Евангелие от Луки, глава 17

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 17
17:1 См.: 🔗Мф. 18:6 🔗Мк. 9:42	Рече же ко учеником Своим: не возможно есть не приити соблазном, горе же, егоже ради приходят:
17:2	унее ему было бы, аще жернов оселский облежал бы о выи его, и ввержен в море, неже да соблазнит от малых сих единаго.
17:3 См.: 🔗Лев. 19:17 🔗Мф. 18:15 🔗Иак. 5:19	Внемлите себе. Аще согрешит к тебе брат твой, запрети ему: и аще покается, остави ему:
17:4	и аще седмищи на день согрешит к тебе и седмищи на день обратится, глаголя: каюся: остави ему.
17:5	И рекоша Апостоли Господеви: приложи нам веру.
17:6 См.: 🔗Мф. 17:20 🔗Мф. 21:21 🔗Мк. 11:23	Рече же Господь: аще бысте имели веру яко зерно горушно, глаголали бысте убо ягодичине сей: восторгнися и всадися в море: и послушала бы вас.
17:7	Который же от вас раба имея орюща или пасуща, иже пришедшу ему с села речет: абие минув возлязи?
17:8	Но не речет ли ему: уготовай, что вечеряю, и препоясався служи ми, дондеже ям и пию: и потом яси и пиеши ты?
17:9	Еда имать хвалу рабу тому, яко сотвори повеленная? Не мню.
17:10 См.: 🔗Иов. 22:3 🔗Иов. 35:7 🔗1Кор. 9:16	Тако и вы, егда сотворите вся повеленная вам, глаголите, яко раби неключими есмы: яко, еже должни бехом сотворити, сотворихом.
17:11 См.: 🔗Ин. 4:4	И бысть идущу Ему во Иерусалим, и той прохождаше между Самариею и Галилеею.
17:12 См.: 🔗Лев. 13:46	Входящу же Ему в некую весь, сретоша Его десять прокаженных мужей, иже сташа издалеча:
17:13	и тии вознесоша глас, глаголюще: Иисусе Наставниче, помилуй ны.
17:14 См.: 🔗Лев. 14:2 🔗Мф. 8:4 🔗Мк. 1:44 🔗Лк. 5:14	И видев рече им: шедше покажитеся священником. И бысть идущым им, очистишася.
17:15	Един же от них, видев, яко изцеле, возвратися, со гласом велиим славя Бога,
17:16	и паде ниц при ногу Его, хвалу Ему воздая: и той бе Самарянин.
17:17	Отвещав же Иисус рече: не десять ли очистишася? Да девять где?
17:18	Како не обретошася возвращшеся дати славу Богу, токмо иноплеменник сей?
17:19	И рече ему: востав иди: вера твоя спасе тя.
17:20	Вопрошен же быв от фарисей, когда приидет Царствие Божие, отвещав им рече: не приидет Царствие Божие с соблюдением:
17:21	ниже рекут: се зде, или: онде. Се бо, Царствие Божие внутрь вас есть.
17:22	Рече же ко учеником (Своим): приидут дние, егда вожделеете единаго дне Сына Человеческаго видети, и не узрите:
17:23 См.: 🔗Мф. 24:23 🔗Мк. 13:21	и рекут вам: се зде, или: се, онде: не изыдите, ни пожените:
17:24	яко бо молния блистающися от поднебесныя на поднебесней светится: тако будет Сын Человеческий в день Свой.
17:25 См.: 🔗Мф. 16:21 🔗Мф. 17:22 🔗Мф. 20:18 🔗Мк. 8:31	Прежде же подобает Ему много пострадати и искушену быти от рода сего.
17:26 См.: 🔗Быт. 7:7 🔗Мф. 24:37 🔗1Пет. 3:20	И якоже бысть во дни Ноевы, тако будет и во дни Сына Человеческа:
17:27	ядяху, пияху, женяхуся, посягаху, до негоже дне вниде Ное в ковчег: и прииде потоп и погуби вся.
17:28 См.: 🔗Быт. 19:14	Такожде и якоже бысть во дни Лотовы: ядяху, пияху, куповаху, продаяху, саждаху, здаху:
17:29	в оньже день изыде Лот от Содомлян, одожди камык горящь и огнь с небесе и погуби вся:
17:30	по тому же будет и в день, в оньже Сын Человеческий явится.
17:31	В той день, иже будет на крове, и сосуди его в дому, да не слазит взяти их: и иже на селе, такожде да не возвратится вспять:
17:32 См.: 🔗Быт. 19:26 🔗Прем. 10:7	поминайте жену Лотову.
17:33 См.: 🔗Мф. 10:39 🔗Мк. 8:35 🔗Лк. 9:24 🔗Ин. 12:25	Иже аще взыщет душу свою спасти, погубит ю: и иже аще погубит ю, живит ю.
17:34	Глаголю вам: в ту нощь будета два на одре единем: един поемлется, а другий оставляется:
17:35 См.: 🔗Мф. 24:41	будете две вкупе мелюще: едина поемлется, а другая оставляется.
17:36	Два будета на селе: един поемлется, а другий оставляется.
17:37 См.: 🔗Мф. 24:28	И отвещавше глаголаша Ему: где, Господи? Он же рече им: идеже тело, тамо соберутся и орли.