешающе к Богу нашему, сего ради достойная удивления быша: |
| 7:19 | ты же да не возмниши неповинен быти, богоборствовати начен. |
| 7:20 | Безмерно же мати дивная и благия памяти достойная, яже погибающих седми сынов единаго дне и времене видящи, благодушно терпяше ради упования на Господа, |
| 7:21 | и коегождо их увещаваше отеческим гласом, доблия исполнена мудрости и женское помышление мужескою душею воздвизающи, глаголаше к ним: |
| 7:22 | не вем, яко во чреве моем явистеся, ниже бо аз дух и живот дах вам, и коегождо уды не аз составих, |
| 7:23 | но мира Творец, Создавый род человечь и всех изобретый рождение, и дух и жизнь вам паки воздаст с милостию, яко ныне сами себе презираете ради законов Его. |
| 7:24 | Антиох же непщуяй уничижен быти и поношающь глас презрев, еще юнейшему живу сущу, не токмо словесы творяше увещание, но и клятвою подкрепляше, богата купно и блажена сотворити, преведеннаго от отеческих законов, и друга возимети, и дела вверити ему. |
| 7:25 | Сим же юноше ни какоже внемлющу, призвав царь матерь увещаваше, да будет юноше советница на спасение. |
| 7:26 | Много же ему увещавающу, обещала советовати сыну своему. |
| 7:27 | Приклонившися же к нему, посмеяся жестокому мучителю и сице рече отеческим гласом: сыне, помилуй мя носившую тя во чреве девять месяцей и млеком питавшую тя лета три, и воскормившую тя и приведшую в возраст сей, и болезни воспитания понесшую: |
| 7:28 | молю тя, чадо, да воззриши на небо и землю, и вся, яже в них, видящь уразумееши, яко от не сущих сотвори сия Бог, и человечь род тако бысть: |
| 7:29 | не убойся плоторастерзателя сего, но достоин быв братии твоея, восприими смерть, да в милости с братиею твоею восприиму тя. |
| 7:30 | Еще же сия ей глаголющей, юноша рече: кого ожидаете? Не слушаю повеления царева, но повеления закона слушаю даннаго отцем нашым чрез Моисеа: |
| 7:31 | ты же всякия злобы изобретатель быв на Иудеи, не избежиши рук Божиих: |
| 7:32 | мы бо за грехи нашя сия страждем: |
| 7:33 | аще же ради устрашения и наказания живый Господь наш мало прогневася, но паки примирится рабом Своим: |
| 7:34 | ты же, о, беззаконниче и всех человек сквернавейше, не возносися суетно кичася тщетным упованием, на небесныя рабы Его возносящь руку: |
| 7:35 | не у бо Вседержителя и Всевидца Бога суда избегл еси: |
| 7:36 | братия бо наша мало ныне болезни потерпевше по завету Божию вечный живот получиша: ты же судом Божиим праведную казнь гордыни (твоея) восприимеши: |
| 7:37 | аз же, якоже братия моя, душу и тело мое предаю за отеческия законы, призывая Бога милостива вскоре быти Израилю: ты же с мучением и биением исповеси, яко един токмо Бог есть: |
| 7:38 | на мне и на братии моей престанет Вседержителя гнев нанесенный праведно всему роду нашему. |
| 7:39 | Тогда царь разярися яростию нань паче иных лютее, горце терпящь посмеяние. |
| 7:40 | И сей убо чист от жития пременися, по всему на Господа уповая. |
| 7:41 | Последи же сынов и мати скончася. |
| 7:42 | Сия убо о жертвах и о превосходящих мучителствах толико известишася. |
