Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 27 | |
27:1 См.: 🔗1Тим. 6:9 | За скудость мнози согрешиша, и ищай обогатети отвратит око. |
27:2 | Посреде собраных камений вонзется кол, и посреде продаяния и купли совершится грех. |
27:3 | Аще не держится страха Господня со тщанием, вскоре превратится дом его. |
27:4 | Трясением решета останет сметие: такожде отреби человечестии в помышлении его. |
27:5 См.: 🔗Прит. 27:21 | Сосуды скудельничи искушает пещь, и искушение человеческо в помышлении его. |
27:6 См.: 🔗Прит. 26:24 | Возделание древа являет плод его: тако слово помышления в сердцы человечестем. |
27:7 | Прежде беседы не похвали мужа: сия бо искушение (есть) человеков. |
27:8 | Аще гониши правду, постигнеши ю и облечешися в ню яко в подир славы. |
27:9 См.: 🔗Сир. 13:12 | Птицы с подобными себе обитают, и истина к творящым ю обратится. |
27:10 | Лев ловит лов, такожде и греси делающих неправду. |
27:11 См.: 🔗Прит. 15:4 🔗Еф. 4:29 | Повесть благочестиваго всегда премудрость: безумный же яко луна изменяется. |
27:12 | Посреде безумных блюди время, посреде же размышляющих учащай. |
27:13 | Повесть буих мерзость, и смех их во услаждении греха. |
27:14 См.: 🔗Сир. 23:10 🔗Иов. 4:15 | Беседа многокленущагося подимет власы, и свар его затчение ушес. |
27:15 | Пролитие крове свар гордых, и укоризна их слух тяжкий. |
27:16 См.: 🔗Прит. 11:13 🔗Сир. 19:10 | Открываяй тайная погубляет верность и не обрящет друга противу души своея. |
27:17 | Возлюби друга и уверися с ним: |
27:18 | аще же открыеши тайны его, не имаши гнати по нем. |
27:19 См.: 🔗Сир. 6:14 | Якоже бо погубит человек врага своего, тако погубиши дружбу искренняго: |
27:20 | и якоже птицу из руки твоея испустиши, тако испустил еси искренняго и не уловиши его: |
27:21 См.: 🔗Сир. 37:2 | не гонися за ним, яко далече отступи и избеже яко серна от сети. |
27:22 См.: 🔗Сир. 22:24 | Яко струп есть обязати, и клеветы есть измена: |
27:23 | открывый же тайная погуби верность. |
27:24 См.: 🔗Прит. 10:10 | Помизаяй оком кует зло, и никтоже его отставит от того: |
27:25 | пред очима твоима усладит уста своя и словесем твоим подивится, |
27:26 | последи же развратит уста своя и в словесех твоих даст соблазн. |
27:27 | Многая возненавидех и не обретох подобна ему, и Господь возненавидит его. |
27:28 См.: 🔗Рим. 12:19 | Вергаяй камень на высоту на главу свою вергает, и язва льстива раздерет струпы. |
27:29 См.: 🔗Прит. 26:27 | Ископоваяй ров впадется в онь, и распростираяй сеть увязнет в ней. |
27:30 | Творяй зло ввалится в не и не познает, откуду приидет ему. |
27:31 | Поругание и поношение гордых, и отмщение яко лев уловит их. |
27:32 | Сетию уловятся веселящиися о падении благоверных, и болезнь изнурит я прежде смерти их. |
27:33 | Гнев и ярость, и сия суть мерзость, и муж грешник одержан ими будет. |